Граѓаните кои до 31 декември не се регистрираа во системот на Управата за јавни приходи за персонален данок, ќе може тоа да го направат и утре и наредните денови.

Од Управата велат дека не им е целта да казнуваат, па нема да вратат ниту еден граѓанин кој сака да се регистрира, но не се пријавил на време. Даночниците ќе се обидат да стапат во контакт и со тие кои воопшто не покажале интерес.

До утрината на 31.12 се регистрирани над 650.000 граѓани, но конечната бројка ќе се знае утре. Задоволни сме од одзивот на граѓаните, тој е речиси 100 процентен. Системот е отворен и секој кој го пропуштил рокот ќе може и од утре да ја донесе пријавата во УЈП. - велат од УЈП

Според првичната информација во електронскиот систем требаше да се регистрираат околу 920.000 граѓани. Но, УЈП од обврската ги ослободи пензионерите кои земаат само пензија од државниот ПИОМ. Останатите пензионери пак кои имаат дополнителни приходи или странски пензии требаше да отворат мејл и да се регистрираат во УЈП.

Раководството на Управата тврди дека нема казни за тие кои нема да се пријават, но ризикуваат да бидат третирани како даночни затајувачи за што се предвидени казни од 100 до 200 евра.

Ова е првата година кога граѓаните нема да одат на шалтерите на УЈП туку до крајот на април ќе добијат пополнета годишна даночна пријава на мејл адресите. Обврската ќе биде само да ја потврдат или корегираат доколку податоците не се точни. А доколку тоа не го направат до крајот на мај УЈП ќе ја смета таа Годишна даночна пријава за потврдена.

Од денеска забрана за прием во градинка за сите деца од Скопје кои не ја примиле МРП вакцината. Оваа мерка ја донесоа здравствените власти по ширењето на малите сипаници во речиси сите скопски општини.

Прогласија епидемија во главниот град бидејќи изминатите два дена биле регистрирани 12 случаи на морбили од кои 6 и официјално биле потврдени а за останатите чекаат лабораториски резултати. Од Здравствениот санитарен и здравствен инспекторат веднаш ќе достават решенија до сите градинки и очекуваат вработените да ја почитуваат наредбата.

Донесовме ваква мерка, видете, 15 000 невакцинирани е сериозна и голема бројка и не смееме да дозволиме ширење на заразата имајќи во предвид како е во другите земји околу нас, вели Венко Филипче, министер за здравсто.

Ќе вршиме контроли во градинките и ќе видиме дали почитуваат мерки, ова моравме да го донесеме бидејќи не смее да се дозволи работите да излезат од контрола, вели Лилјана Ристевска, инспектор во ДСЗИ.

Дури осуммина од новозаболените се хоспитализирани на Клиниката за инфективни болести. Меѓу нив има и осуммесечно бебе кое добило компликација од морбили.

Имаме со бронхопневмонија, со гастроинтестинални проблеми и двајца се со посериозни компликации, вели др. Сања Маринковиќ од Клиника за инфективни болести.

Во услови на епидемија надлежните велат дека ќе биде намален и прагот за вакцинирање и ќе боцкаат и деветмесечни бебиња. Епидемиолозите апелираат до родителите да ги вакцинираат децата за да не дојде до масовно ширење на болеста која може да биде и смртоносна.

Ние сме имале пред 40 години епидемија каде имало голем број смертни случаи. Такво нешто не смееме да дозволиме, вели Жарко караџовски, епидемиолог во ИЈЗ

Од Комисијата за заразни болести кои ја донесоа одлуката за забрана во одење во градинка се свесни за револтот кој ќе настане кај родителите, но велат законите мора да ги почитуваат сите. Претходно беше прогласена епдиемија во Радишани каде имаше 7 случаи од кои 5 дечиња од градинка.

Годишната обнова на документи за сите корисници на социјална парична помош почнува од утре, информираше Јавната установа меѓуопштински центар за социјална работа. Корисниците ќе треба да поднесат ново барање, а потребните обрасци за поднесување ќе ги добијат во Центарот.

При поднесување треба да имаат на увид важечка лична карта за себе и за сите полнолетни членови на семејството, а останатата потребна документација Центарот ќе ја прибавува по службена должност.

- Основно задолжување во оваа обнова е сите полнолетни членови од семејството задолжително да бидат пријавени во Агенцијата за вработување што ќе биде предуслов за остварување на правото кое се очекува дека ќе се трансформира во гарантирана минимална помош согласно новиот закон за социјална заштита кој набргу треба да биде донесен – информираат од Центарот.

Обновата на документите трае заклучно со 28 јануари 2019 година.

Шест нови случаи на морбили регистрирале здравствените власти. Пет од заразените со мали сипаници се деца, а еден е возрасен. Ниту едно од децата не било вакцинирано.

Информацијата за „Макфакс“ ја потврдија од Министерството за здравство и најавија дека во текот на денот ќе излезат со повеќе информации откако ќе заврши седницата на Комисијата за заразни болести која била вонредно свикана. Неофицијално од Министерството велат дека не се исклучува можноста уште денеска да прогласат епидемија на ниво Град Скопје, по информациите дека сипаниците се шират и дека новите случаи се од Гази Баба, Чаир, Бутел и Шуто Оризари.

Минатата недела во Институтот за јавно здравје беа потврдени два случаи со мали сипаници – 2,5 годишно дете од Куманово и жена на 32 годишна возраст од Шуто Оризари. И тие не биле вакцинирани со МРП и немале контакт со претходно заболените шест деца од градинката во скопската населба Радишани.

Последните контроли на Центарот за јавно здравје покажаа дека вкупно 15 илјади деца на возраст до 14 години не се вакцинирани. Здравствените власти најавија дека ќе се засилат контролите на вакциналните картони, како и критериумите за упис во градинка и училиште, и апелираа родителите да ги вакцинираат децата навреме за да се спречи ризикот од епидемија низ цела Македонија.