Образованието на младите генерации повторно ја разбранува јавноста.

Колку реално се образовани, а колку оценките им се подарени.

Темата е навистина повеќеслојна и опсежна за анализа.

Еве дел од ставовите на познавачите на проблематиката, но и на родителите:

Сите петки во основно и средно, како и сите десетки на факултет е доказ за корупција, непотизам, малограѓанштина, безобразлук, криминал. Родителите, кои средно едвај завршиле со 3, се тепаат да има нивното дете петка по секој предмет. Умни се Скандинавците кои оценки не ставаат долго време, дури на 16 годишна возраст. Описменувањето е желба, не наредба, описменувањето не се купува со пари. Афинитетите на децата се на прво место, смета активистката Ана Глигорова.

Училиштата се ВОСПИТНО-образовни институции. Би требало да е најважно да се усвојат критериуми, интегритет, желба за узнавање, па дури потоа Омов закон, Кутмичевица, мејоза и митоза ... Многу ме интересира, дали воопшто некој некој некој некој се чувствува одговорен за ова - кој било наставник, родител, ученик, дали е некој свесен како самиот тој придонел кон ова, и лично и како дел од колективот? Еве, нека не се чувствува виновен, не одговорен, дали барем некој се подразбудил, па да се приотрезнил и да е свесен куд плови овај брод, и зошто? И не само како друго ништо не чини, туку кој е сопствениот удел?, гласи ставот на  преведувачката Јасна Шоптрајанова.

A дали е во ред првенци на генерација, во основни училишта, со чесно, со знаење и труд добиени дипломи од натпревари да се стават во ист кош со тие со поклонети петки. За да се избере првенец на генерација и ученик на година, има јасни критериуми по кои се избираат, тука нема местење, смета еден родител.

Да се воведе приемен и на факултетите, секој втор полуписмен и полуустен стана магистер. На колега кому јас му ја подготвував дипломската, на одбраната не знаеше дури ни да ја интерпретира, дипломираше со 6, а се вработи истиот месец откако дипломира и за некое време си зема и решение на неопределено. А, еве ме мене со стипендиите и десетките, трета година чекам трансформација и нема да ја дочекам, слаби ми биле конекциите и ургенциите!, споделува искуство една скопјанка. 

Индикативни резултати од приемниот испит во гимназијата Орце Николов

Во гимназијата Орце Николов во Скопје вчера се одржа приемен испит за упис во прва година затоа што имало пријавени 50-тина кандидати повеќе од слободните места, а сите биле со континуиран одличен успех од 6. до 9. одделение. Биле тестирани 292 ученици (сите “скроз“ одлични) при што тестот по математика носел максимум 100 поени, а по мајчин јазик максимум 70 поени. Ако ги анализираме освоените поени од ранг листата може да забележиме дека:

1. Одличен успех (над 129 бода, т.е. над 76%) имаат покажано само 11 ученици, односно само 3,76% од тестираните.
2. Многу добар успех (од 107 до 129 бода, т.е. од 63 до 76%) имаат покажно 39 ученици, односно 13,36% од тестираните.
3. Добар успех (од 67 до 106 бода, т.е. од 39 до 63%) имаат покажно 133 ученици, односно 45,55% од тестираните.
4. Доволен успех (од 45 до 66 бода, т.е. од 26 до 39%) имаат покажно 70 ученици, односно 23,97% од тестираните.
5. Недоволен успех (под 45 бода, т.е. под 26%) имаат покажно 39 ученици, односно 13,36%од тестираните.

А сите 292 тестирани кандидати дошле со сите петки од основно училиште!? Резултати за дискусија.

Фејсбук статус на Слободан Таневски.

Просечната месечна исплатена нето-плата по вработен, во април 2022 година, изнесува 31 525 денари, објави Државниот завод за статистика.

Според податоците на ДЗС, индексот на просечната месечна исплатена нето-плата по вработен во април 2022 година, во однос на април 2021 година, изнесува 110.9.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Објекти за сместување и сервисни дејности со храна (24,8 отсто), Уметност, забава и рекреација (20,1 проценти) и Административни и помошни услужни дејности (17 отсто). Зголемување на просечната месечна исплатена нето-плата по вработен, во однос на претходниот месец, е забележано во секторите: Дејности на здравствена и социјална заштита (8,3 отсто), Градежништво (5,6 проценти) и Дејности во врска со недвижен имот (4,5 отсто) - објавува ДЗС.

Минатиот месец ДЗС објави дека нето платата во месец март достигна 31.080 денари.

Регулаторната комисија за енергетика и водни услуги на Република Северна Македонија донесе Одлука со која се врши намалување на малопродажните цени на нафтените деривати во просек за 0,51% во однос на одлуката од 20.06.2022 година.

Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 1,537%, кај дизелот зголемување во просек за 0,460%, кај екстра лесното масло зголемување во просек за 0,935 % и кај мазутот намалување во просек за околу 3,484%, поради што во структурата на цените на нафтените деривати е извршено соодветно прилагодување.

Малопродажните цени на бензините ЕУРОСУПЕР БС-95 и ЕУРОСУПЕР БС-98, ЕУРОДИЗЕЛ (Д-Е V) и Екстра лесното масло за домаќинство (ЕЛ-1) не се менуваат, додека малопродажната цена на Мазутот М-1 НС се намалува за 1,447 ден/кг и сега ќе изнесува 55,291 ден/кг.

Од 23.6.2022 година од 00:01 часот максималните цени на нафтените деривати ќе изнесуваат:

Моторен бензин – ЕУРОСУПЕР БС – 95
– 110,00 (денари/литар), Моторен бензин – ЕУРОСУПЕР БС – 98 – 112,00 (денари/литар), Дизел гориво – ЕУРОДИЗЕЛ БС (Д-Е V)–110,00 (денари/литар), Масло за горење – Екстра лесно 1 (ЕЛ-1)–107,00 (денари/литар), Мазут М-1 НС–55,291 (денари/килограм).

Курсот на денарот во однос на доларот во изминатиот период по кој беа формирани цените со претходната пресметка е повисок за 0,360 %.

Напоменуваме дека ова се максималните цени на нафтените деривати од 00:01 часот на 23.6.2022 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени