Алтернатива и предлага на Владата, заради поголема заработка на локалните мали бизниси во текот на летото кога се враќаат иселениците, да дозволи да се врати работното време во недела до 31 август.

Затоа, ние како Алтернатива, врз основа на измените на Законот за трговија и Законот за работното време, ù предлагаме на Владата да ги земе предвид трговците и еснафот и економската криза што ги зафати. Бараме Владата да донесе одлука за да дозволи работење во недела и за време на државните празници во текот на летната сезона, односно од 1 јули до 31 август.

Сметаме дека ваквиот чекор неизмерно ќе им помогне на малите бизниси, но и на иселениците за време на нивниот престој во земјава.
Алтернатива отсекогаш била блиску до иселениците, до нивните потреби и барања, а тоа го докажавме со многу иницијативи и проекти за време на раководењето со Министерството за иселеништво.

Сметаме дека Владата на Северна Македонија треба да направи сè што е во нејзина надлежност за да ù помогне на дијаспората, но и да создаде услови иселениците да го помогаат локалниот бизнис“ бара Алтернатива.

Трите компании на ЕСМ поднеле барање до Регулаторната комисија за енергетика за поскапување на парно-греењето за скопјани за втората половина од годината.

Збирот на барањата имплицира крајно зголемување на цената од 54,2 проценти, потврди претседателот на РКЕ, Марко Бислимовски, за Телма..

Според Бислимовски, одлуката за цената најмногу ќе зависи од проекциите за цената на природниот гас на интернационално ниво.

Добрата страна е тоа што за топлинска енергија, наплатата на ДДВ останува 5 отсто.

Ако предлогот претставен од Европската комисија во четвртокот помине, старите, запуштени автомобили повеќе не би можеле да се продаваат надвор од ЕУ и да придонесуваат за несигурност на патиштата и загадување на животната средина во трети земји, туку наместо тоа, ќе мора да се рециклираат.

Во наредните години на пазарот ќе излегуваат се повеќе автомобили со нулта емисија, што ќе ја зголеми побарувачката за вредни примарни материјали. Денешниот предлог ќе обезбеди рециклирање и повторна употреба на што е можно повеќе од овие материјали, што ќе овозможи нов живот на компонентите на нашите автомобили и значително ќе го намали еколошкиот отпечаток на патниот сообраќај, рече извршниот потпретседател на Комисијата Франс Тимерманс, одговорен за Европскиот зелен план.

Комисијата предложи регулатива со која би се замениле постојните директиви за возила на крајот на животот и за повторна употреба и рециклирање. Комисијата тврди дека новите регулативи ќе доведат до годишно намалување на емисиите на CO2 од 12,3 милиони тони до 2035 година, подобра валоризација на 5,4 милиони тони материјали и зголемена повторна употреба на клучните суровини. „Спроведувањето на регулативата ќе доведе до долгорочни заштеди на енергија во производствената фаза, намалување на зависноста од увезени суровини и промовирање на одржливи и кружни деловни модели“, наведуваат од Комисијата.

Покрај економските, еколошките и социјалните придобивки за ЕУ, регулативата ќе придонесе за поголема безбедност на патиштата во трети земји преку спречување на извозот на автомобили на крајот на животот и намалување на загадувањето во земјите кои увезуваат такви автомобили. Секоја година, повеќе од шест милиони возила го завршуваат својот животен век во Европа.

Автомобилската индустрија ќе стане најголемиот потрошувач на клучните суровини што се користат во трајните магнети на електронските мотори во Европа. Затоа, зајакнувањето на отпорноста на ЕУ на прекини во синџирот на снабдување и намалувањето на нејзината зависност од увозот на овие суровини е клучно за транзицијата кон возила со нулта емисија.

Според предложената нова регулатива, производителите на автомобили ќе треба да дадат јасни и детални упатства за расклопување на возилата и како да се заменат и отстрануваат деловите и компонентите за време на употребата и на крајот од животниот век на возилото. Најмалку 25 проценти од пластиката во новите автомобили ќе треба да дојде од рециклирање, а од тоа најмалку 25 проценти мора да се рециклираат од возила на крајот на животот.

Опсегот на овие мерки постепено ќе се прошири на нови категории како што се мотоцикли, камиони и автобуси, со што ќе се обезбеди посеопфатна покриеност.

Советот на ЕУ и Европскиот парламент сега одлучуваат за предлогот на Комисијата.

Извор: Пословни.хр

Регулаторната комисија за енергетика и водни услуги на Република Северна Македонија донесе Одлука со која се врши зголемување на малопродажните цени на нафтените деривати во просек за 0,57% во однос на одлуката од 10.7.2023 година.

Референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 3,854%, кај дизелот зголемувањето е во просек за 4,754% или за 34,350 $/тон, кај екстра лесното масло зголемувањето е во просек за 4,019% и кај мазутот зголемување во просек за околу 3,315%. Поради што во структурата на цените на нафтените деривати е извршено соодветно прилагодување.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,588 %.
Малопродажната цена на ЕУРОДИЗЕЛ (Д-Е V) се зголемува за 2,00 ден/лит.

Малопродажните цени на бензините ЕУРОСУПЕР БС-95 и ЕУРОСУПЕР БС-98, Мазутот М-1 НС и Мазутот М-1 НС не се менуваат.
Од 15.7.2023 година од 00:01 часот максималните цени на нафтените деривати ќе изнесуваат:

• Моторен бензин – ЕУРОСУПЕР БС – 95 – 80,00 (денари/литар)
• Моторен бензин – ЕУРОСУПЕР БС – 98 – 82,00 (денари/литар)
• Дизел гориво – ЕУРОДИЗЕЛ БС (Д-Е V) – 72,50 (денари/литар)
• Масло за горење – Екстра лесно 1 (ЕЛ-1) – 70,00 (денари/литар)
• Мазут М-1 НС – 41,784 (денари/килограм)

Напоменуваме дека ова се максималните цени на нафтените деривати од 00:01 часот на 15.7.2023 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени.