Интернационалната IT компанија Singular официјално ги отвори вратите од новите модерни канцеларии во Скопје. Отварањето беше одбележано со голема прослава на која тимот, менаџментот и поканети гости заедно наздравија за релокацијата на канцелариите и почетокот на ова значајно поглавје за компанијата. 

Отварањето на новите канцеларии се случува една година откако Singular стана Flutter Entertainment, глобален бизнис што работи со напредни технологии и управува со дел од светски најиновативните, разновидните и препознатливи брендови за спортско обложување и игри. Новиот канцелариски простор, со својот модерен изглед и ентериер што поттикнува тимска работа и дружење, се очекува дополнително да го сплоти тимот од Скопје при соработката со останатите колеги од групацијата Flutter и заедно да ја постават основата за идниот раст на компанијата.

Дарко Гацов, ко-основач и главен оперативен директор на Singular истакнува: „Тоа што ги „пораснавме“ старите канцеларии е плоден исход на нашата успешна работа и силен тимски дух низ годините. Среќни сме што сега дополнително ќе ги зацврстиме нашите долгорочни амбиции како бренд на Flutter и ќе ја продолжиме нашата посветеност кон иновација и извонредни резултати - сето ова директно од нашата нова девелопмент база. Ова е местото каде што заедно ќе оствариме многу сериозни цели во текот на наредните години.“ 

Континуираниот успех и растот на тимот претставуваа одлична прилика и причина за Singular да започне со работа во нов канцелариски простор кој не само што ќе ги исполни барањата и потребите на вработените, туку ќе охрабри поголема тимска соработка и дружење, имајќи предвид дека ова поле беше најмногу засегнато за време на пандемијата. Компаниската култура на Singular става огромен акцент на тимот и неговата добросостојба, па со тоа градењето на нова девелопмент база која што ќе нуди извонредно работно искуство беше од огромно значење. 

Канцелариите се лоцирани во нова зграда од три спрата каде што вработените може да работат според концептот “океан“, што им овозможува зголемена тимска работа и размена на знаење. Секој детаљ од канцеларијата е внимателно избран, со цел ентериерот целосно да се вклопи со духот на Singular и компаниската култура. Канцелариите го нудат совршениот баланс помеѓу работа и забава, па така вработените може лесно да преминат од работните простории во собите за забава и релаксација. Но, она што ги прави новите канцеларии особено привлечни е кафулето на кровот од зградата, кое што нуди одличен поглед за вработените.

„Навистина сме радосни што започнуваме со работа од нови канцеларии каде што вработените ја имаат флексибилноста и сите ресурси што им се потребни, но истовремено и да работат во модерен простор што поттикнува продуктивност, тимска работа и забава. Вработените се клучни за нашиот успех и сакаме да се чувствуваат извонредно од секој аспект. Нашите луѓе и културата отсекогаш биле главен приоритет на Singular и новите канцеларии се доказ за тоа.“ вели Елена Инадеска-Аврамовска, HR менаџер на тимот во Скопје. 

Singular е наградувана IT компанија со главни канцеларии во Малта и две девелопмент бази во Грузија и Северна Македонија. Компанијата бележи огромен раст и успех уште од почетокот на работењето, благодарение на што тимот постојано се зголемува и денес има 160+ вработени низ сите три канцеларии. Во 2021, Singular стана дел од Flutter Entertainment. Аквизaцијата дополнително ги зацврсти вредностите што Singular длабоко ги негува како дел од својата култура: размената на идеи и знаење помеѓу брендови, тимови, колеги. 

За повеќе информации за Singular и отворени работни позиции, посетете ја: culture.singular.uk

Владата на вчерашната седница го разгледа и усвои и Предлог планот за фискална одржливост и поддршка на економскиот раст: политики, препораки, мерки и индикатори.

Се задолжуваат буџетските корисници да ги спроведуваат и почитуваат мерките и препораките предвидени со овој План.

При тоа, се задолжуваат сите буџетски корисници, а им се препорачува на единиците на локалната самоуправа и јавните претпријатија и трговските друштва во државна сопственост, во рок од две недели, да достават пополнет акциски план за консолидација на расходите согласно Планот за фискална одржливост.

Предвидени се, како што е образложено од страна на Министерството за финансии, политики, мерки и препораки за намалување на расходите, за зголемување на приходите, за единиците на локалната самоуправа и за јавните претпријатија и трговски друштва во државна сопственост.

Политиката за намалување на расходите, опфаќа:

Консолидација на расходите за плати и надоместоци, преку намалување за 10 отсто во однос на планираните средства за 2023-та година. Очекуван е фискален ефект (заштеда) околу 3 милијарди денари, во однос на фискалните проекции во среднорочната рамка на расходи;

Консолидација на расходите за стоки и услуги и нивно намалување за 20 отсто во однос на фискалната рамка за 2023 година, при што очекуваниот фискален ефект е околу 3 милијарди денари во однос на фискалните проекции во среднорочната рамка на расходи;

Консолидација на расходите за субвенции, трансфери, дотации и социјални надоместоци и нивно намалување за 20 отсто во однос на фискалната рамка за 2023 година, при што очекуван фискален ефект е околу 3 милијарди денари, во однос на фискалните проекции во среднорочната рамка на расходи и

Политика за подобрена структура на капиталните расходи, со цел меѓу другото, квалитетно и навремено реализирање на капиталните проекти.

Во делот на политиките за зголемување на приходите предвидено е, меѓу другото, оптимизација на даночниот систем, преку консолидирање и проширување на даночната основа кај директните и индиректните даноци и акцизите, намалување на даночната евазија и даночната арбитража и зголемување на даночната транспарентност.

И во делот на политиките за единиците на локалната самоуправа се препорачува намалување на тековните расходи. А, во услови на нарушено снабдување на пазарот на електрична енергија, општините да ја разгледаат можноста за спроведување на централизирана набавка на електрична енергија за институциите под нејзина надлежност, со цел постигнување пониска цена во снабдувањето со електрична енергија, како и буџетските единки основани од општината, да пристапат кон заеднички набавки за електрична енергија.

Министерството за економија доби задолжение од Владата да ги разгледа можностите околу евентуално продолжување на примената на летното сметање на времето, со цел дополнителни заштеди во општата потрошувачка на електрична енергија, информираше вечерва владината прес-служба по 88. седница на владиниот кабинет.

На владината седница се усвоени и нов сет со антикризни мерки во вредност од 350 милиони евра за ублажување на енергетската криза и ценовниот притисок, како План за фискална одржливост и поддршка на економскиот раст со политики, препораки, мерки и индикатори.

По 3.000 денари месечно во наредните четири месеци, или вкупно 12.000 денари, ќе примаат 42 000 граѓани од ранливи категории, предвидува пакетот антикризни мерки за справување со кризата кои денеска на прес-конференција ги соопшти премиерот Димитар Ковачевски.

Тука спаѓаат лица кои користат право на социјална сигурност, лица кои го користат правото за попреченост, родители на децата со попреченост до 26-годишна возраст кои користат право на посебен додаток, лицата со попреченост кои користат право за помош и нега од друго лице, лицата со потешки трајни промени во здравствената состојба, самохрани родители корисници на гарантирана минимална плата и невработени лица. За оваа мерка вкупно се издвоени над 8 милиони евра, рече Ковачевски.

Директна финансиска поддршка ќе има и за пензионерите приматели на најниски пензии: над 91 600 пензионери кои примаат до 11.525 пензија ќе бидат помогнати со по 1.500 денари месечно односно вкупно 6.000 денари за четири месеци.

Воедно, директна финансиска помош од вкупно 3.000 денари обезбедивме за пензионерите кои земаат пензија од 11.525 до 14.000 денари, односно над 66.000 пензионери. За оваа мерка, за нашите пензионери издвоивме над 12,2 милиони евра, рече Ковачевски соопштувајќи ги сетот нови мерки за справување со економската и енергетска криза, усвоени денеска на 88-та седница на Владата.

Дел од сетот мерки што беа соопштени треба  да поминат во процедура во Собрание зашто за нив се потребни законски измени, а дел, согласно Уредбата за кризна состојба ќе може да се операционализираат со одлука на Владата или на одделни министетства.

Од идниот месец пензионерите може да ја очекуваат најновата владина поддршка доколку Собранието ги изгласа потребните законски измени, соопшти Ковачевски.

И Ковачевски и министерот за економија Крешник Бектеши очекуваат дека сите пратеници ќе ги усвојат измените што ќе овозможат помош за пензиоенрите и за ранливите категории граѓани, но и реализирање на сите останати мерки за справување со енергетската  и ценовната криза.

Очекувам и верувам дека сите пратеници ќе бидат на ниво на задачата и ќе ги усвојат измените што значат помош за пензиоенрите и ранливите категории граѓани, истакна Ковачевски, одговорајќи на новинарски прашања по прес-конференцијата на која соопшти дека е усвоен нов пакет мерки тежок преку 350 милиони евра. (МИА)