Венко Филипче, министерот за здравство, денеска одговарајќи на новинарско прашања рече дека нема да се брза со отворањето на вратите во училиштата, освен за оние од прво, второ и трето одделение, поради тоа што се покажале како недоволно добри одлуките на другите змеји.

- Видовме лоши примери во други земји како Германија и Израел. Многу ученици во затворен простор продуцираше многу заболени деца. Потоа следуваа одлуки за целосно или делумно затворање на училиштата. Тоа е сценарио што сакаме да го избегнеме, рече Филипче.

Министерот додаде дека средбата со претставниците на средношколците била конструктивна и дека ќе се исполнат нивните барања за комбинирана настава, но кога здравствените параметри ќе го исполнат тоа. Во текот на учебната година први ученици кои ќе следат настава во училниците ќе бидат оние од шесто одделение основно и прва година средно образование.

Филипче уште еднаш ги потврди своите очекувања дека вакцините против корона вирусот ќе бидат снабдени на почетокот од следната година.

Зоран Заев, мандатарот за составување на новата Влада, денеска при посетата на Македонска Каменица одговарајќи на новинарско прашање рече дека Фондот за пензиско осигурување може да ја издржи предложената мерка во новата владина програма во која стои ќе може еден осигуреник максимум пет години предвремено да замине во пензија доколку се согласи пензијата да му биде помала.

„Фондот за пензиско осигурување е во добра кондиција, приходите се до 8 проценти зголемени во корона-кризата. Пред кризата приходите  растеа 12 до 13 проценти. Фоднот сега е стабилизиран“, рече претседателот на СДСМ.

Заев наведе дека за сите економски мерки ќе бидат консултирани синдикатите, работниците и коморите.

Грчката Влада одлучи за уште две седмици да ја продолжи забраната за влез во Грција на државјани на трети земји, како и мерката за ограничување на копнените поврзувања на земјата со Северна Македонија и Албанија.

Претходната заедничка министерска одлука за прекинот на копнените поврзувања истекува на 31 август, а според новата таа се продолжува до 15 септември.

Ограничувањата попладнево ги соопшти заменик-министерот за цивилна заштита на Грција Никос Хардаљас на редовната прес конференција за Ковид-19 во Министерството за здравство.

Грчката Влада веќе најави дека ќе има продолжување на голем дел од мерките што се во сила, меѓу кои и оние што се однесуваат на копнените граници.

Можност за предвремено пензионирање до максимум пет години пред остварувањето на правото на пензија, ама со намален износ, планира да овозможи Владата во следниот мандат. Мерката стои во владината програма за работа од 2020 до 2024 гоидна но поради тоа што таму не се наведени рокови, не е прецизирано кога ќе бидат донесени овие законски измени.

Владата се обврзува да обезбеди нова повисока минимална пензија која ќе изнесува најмалку 10.700 денари за сите. Се најавува и можност за докуп на стаж за да се добие пензија.

„Обезбедување грижа од заедницата кон возрасните преку воспоставување локални услуги за грижа и нега. Ќе овозможиме флексибилен пензиски систем со воведување можност за предвремено пензионирање до максимум 5 години пред остварувањето на правото на пензија, со пропорционално намален износ на редовната пензија. Зајакнување на улогата на старите лица во локалните заедници и обезбедување услови за вклучување во јавниот живот. Ќе овозможиме волонтирање и работно ангажирање на возрасните лица кои сакаат исполнети денови. Воведуваме програми за поголема мобилност за старите лица преку субвенциониран меѓуградски превоз, стои во програмата.

За пензионерите се најавува воспоставување 10 центри за активно и здраво стареење, со програми кои ќе се грижат за менталното и физичкото здравје, социјализацијата и меѓуврсничката комуникација на старите лица.

Владата планира да ја прошири програмата за бањско-климатска рекреација.

Извор: Фактор