Европската унија ниту во 2019 година нема да биде во можност да го укине поместувањето на стрелките на часовникот, поради неколку членки кои не се подготвени за тоа, истакна денеска автсрискиот министер за сообраќај Норберт Хофер.

Тој ги повика на неформалниот состанок во Грац, своите колеги од повеќе земји во ЕУ, за да расправаат за укинување на поместувањето на часовниците двапати годишно, напролет и наесен.

Австрискиот министер, чија земја моментално преседава со ЕУ, истакна дека би било добро да се избегнат различните временски зони внатре во ЕУ. Според Хофер „најважно е да се најде компромис со мнозинството земји, бидејќи многу од членките на Унијата се резервирани кога се работи за промена на системот на сметање на времето, но и околу тоа кога тоа би се спровело“.

Во септември претседателот на Европската Комисија, Жан Клод Јункер најави план следната година да се прекине со поместување на европските часовници, откако милиони луѓе во анкетата се изјаснија „за“.

По неколку неделни поскапувања на нафтените деривати, од ноќеска на полноќ паднаа цените на бензинот и дизелот.

Имено цената на Еуросупер БС-98, се намалува за 3,5 денари, а дизелот и Екстра лесното масло за домаќинства за 1,5 денари за литар додека пак Еуросупер БС-95 се намалува за 3 денари.

Регулаторната комисија за енергетика реши да ги намали цените така што возачите од денес резервоари со Еуросупер БС-98 ќе точат за 73 ден/литар, Еуросупер БС-95 ќе се продава по цена од 71,50 ден/литар, а дизелот по цена од 67,50 ден/литар.

 56,50 ден/литар ќе изнесува Екстра лесното масло за домаќинство.

Oвие цени ќе важат во следните две недели.

За прв пат се распиша јавниот повик со кој се субвенционираат електрични тротинети.

За оваа намена градските власти решија да издвојат скоро милион денари а јавниот повик ќе биде реализиран по принципот „прв дојден, прв услужен“.

Целта на оваа мерка е стимулирање на граѓаните за помасовно користење електрични тротинети како алтернативно превозно средство, соопшти Град Скопје.

Максималниот износ за поединечна субвенција за купување електричен тротинет по лице се утврдува во износ од 50 отсто од вредноста на електричниот тротинет, но не повеќе од 10.000 денари по лице, со вклучен персонален данок на доход.

Условите за учество се исти како и кај јавниот повик за субвенции за велосипеди. Право на учество на јавниот повик имаат жителите на Град Скопје кои треба да достават барање за надомест, доказ за жителство во главниот град, копија на важечка лична карта на барателот, копија од трансакциска сметка на барателот. Потребно е да се достави и доказ дека е извршено купување на нов електричен тротинет и тоа со копија од фискална сметка или фактура и извод од деловна банка со датум од денот на објавување на повикот.

Средствата кои Градот ќе ги издвои за субвенционирање за купување електрични тротинети се средства кои беа неискористени од буџетот за субвенции за велосипеди, поточно субвенции за велосипеди за лица со посебни потреби. 

Не возиме велосипеди, но ќе возиме ли електрични тротинети?

Тежат до најмногу 15 килограми, со едно батериско полнење може да се возат до 30 километри, а брзината која ја постигнуваат е 30 километри на час. Субвенцијата за купување на електричен тротинет која ја најави град Скопје на граѓаните им остави простор за размислување дали со тротинетот би можеле да одат на работа и колку е паметно да се купи. Дел од граѓаните сметаат дека на таков начин ќе ја избегнат гужвата, другите се за, затоа што нема да бараат паркинг. Во секој случај на запад возењето електричен тротинет е се поприсутно. Ако се омасови, во Скопје може да биде позитивно и за намалувањето на загадувањето, голем проблем на главниот град во зимскиот период.

Популарни ширум светот, прифатливи за рамна површина како во Скопје

Кинезите дефинитивно се број еден нација која користи електрични автомобили, а проценки која земја најчесто ги користи електричните тротинети засега нема, но од она што го гледаме и на улиците во европските градови е дека употребата на ова превозно средство во подем расте се повеќе.

Нивната предност е малата тежина. Тежат од 10 до 15 килограми, а имаат релативно висока моќност и носивост. Некои модели развиваат брзина и до 35 километри на час. Развојот на технологијата овозможи овие алтернативни превозни средства да можат да поминат и до 30 километри со само едно батериско полнење.

Бугарско специјално обвинителство и Комисијата за спречување на корупцијата и одземање на нелегално стекнат имот од вчера спроведува акција за корупциска афера и службени злоупотреби во Државната агенција за Бугарите во странство (ДАБЧ).

Во краткото соопштение до јавноста испратено од страна на Јавното обвинителство утрото во понеделникот се вели дека истражителите и обвинителите од Специјалното обвинителство вршат "процедурални истражни дејствија на адреси во Софија, Ќустендил и Плевен - претреси и заплена, претреси на лица и сослушување на сведоци" во рамките на истрагата за организирана криминална група, поткуп , фалсификување на официјални документи и јавен престап.

Според неофицијални информации, уапсен е директорот на ДАБЧ, Петар Харалампиев. Тој како кадар на „Обединетите патриоти“ беше назначен на функцијата во 2017 година. Од 2014 до 2017 година беше заменик гувернер на окружниот округ. Претходно, тој ја водеше Фондацијата „Булгар“. Харалампиев е од движењето "БГ патриоти" што е дел од коалицијата "Обединети патриоти" и гравитира околу ВМРО.

Неколку часа по акцијата од националистичката партиска коалиција „Обединети патриоти“ демантираа дека Харалампиев е нивни член. "Претседателот на ДАБЧ не е член на ниту една од партиите во коалицијата" Обединети патриоти - НФСБ, Атака и ВМРО ". Тој е лидер на граѓанското движење" БГ патриоти ", соопштија во демантот испратен до медиумите.

Според извор на бугарски "Капитал", главната теза на истражните органи е дека ДАБЧ издавала фалсификувани уверенија за бугарско потекло. Овој документ е од клучно значење во процесот на стекнување бугарско државјанство под натурализација. Веќе речиси 20 години не постојат јасни правила за регулирање на редоследот по кој се издаваат овие сертификати.

За последните десет години над 115 илјади лица добиле државјанство со слично уверение, а процесот на администрирање со години се поврзува со бугарското ВМРО. Истрага на "Капитал" од 2014 година покажа дека станува збор за плаќања под маса со заработени десетици милиони евра годишно, а за отворање на едно досие цената е помеѓу 2 и 3 илјади евра.

Во мај оваа година француското списание L'Observateur објави публикација на оваа тема, потсетувајќи на сомнежите дека бугарското ВМРО, кое е дел од владејачката коалиција, има активна улога во овој бизнис. 

Во текот на летото, репортажа имаше и француско-германско телевизија ARTE. Пред камерата сведочeшe поранешната шефица на дирекција "Бугарско државјанство" во Министерството за правда, Катја Матева, која раскажа за репресија, на која била изложена од страна на работодавачот откако одлучила да алармира за црниот бизнис со бугарски пасоши.

Во соопштението испратено од "Обединетите патриоти" во понеделникот, се вели дека политиката на движењето отсекогаш била "да се дава бугарско државјанство на секој етнички Бугарин, независно од тоа каде живее" и "ако некој вработен си дозволил да ја злоупотребува службената должност и да ги прекрши правилата на агенцијата и законите на земјата, мора да ги сноси последиците за тоа ".

Низ годините, бугарското обвинителството и службите постојано биле вклучени во процесот за тоа како се стекнува бугарско државјанство, но сите истраги завршувале во фиока. На крајот на јуни, во бугарскиот парламент беше побарано да се формира анкетна комисија за издавање на државјанствата, но никогаш не заживеа.