Трите лиценцирани компании на БЕГ за производство, дистрибуција и снабдување со топлинска енергија прикажаа три пати поголеми трошоци за 2022 до Регулаторната комисија за енергетика.

Во барањата за одобрување на максимален приход и цена за 2022, БЕГ Производство од 27 мај бара да му се признаат трошоци од 3.399.409.230 денари, односно 54 милиони евра, додека за минатата година барањето било 759.254.478, или 12,5 милиони евра. Ланската пресметка е нешто помалку произведена енергија, но сепак разликата во трошоците и натаму е голема.

БЕГ Дистрибуција бара признавање на трошоци од 60 милиони евра, додека ланското барање на крајот од пролетта 2021 било 25 милиони евра. БЕГ Снабдување бара да му се признае најголем трошок - 68 милиони евра, што е за 40-тина милиони повеќе од ланското поднесено барање.

Од БЕГ признаваат дека вака поднесените трошоци ќе предизвикаат зголемување на цената на парно греењето и се создаваат услови за летно поскапување. Со ланското поскапување на природниот гас, а со тоа и на топлинската енергија, БЕГ како и останатите компании побараа повисока цена за сметките од 1 август 2021. 

Согласно Правилникот за регулирање на цени за топлинска енергија друштвата кои се носители на лиценца за производство, дистрибуција и снабдување со топлинска енергија имаат обврска до РКЕ да достават податоци за остварените трошоци за вршење на регулираните дејности. Согласно ваквата обврска до РКЕ се поднесени барање за признавање на трошоците од работењето на друштвата.
Врз основа на овие податоци и одобрените трошоци за вршење на дејноста, Регулаторната комисија за енергетика и водни услуги на Р.С.М ги утврдува тарифните ставови според кои се фактурира испорачаната топлинска енергија кон крајните потрошувачи во следниот период, ни одговорија од компанијата.

Владата изминатата грејна сезона ја субвенционираше со 6 милиони евра, пари кои што БЕГ треба да ги врати назад до крајот на годинава, според она што првично беше тогаш испланирано. Операторот не знае дали ќе продолжи субвенционирањето со евентуално поскапување на фактурите.

Што се однесува на делот на субвенциите на потрошувачите на топлинска енергија, немаме одговор на ова прашање. Мерката за субвенција на потрошувачите на топлинска енергија е во  надлежност на Владата на РСМ, велат од таму.

Од 1 јануари парно греењето е поскапено за 14 отсто, но само за домаќинствата, додека останатите субјкети плаќаат уште поголемо зголемување.

Претседателот на РКЕ, Марко Бислимовски, веќе рече дека од сите енергенси, најмногу го плаши поскапувањето на природниот гас, предизвикано од геополитички активности. 

Извор: Фактор 

„Мекдоналдс“, најпознатиот светски бренд за брза храна, се повлече од рускиот пазар. Тие ги продадоа своите 800 ресторани на бизнисменот Александар Говор.

Во Москва денеска беа отворени првите ребрендирани ресторани, под името „Вкусно и точка“.

Логото на „Мекдоналдс“ е заменето со два стилизирани помфрити и точка која наликува и на стилизирана плескавица. Во Москва денес се одржа прес-конференција од страна на новите сопственици, на плоштадот Пушкин, каде пред 32 години беше отворен првиот „Мекдоналдс“ во Русија.

„Нашата цел е гостите да не ја почувствуваат разликата во квалитетот или амбиентот“, изјави Олег Пароев, директор на „Вкусно и точка“. Слоганот под кој работи синџирот за брза храна е „името се смени, но љубовта останува“.

Пред 32 години, по распадот на СССР, отворањето на „Мекдоналдс“ во Русија симболично го означи отворањето на поранешна комунистичка земја. Денешниот ден исто така симболично го опишува растојанието помеѓу Москва и западниот свет.

Од денеска  во 10 часот до 15 часот на 15 јуни учениците ќе пополнуваат пријави и електронски ќе аплицираат за запишување во средните училишта за учебната 2022/2023 година. Пријавувањето е преку линк до порталот за електронски услуги на Министерството за образование и наука  https://e-uslugi.mon.gov.mk  со специјална најава за средношколци преку нивните кориснички сметки на schools.mk.

Прелиминарната ранг-листа на запишани ученици ќе биде објавена на 16  јуни  на интернет-страницата на Министерството за образование и наука  www.mon.gov.mk и на https://e-uslugi.mon.gov.mk  најдоцна до 9 часот.

Доставувањето на потребената документација  до училиштата ќе биде на 16  јуни од 12 до 19 часот и на 17 јуни од 7 до 19  часот,  според распоред што ќе го подготви секое училиште.

МОН годинава ја воведе новата дигиталната услуга со цел да се оптимизира целиот процес на уписи во средните училишта. Во периодот додека системот за аплицирање биде достапен за учениците, тие ќе може да прават ажурирање, измени и  дополнувања на своите пријави и да имаат увид во вкупниот број на поени од успехот, без поените од дипломите. Валидација на дипломите и внесување поени од дипломите вршат комисиите од средните училишта.

Регистрација на системот нема да биде потребна и најавата ќе се врши исклучиво со корисничките сметки на schools.mk. Упатството за логирање/најава во системот и пополнување на пријавата ќе биде поставено со линк на страната за логирање/ најава. За првото пријавување на учениците во конкурсниот рок, порталот ќе биде отворен по што системот ќе биде затворен за онлајн-аплицирање од ученици, појаснуваат од Министерството за образование и наука.

Доколку до рокот за електронско аплицирање, 15 јуни, учениците сè уште го немаат добиено  свидетелството за IX одделение,  ќе ги внесат своите оценки евидентирани во е-дневникот. Во полето за свидетелство за IX одделение (во полето за прикачување) ќе прикачат документ/слика (слика од е-дневник) и на тој начин ќе ја завршат апликацијата. Свидетелството од IX-то одделение  задолжително ќе го приложат  до училиштето при доставувањето на целокупната потребна документација на 16  и 17  јуни.

Министерството за образование и наука на крајот на март го објави Конкурсот за запишување ученици во јавните средни училишта за учебната 2022/2023 година, во кој се  наведени условите за запишување и критериуми за избор на учениците, потребните документи за запишување, наставните предмети од основното образование кои се предвидени во критериумите за рангирање на успехот на учениците, роковите за пријавување и насоки за спроведување на Конкурсот.  

Сите институции се во постојана комуникација и во наредниот период ќе се излезе со нов пакет антикризни мерки, изјави директорката на Управата за јавни приходи, Сања Лукаревска.

Во постојана комуникација сме. Веројатно во наредниот период ќе се излезе со новиот пакет. Ги слушаме и целните групи, треба да се направи посебна анализа за тоа која дејност е најмногу засегната и каде ќе треба најмногу да се вбризга помош, рече Лукаревска во емисијата „Клик плус“ на телевизија 21.

Според Лукаревска, намалувањето на ДДВ-то што беше една од мерките од последниот антикризен пакет, не влијаело значително во делот на прибирањето на даноците.

Сметам дека оваа мерка помогна, но не направи соодветни потреси во делот на прибирањето на даноците. Имаме солидна наплата на даноците, рече Лукаревска.