Министерот за одбрана Владо Мисајловски денеска преку објава на Фејсбук објави нов јавен оглас за прием на 300 професионални војници и 10 подофицери во Армијата. Оваа иницијатива доаѓа како дел од напорите за зајакнување на редовите на вооружаните сили со свеж и мотивиран кадар.
Дополнително, Мисајловски најави и уште еден оглас кој наскоро ќе биде отворен за прием на 60 лица со завршено високо образование во офицерски чин. Ова е значајна можност за младите и амбициозни мажи и жени, независно од нивната етничка припадност, да започнат кариера во служба на безбедноста и мирот на државата.
Во својата изјава, Мисајловски потенцираше дека овие нови позиции се отворени за сите кои сакаат да го посветат својот професионален живот на заштита на мирот и безбедноста на граѓаните. Тој ја даде оваа изјава за време на посетата на Првиот пешадиски баталјон во касарната „Чеде Филиповски-Даме“ во Кичево.

Тагови: Армија на РСМ