Јапонските работодавачи воведоа задолжително спиење на работното место, и тоа ќе биде дел од нивните работни обврски. Тоа не значи дека ќе можат на некое време да ги „затворат очите“, туку ќе добијат соба за спиење.

И за тоа компаниите имаат вистинско оправдување. Според анализите кои ги направиле, јапонските компании годишно губат дури 138 милијарди долари поради недоволното спиење на работниците.

Компаниите до Министерството за здравство доставија предлог-закон во кој се предвидува на работниците да им се дозволи да спијат барем половина час за време на работниот ден.

Неколку ИКТ компании веднаш го прифатија овој тренд.

Владата даде позитивно мислење на барањето на Собранието за предлог – законот за субвенциониран студентски оброк, кој пратениците треба да го усвојат по скратена постапка.

Предлог законот го поднесе ЛДП. Во него се предвидуваат по 120 денари или 2.400 месечно за секој студент за здрав студентски оброк. Од партијата предлагаат правото на субвенциониран студентски оброк да го уживаат студентите кои се државјани на Република Северна Македонија и се запишани како редовни на додипломски студии, на државните или на приватните универзитети. Правото на субвенциониран оброк студентите ќе може да го користат секој работен ден од 8 до 20 часот, но не и во периодот од 1 јули до 14 септември во годината, како и за време на државни, верски празници и во неработни денови.

„Поаѓајќи од концептот за субвенциониран студентски оброк кој со години веќе се имплементира во Словенија, во законот предвидовме право на студентите за значително пониска цена да можат да се хранат во рестораните коишто ќе потпишат договор со Министерството за образование и наука за субвенционирање на студентскиот оброк. Во законот е предвидено дека под субвенциониран студентски оброк се подразбира приготвена храна, но со Правилник за субвенциониран студентски оброк донесен од Министерството за образование и наука детално ќе биде уредено што оброкот вклучува, како и дека од субвенција се исклучени газираните пијалаци и брзата храна, како бургери, бели пецива, тостови, конзервирана храна…“, велат од партијата.

Износот ќе се исплаќа на давателите на услуги коишто услужиле студент, на почеток на тековниот месец за претходниот месец, по изготвена фактура од нивна страна доставена до Министерството за образование и наука. Давателите на субвенциониран студентски оброк ќе ги избира Министерството за образование и наука преку спроведување постапка за јавна набавка во согласност со одредбите од Законот за јавни набавки.

Нема да се зголеми процентот на поврат од 15 отсто од платениот ДДВ. 

Односно, мерката на Владата со која на граѓаните што скенираат фискални сметки им се враќаат 15 отсто од платениот данок на додадена вредност, ќе остане во иста форма како што сега се спроведува.

На исти начин ќе продолжи да се одвива и наградната игра МојДДВ#МојаНаграда, која се спроведува од неодамна.

Ова за Фактор го тврдат од Министерството за финансии, откако во одредени медиуми беше објавено дека Владата планира измени во проектот за поврат на ДДВ на граѓаните, со кои би се зголемил процентот кој сега изнесува 15 отсто, на повисок процент, со цел мерката да стане попривлечна за поголем број граѓани и проектот да добие на масовност. 

„Марката дава добри резултати, а одлично поминува и наградната игра, така што, продолжуваме како и досега“, велат за Фактор од Министерството за финансии.

Инаку, за околу две недели, односно веќе во февруари, на трансакциите на скенирачите на фискални сметки би требало да легне исплатата за второто тримесечје од мерката МојДДВ.

До граѓаните повторно беше упатен апел доколку имале проблеми со исплатата во првото тримесејче, да ги проверат убаво нивните трансакциски сметки, дали правилно се внесени во апликацијата.

Инаку, од првата исплата, поврат легнал кај 144.601 граѓани кои имале правилно внесени трансакциски сметки, а исплатената сума е 155.244.780 денари.

Граѓаните кои скенираат фискални сметки, максималната сума што можат да ја добијат за три месеци е 1.800 денари, или 7.200 денари годишно. 

А во наградната игра, пак, се доделуваат дневни и месечни награди, а има и две главни премии од по 50 илјади евра.