Фолксваген (VW) ги зголеми цените на своите автомобили со мотори со внатрешно согорување во Германија како резултат на рекордната инфлација.

Од Фолксваген салоните добија информации за поскапување, а во образложението како причина се наведува „значително зголемување на трошоците за набавка на суровини, енергија и опрема“.

Просечната цена на моделите на VW со SUS мотори ќе се зголеми за 4,4 отсто, а тука спаѓаат моделите Golf, Tiguan, Passat вагон, Polo и T-Roc.

Дури ни Фолксваген не може да ја избегне високата инфлација“. Иако даваме се од себе, ефектот на трошоците не може целосно да се компензира“, велат од Фолксваген. Новите цени ќе бидат официјално воведени на 23 февруари.

Цената на основниот модел Поло ќе се зголеми за 905 евра, што значи зголемување од 4,5 отсто. Голфот ќе чини 1.585 евра повеќе или 5,36 отсто. За T-Roc ќе треба да се издвојат дополнителни 1.455 евра или 5,98 отсто повеќе, додека Arteon Shooting Brake сега ќе чини најмалку 42.270 евра или 1.985 евра/4,38 отсто повеќе.

Многу претставништва изразија загриженост за зголемените цени и сметаат дека VW всушност треба да ги „намали“ цените. Еден дистрибутер смета дека поскапувањето е „шокантно“, особено што продажбата веќе опаѓа.

Зголемувањето на цената доаѓа по низа други промени на цените во изминатите 18 месеци. Фолксваген ги зголеми цените за речиси 11 отсто во средината на 2021 и 2022 година.

(Кликс)

Четири работни денови наместо пет се воведени во Британија. Скратена работна недела веќе има во повеќе земји. 

3.000 работници во 61 компанија во државата учествуваа во пробна четиридневна работна недела минатата година. Од 61 компанија, 56 изјавија дека ќе продолжат со четиридневната недела, барем засега, а 18 рекле дека тоа ќе биде нивна постојана политика.

Компании од пиварници до продавници за риби и чипсови и развоен софтвер до фирми за регрутирање, им овозможија на работниците да доаѓаат на работа четири дена, меѓу јуни и декември лани.  Извештајот за проценка на влијанието, според Би-Би-Си, покажа дека тоа има „огромни придобивки“ за вработените.

Пред сите да се одлучат за четиридневна недела со целосна плата, работодавачите ќе треба да видат колку е зголемувањето на продуктивноста, пишува Би-Би-Си.

Работниците ќе треба да креираат услуги и производи за четири дена што ги создаваа за пет, за да заработат доволно пари. Ваквиот раст на продуктивноста се покажа како несовладлив предизвик за економијата на Велика Британија, се нагласува во текстот.

Данска, Исланд, Шпанија, Нов Зеланд се земји каде овој модел е тестиран. 

foto freepik.com/ArtPhoto_studio

Општина Гази Баба сака да стави крај на сообраќајниот хаос во Автокоманда, па поради тоа се планира воведување на зонско паркирање.

Проектот вечерва ќе биде презентиран во 19.00 часот во Домот на културата „Димитар Влахов“, по кој ќе бидат познати повеќе детали, иако „Вечер“ веќе објави како ќе се движат цените.

Жителите на Автокоманда ќе може бесплатно да паркираат по две возила на секое домаќинство, додека останатите ќе треба да плаќаат по 25 денари за час. Се очекува да биде имплементирана и гостинска паркинг-карта која ќе чини 10 денари од час, како и месечна карта за службено возило која ќе се наплаќа 300 денари.

Владата на денешната седница на предлог на вицепремиерката задолжена за политики за добро владеење Славица Грковска усвои сет мерки за подобрување на безбедноста на информациските системи во институциите кои ќе се имплементираат во најкраток рок во секоја институција во јавниот сектор.

Овие мерки, како што информираат од владината прес-служба, следуваат по серијата активности за координација со донаторите и чинителите во областа на сајбер безбедноста, а со цел градење на отпорност кај јавните институции кои се почесто се цел на сајбер напади, а чија цел е оневозможување на системите кои даваат услуги кон граѓаните и има директни, видливи и сериозни последици врз нивниот живот.

Во таа насока, Владата ги задолжи органите на државната управа, а им укажа на институциите кои не се органи на државна управа, да определат лице одговорно за информациска безбедност во нивните организации со цел навремено пријавување на инциденти и размена на информации за инциденти, ранливост, закани и ризици поврзани со безбедноста на информациските системи до Националниот центар за одговор на компјутерски инциденти MKD-CIRT.

Органите на државната управа исто така се должни, а на институциите кои не се органи на државна управа им се укажува, да достават одредени информации до Националниот центар за одговор на компјутерски инциденти MKD-CIRT, како би се регистрирале/ажурирале за услугите на Центарот.

Се задолжуваат органите на државната управа, а им се укажува на институциите кои не се органи на државна управа, сите вработени задолжително да се регистрираат и да завршат обука за сајбер безбедност за вработени во јавна администрација.

Истовремено, органите на државната управа неопходно е да направат план за реализација и да ги предвидат финансиските импликации на мерките на Националниот центар за одговор на компјутерски инциденти MKD-CIRT, се наведува во соопштението. Владата му препорача на Националниот центар за одговор на компјутерски инциденти MKD-CIRT при Агенцијата за електронски комуникации да достави до Владата извештај за спроведена бесплатна надворешна сајбер-безбедносна проверка на веб-апликации на пријавените институции.

Усвоените мерки се високо приоритетни заради заштита на ИТ системите на институциите од јавниот сектор, поради што Владата препорача овие мерки да се имплементираат во најкраток рок во секоја институција во јавниот сектор, со првенствена цел да се заштитат системите за услуги кон граѓаните.