Која е македонската уметница која стои зад муралите во „Охрид мол“ и твори под псевдонимот Електра?
Прентовиќ Љиља(26), дипломиран академски сликар, магистранд на Факултетот за ликовни уметности во Скопје, твори и е препознатлива под уметничкото име Електра.
Колку мурали имаш насликано во трговскиот центар „Охрид мол“?
Во трговскиот центар „Охрид мол“, имам насликано осум мурали.
Кој момент го забавува најмногу процесот на создавање на муралите и зошто?
Преместувањето и повторното поставување на скелето го забавуваше целиот процес, бидејќи секој ѕид беше на различна позиција. Овој чекор беше неопходен за прецизна реализација, но одземаше многу време и енергија.
Што значат боите и нивната поврзаност со просторот според тебе?
Боите, според мене, треба да се совпаднат со просторот, да создадат динамика и енергија. Јас трговскиот центар го доживував како жив организам исполнет со бои, каде секој ѕид има можност за визуелна приказна.
Која реакција од публиката ти остави најголем впечаток и те охрабри да продолжиш со уште повеќе љубов кон уметноста?
Најпрвин, благодарна сум многу на раководството и вработените на Охрид Мол за нивната доверба, поддршка и искрени пофалби. Влатко и Марија по првиот мурал ми дадоа зелено светло да продолжиме со уште повеќе ѕидови, што за мене беше огромна мотивација. Нивната отвореност кон уметноста и ентузијазмот што го покажаа, ми помогнаа целосно да се препуштам на процесот - толку што дури и висината ја заборавив.
Воодушевеноста на публиката, позитивната енергијата во трговскиот, таа ми беше најголемата награда и поттик за да продолжи со уште поголема љубов и мотивација кон уметноста.
Како го опишуваш односот меѓу физичката бариера (скеле, висина) и уметничката инспирација?
Иако првично чувствував страв, љубовта кон уметноста ми помогна да го надминам. Тој однос го претворив во мотивирачка сила, каде телесната бариера се губи во креативниот процес.
Кој совет би го дала на некоја млада личност која сака да започне со уметност, но се плаши од неуспех или нема поддршка?
Низ сопственото искуство, Електра порачува: “Правете го она што го сакате до крај. Ништо нека не Ви биде пречка.”
Со тоа охрабрува младите да продолжат, без разлика на стравовите или недостатокот од поддршка, затоа што токму упорноста и љубовта водат до вистинската уметничка среќа.