Минималната синдикална кошница за декември годинава изнесува 62.861 денари и е за 840 денари повисока отколку во ноември годинава кога беше 62.021 денар. Со изнајмен стан од 60  квадратни метри, пак, изнесува 78.236 денари, соопшти денеска Сојузот на синдикати на Македонија (ССМ).

Според пресметката на ССМ, од минималната синдикална кошничка едно четиричлено семејство за храна и пијалаци треба да одвои  23.075 денари или 36,7 отсто, за облека и обувки 5.728 денари или 9,1 отсто, за станарина, вода, електрична енергија и греење 6.020 денари или 9,6 отсто, за лична хигиена и одржување на хигиена во домот 2.087 денари или 3,3 отсто, за здравје 1.135 денари или 1,8 отсто, за транспорт 4.727 денари или 7,5 отсто. 

За комуникации на едно четиричлено семејство во декември годинава  му биле неопходни 3.417 денари или 5,4 отсто,  за рекреација и култура 4.458 денари или 7,1 отсто, за образование 6.984 денари или 11,1 отсто, за ресторани и хотели 4.131 денар или 6,6 отсто, а за останати стоки и услуги 1.100 денари или 1,7 отсто. 

Доколку живеат во изнајмен стан потребни им се дополнителни 21.395 денари. 

Забележително е дека од септември кога беше воведена првата мерка од страна на Владата за ограничувањето на маржите и со последната мерка односно акција за намалување на цените за најмалку 10 отсто, тие даваат резултат, делот на храната и пијалоци во Синдикалната минимална кошница кој за декември изнесува 23.075 денари спореден со септрември 2024 година (23.034,00 денари) е зголемен за 41,00 денари, со што се потврдува дека мерки се потребни почесто имајќи предвид дека од страна на трговците се злоупотребува секоја прилика за да се богатат на грбот на граѓаните и работниците, се вели во соопштението. 

Загрижува тоа што трговците повторно го искористија периодот пред стапување на сила на последната акција и, како што се наведува, евидентно ги зголемија цените, а дополнително и вредноста на Синдикалната минимална кошница за храна и пијалоци за 63 основни производи кои се дел од истата за декември изнесува 23.075 денари е зголемен за дополнителни 397 денари, наместо да биде намален за најмалку 10 отсто.

Сојузот на синдикатите на Македонија бара мерките да траат подолго, за Владата значително да придонесе за зачувување на животниот стандард на граѓаните, а следната мерка да биде без за истата да бидат информирани трговците и стопанствениците за да не направат повторно злоупотреби на грбот на граѓаните и работниците, стои во соопштението од ССМ.

Хонда и Нисан се во почетни разговори за потенцијално спојување со цел да се натпреваруваат со производителите на електрични возила (ЕВ), особено во Кина. Дискусиите сè уште се во рана фаза и не е гарантирано дека ќе се постигне договор. Двете компании веќе започнаа соработка за ЕВ во март, а во август ги продлабочија своите партнерства, особено во областа на батериите и технологијата. Тие изјавија дека ги истражуваат можностите за идно партнерство, но негираа дека официјално објавиле нешто.

Сепак, потенцијалното спојување може да биде сложено поради неколку причини. Се очекува ваков договор да се соочи со политичка контрола во Јапонија, бидејќи може да резултира со големи кратења на работни места. Дополнително, Нисан ќе треба да го ревидира своето партнерство со францускиот производител Рено. Постои можност во иднина Мицубиши, чиј најголем акционер е Нисан, да стане дел од ова потенцијално партнерство.

Разговорите доаѓаат во време кога автомобилските брендови се борат со растечката конкуренција во електричниот сектор, особено од кинеските производители како BYD, кои постигнуваат огромен раст и се закануваат на глобалните лидери како Тесла. Иако Нисан и Хонда заедно продале 7,4 милиони возила во 2023 година, тие губат пазарен удел во Кина. Некои експерти прашуваат дали спојувањето ќе биде доволно за да ги направи овие компании поконкурентни.

Тајната на исклучителната креативност на Томас Едисон била во забавата. Неговата лабораторија во Менло Парк, Њу Џерси, не била сериозно и строго организирано место, туку бучна и хаотична средина исполнета со шеги, практична забава и песни. И покрај долгите и напорни работни часови, оваа атмосфера резултирала со над 1.000 патенти за револуционерни изуми како сијалицата, фонографот и филмската камера

Современите лидери можат да учат од овој пристап. Според Ричард Шеридан, автор на Chief Joy Officer, воведувањето забава и хумор на работното место го стимулира креативниот процес и ја намалува анксиозноста кај вработените. Наместо работна средина водена од страв и строг надзор, тој препорачува лесни и енергични процеси кои ја поттикнуваат радоста и тимската работа

Научните истражувања потврдуваат дека среќата и забавата се клучни за успехот. Студиите покажуваат дека среќните луѓе се посклони кон успех и напредување во кариерата, додека лидерите со смисла за хумор се помотивирачки и создаваат поангажирани тимови. Игривоста на работното место го зголемува менталниот капацитет, спречува burnout и го поттикнува учењето

Албанскиот премиер, Еди Рама, изјави дека владата одлучила да ја блокира платформата Тик Ток.

На средба со родителите и наставниците околу новиот план за мерки за безбедност во училиштата, тој рече дека веќе е направен план за конкретни мерки за блокирање на Тик Ток.

Додаде дека Тик Ток ќе биде затворен една година, но за тоа ќе бидат потребни шест до осум недели.

Ги направивме сите наши истражувања од технолошката страна и ќе ни требаат 6 до 8 недели почнувајќи од почетокот на следната година и за 1 година целосно ќе го затвориме за сите. Во Република Албанија повеќе нема да има Тик Ток. Потоа во текот на оваа година ќе видиме какви мерки ќе преземат другите земји или како може да реагира самиот Тик Ток. Тоа е наша должност, рече Рама.

Тој искажа целосна поддршка за министерката за образование, Огерта Манастирлиу, додавајќи дека “како што го подобри здравствениот, така ќе го подобри и образовниот систем“.

Презентирајќи го Новиот акциски план, иницијатива на Министерството за образование за зголемување на безбедноста во училиштата, министерката Манастирлиу истакна дека овој чекор е дел од пакетот мерки што го развиваат Националната управа за сајбер безбедност и Националната агенција за информатичко општество.

Според неа забраната за Тик Ток е мерка поврзана со напорите да се зголеми физичката и дигиталната безбедност во училиштата и да се заштитат децата од негативните ефекти на социјалните мрежи.

Со цел да ја зголемиме физичката и дигиталната безбедност во училиштата и влијанието што го носат социјалните мрежи, како и ангажманот на децата, решивме да ја блокираме платформата Тик Ток, врз основа на пакет мерки на кои работат надлежните органи, изјави таа.

Албанија е прва земја во регионот која го блокира Тик Ток, што е платформа за кратки видеа, во сопственост на кинеската интернет компанија БајтДенс.

МИА