Македонската компанија „Жито пром“ годината ја почна со учество на еден од најголемите саеми за слатки во светот ISM кој се одржа во Келн, Германија, а главниот производ со кој се претставија беа кроасаните 4U. Тие може да се најдат во сите поголеми маркети во земјава, но се продаваат и во Грција, Србија, Косово, Албанија, Црна Гора, Босна и Херцеговина, Хрватска, Романија, Италија, Холандија, Норвешка, Катари Бугарија.

Една од нашите цели, остварувањето на нови контакти на саемот успешно ја спроведовме. Ни пријдоа заинтересирани, потенцијални партнери од речиси секој дел од светот, поточно од околу 50 земји. Се вративме со неколку потврдени соработки и со уште повеќе во најава. Очекуваме дел од овие контакти да преминат во успешни соработки – велат од „Жито пром“.

На манифестацијата која траеше четири дена штандови имаа 1650 изложувачи од целиот свет, а ја посетија повеќе од 38.000 професионалци од оваа сфера меѓу кои и производители, дистрибутери, претставници и сопственици на ланци на маркети од различни земји итн.

Го нарекуваат најслаткиот саем на светот и земајќи го во предвид бројот на компании кои учествуваат може да се каже дека името е комплетно заслужено. Предизвик е да се истакнеш во морето на понуди, но кога имаш добар производ како што се кроасаните 4U и креативност тогаш секогаш може да се постигне посакуваниот резултат – објаснува менаџерскиот тим на компанијата „Жито пром“ од Гевгелија.

Иако претставувањето на саемот во Келн е одличен почеток на промотивните активности за годинава, компанијата планира уште многу новитети во 2018.

Ќе биде напорна година со големи промени и крупни чекори. Очекуваме отворање на нови пазари и пласман на производи во нови земји со кои дојдовме во допир преку саемот. Втората фабрика за производство на кроасани е завршена и веќе се тестираат новите линии, се засилува тимот што стои зад целата приказнаи напорно се работи сето ова да се доведе до регуларно функционирање. Има идеи и за нова линија на производи и вкусови на кроасани – посочуваат од компанијата.

Кроасаните 4U засега се произведуваат со вкус на какао, јагода, ванила и кајсија и со мешаните вкусови на какао и ванила и вишна и ванила. Сите вкусови ги има во единечна варијанта, како и во фамилијарно пакување.

Договор со „Ѓока Конструсион“ за изградба на автопатот „Руга е Арбрит“  („Патот на Арбр“), кој ќе ја поврзува Тирана со македонската граница и градот Дебар, потпиша албанското Министерство за инфраструктурата и енергетиката.

Ова е еден значаен инфраструктурен објект, кој ќе ја поврзува нашата земја со Македонија. Изградбата ќе чини 240 милиони евра. Државата мора да го отплати износот во рамките на 13 години. Автопатот треба да биде готов за 3 години, рече албанскиот министер за инфраструктура и енергетиката Дамијан Гинкури.

Ви благодариме за довербата. Конечно Владата почна да им верува на албанските компании. Нема да ви разочараме. Верувам дека ќе го изградиме навремено и квалитетно овој автопат, рекол од своја страна претседателот на компанијата „Ѓока Конструсион“, Рок Ѓока.

Новиот дел од Тирана до македонската граница, до градот Дебар, ќе биде долг 82 километри.

Македонија уште нема проект.

Со години бизнисмените алудираат за изградбата на оваа автопатска делница. Последен пат министерот за транспорт и врски Горан Сугаревски кажа дека се чека на проектната документација, па после ќе се знае кога ќе стартуваат градежните работи.

Владата ја усвои информацијата за потребата од воспоставување на единствен комуникациско – информативен систем со единствениот европски број за итни повици Е-112 во Република Македонија.

Владата го задолжи Центарот за управување со кризи во наредниот период, заедно со неколку надлежни министерства, како и институции да најде начин за обезбедување финансиски средства потребни за реализација на активностите.

Владата на 53. седница ја разгледа Информацијата за можноста за изменување на Законот за работни односи во насока на кратење или елиминирање на обврската за објава на оглас за вработување, според препораките на извештајот „Doing Business 2018“ на Светска банка, со што економијата на земјава би добила поголема функционалност.

Во тој контекст, како што се наведува во соопштението од владината прес-служба, Министерството за труд и социјална политика (МТСП), пак, на седницата го претставило негативното мислење за оваа мерка, бидејќи со евентуално кратење на роковите за пријавување на кандидати за работно место, ќе се доведе во прашање уставно утврденото право на секој човек, под еднакви услови да му е достапно секое работно место.

Дополнително, во Програмата за работа на Владата за 2018 година, предвидено е изготвување на нов Закон за работните односи, на што ќе претходи анализа и ревизија на постоечките одредби во Законот. Притоа, во утврдувањето на содржината на новиот закон ќе бидат вклучени сите засегнати страни, односно организации  на работодавачи,  синдикати,  професори, судии, адвокати, како и релевантни институции, со коишто ќе се спроведат широки консултации, а ќе се направи анализа и на оправданоста на препораката на Doing Business, со цел крајниот резултат да биде закон со современи решенија и напредни трудови стандарди, стои во соопштението.

На предлог на МТСП, Владата на денешната седница ја разгледа и ја прифати информацијата со план за имплементација на Гаранција за млади (прва фаза 2018-2019 година), како и Акцискиот план за имплементација на Гаранција за млади во три пилот општини во 2018 година.

На предлог на истото министерство, Владата го усвои и акцискиот план за вработување на млади 2016-2020-та година.