Вредноста на Синдикалната минимална кошничка за четиричлено семејство за месец септември изнесува 48.379 денари, покажуваат податоците на Сојузот на синдикати на Македонија (ССМ). Споредено со претходниот месец, минимална синдикална кошница е намалена за 966 денари, што, според ССМ, е резултат на загарантираните цени на прехранбените производи.

Со зголемувањето на ДДВ на истите тие производи, повторно ќе дојде до зголемување на вредноста на потрошувачката кошничка, односно претходната мерка на загарантирани цени на основните прехранбени производи нема да има никаков ефект. Затоа, ССМ бара од Владата сериозно да ја ревидира и коригира листата на производи кои се дел од секојдневието на граѓаните и за истите да ја врати стапката на ДДВ од пет проценти, потенцираат од ССМ.

Оттаму, истакнуваат дека одлуката за определување стапка на ДДВ која ќе се зголеми од 5 на 10 отсто, е непромислена и несоодветствува на реалните состојби на сиромаштија и зголемени трошоци за живот кои се карактеристични за голем дел од населението, пред сè, поради ниските плати и над 120 000 вработени кои се на минималец.

Предлагаме ДДВ-то од 10 отсто да остане само за оние луксузни прехранбени производи кои се купуваат од мал број граѓани и се консумираат ретко. Доколку остане оваа листа на предложени прехранбени производи чии износ на ДДВ се зголемува на 10 отсто, за луксуз ќе се сметаат и производи за секојдневна употреба како што се: сирењето, конзервирана храна, гриз, чај и друго, велат од ССМ.

Сојузот на синдикати на Македонија потсетува дека, според последниот податок на Државниот завод за статистика, објавен во 2020 година, 21,8 отсто од населението е сиромашно. ССМ предупредува дека поради сегашната економска состојба, доцнење на мерките на Владата, порастот на цените на прехранбените производи, пораст на стапката на ДДВ од 5 на 10 проценти се очекува понатамошно зголемување на стапката на сиромаштија на населението до 25 отсто.

Потребни се брзи и сериозни мерки во областа на економијата преку нови инвестиции и вложувања, развој на нови производни капацитети, зголемување на поддршката и субвенционирање на одделни стопански области, што ќе доведе до зголемување на платите и намалување на сиромаштијата на населението, нагласуваат од ССМ.

Кон крајот на месецов стартува зимското сметање на времето. 

Иако Европската унија пред неколку години најави дека ќе го укине летното и зимското сметање на времето и ќе донесе унифицирано, тоа се уште не се случи.

Во Европа, вклучително и во Македонија, летното сметање на времето оваа година завршува на 29 октомври, што значи дека ноќта меѓу 28 и 29 октомври во 3 часот по полноќ ќе ги поместиме стрелките на часовникот еден час наназад, односно на 2 часот наутро. 

Министерството за труд и социјална политика соопштува дека во согласност со Законот за празниците на РМ, 11 Октомври 2023 година, среда, Ден на народното востание, е неработен ден за сите граѓани на Република Северна Македонија.

Истовремено, Министерството за труд и социјална политика на граѓаните им го честита Денот на народното востание. 

Во интервјуто за „360 степени“ на МТВ 1, министерот за внатрешни работи Оливер Спасовски одговарајќи на прашањето за процесот на замена на личните документи поради уставните измени и во контекст на тоа што ќе се случи со граѓаните кои нема да успеат да ги заменат документите до февруари идната година кога истекува законскиот рок, потенцираше дека во тек е целата постапка на промена на документите и дека врз основа на анализите кои се прават на дневна основа процесот тече со посакуваната динамика.

Ние веќе имаме надминато 1.000.000 граѓани кои што ги замениле своите документи, така што динамиката е силна и во овој период, за одбележување е фактот дека можеби 80% од граѓаните кои живеат во внатрешноста си ги замениле своите лични документи визави граѓаните од Скопје, истакна министерот Спасовски.

Тој дополни дека една причина е бројноста на населението во Скопје, а втора дека можеби жителите на Скопје подоцна се решаваат да ја почнат постапката на закажување за промена на своите документи.

Факт е дека околу 70% од закажаните термини кои што ги имаат граѓаните на телефонскиот број - ги откажуваат, не се појавуваат на тие термини па презакажуваат нови термини, што создава исто така одлагање на целиот тој процес. Меѓутоа, ние веќе подготвуваме еден посебен простор во градот Скопје со инсталирање на нови работни позиции, нови работни станици на кои што ќе можат граѓаните да извршат дактилоскопирање, сликање итн. за новите лични документи. Веќе во наредниве денови ќе бидеме подготвени и ќе можеме да отвориме нови позиции на кои што граѓаните ќе можат дури и без најава да дојдат и да ги менуваат своите документи. Понатаму, работиме заедно со групните домови, дали се тоа домови за стари лица, дали е тоа геријатрија итн. за наши мобилни тимови да одат и на лице место тамо да ги земат сите податоци за промена на личните документи и сметаме дека со ова интензивно темпо кое го имаме сепак ќе дојде до промена на личните документи, односно огромниот број на граѓани тоа право ќе го завршат. Што се однесува до остварувањето на правата на граѓаните, нема да им е ускратено ниту едно право за остварување во државата заради промена на документите, истакна Спасовски.