Услугите на Регионалната дирекција на УЈП во Скопје од 1 мај ќе бидат достапни само доколку даночните обврзници и сметководители имаат закажано термин за средба со даночните агенти.

Терминот ќе се закажува преку Инфо центарот на УЈП на телефонот 0800-33-000 или 02/3253-200 или преку веб страницата на Контакт центарот kontaktcentar.ujp.gov.mk.

Од Управата за јавни приходи информираат дека овој нов начин се воведува со цел подобрување на даночните услуги, намалување на времето на чекање и на метежите на даночните шалтери, навремена услуга и точен одговор за даночните обврзници.

Услугата „Закажи средба“ овозможува секоја странка да закаже термин за средба со даночен агент во УЈП - Регионална дирекција Скопје во време кое нему му одговара, според расположливите термини, а со цел консултација од даночната сфера, и тоа добивање на општи информации за рокови, начини за пријавување и плаќање даноци, отворање на бизнис и регистрација на даночен обврзник, консултации за издадени даночни документи, утврдување на даноци, постапки за наплата на долгови, правни прашања и консултација за други специфични прашања, појаснуваат од УЈП.

Доколку даночните обврзници не се во можност да присуствуваат на закажаниот термин, ќе треба да ја откажат средбата или да презакажат друг термин.

Скопје, 23 април 2018 (МИА) -  Автопатската делница Демир Капија Смоквица, по шест години изградба, ќе биде пуштена во употреба денеска, со што се добива целосно автопатско решение долж Коридорот 10 на  територијата на Македонија.

На свеченоста  се најавени обраќања на премиерот Зоран Заев, министерот за транспорт и врски Горан Сугарески и амбасадорот на Европската унија Самуел Жбогар.

На свечената церемонија ќе учествуваат претставници на Директоратот за проширување на ЕУ,  членови на Владата , претставници на локалните самоуправи низ кои поминува автопатот „Пријателство“ од Коридорот 10, претставник на централната власт на Република Грција и претставници на компаниите изведувачи на работите на оваа делница.

Новите 28,2 километри автопат од Демир Капија до Смоквица ја чинат државата 270 милиони евра. Од нив  107 милиони евра се обезбедени  со кредит од Европската банка за обнова и развој (ЕБОР), 130 милиони евра  од Европската инвестициска банка, 45 милиони евра  се грант од ЕУ, а шест милиони евра  преку Буџетот на РМ.

Има две клучки, кај Миравци и Смоквица, два тунела долги по 1.200 метри,  шест моста со должина од 100 до 500 метри, шест потпатници и два натпатника. Ширината на сообраќајницата е 25,6 метри, со две ленти за возење, една за застанување и средишен зелен појас широк три метри.

На автопатот треба да има и две патарини, кај Гевгелија и кај Демир Капија, за кои пред еден месец беше издадена градежна дозвола и се очекува да бидат завршени за околу осум месеци.

Автопатската делница ја градеше грчката компанија „Актор“, која беше избрана како најповолен понудувач на тендерот објавен во август 2011 година, на кој во потесниот избор беа и италијанскиот конзорциум „Тодини“ и турската „Мапа“.

Инфраструктурниот проект го почна претходната, а го заврши и го става во употреба актуелната власт. Шестгодишните активности на терен ги одбележаа обвинувања и критики меѓу двете гарнитури. Од СДСМ како поранешна опозиција упатуваа прашања околу изборот на „Актор“ и износот на инвестицијата, додека пак, од поранешната владејачка ВМРО-ДПМНЕ по заминување од власт минатата година ја обвинија новата Влада дека е неспособна да пушти готов проект.

Таквите тврдења беа отфрлени и беше објавено дека  пречка за пуштање на автопатот се незавршени административни постапки за да се може да се изгради контролен центар и недислоцораниот далновод на МЕПСО. Следеше одлуката на Владата во октомври лани со која со анекс на договорот за изградба,  беше продолжен рокот за завршување на автопатот до февруари годинава за да се завршат градежните зафати за далноводот и за контролниот центар. Тие активности веќе се завршени, а за пуштањето на автопатот беа направени и други законски измени.

 Специјалното јавно обвинителство (СЈО)  минатиот месец објави дека отвора истрага под име „Актор“ за изградбата на автопатот Демир Капија - Смоквица. Предметот, според СЈО, се однесува за фаворизирање на грчката компанија „Актор“ за изградба на автопатот Демир Капија - Смоквица, иако подобра понуда имала италијанската компанија „Тото“. Покрај тоа, во „Актор“ има сомненија и за перење пари.

Според најавите, во септември годинава  треба да биде пуштен во употреба и автопатот Миладиновци-Штип, за кој исто така се продолжи рокот за изградба. На терен треба да продолжат активностите за изградба на автопатот Кичево-Охрид, каде по анексот на договорот  со кој се продолжи рокот за негова изградба до 2021 година, со кинески „Синохидро“ се преговара и за дополнителна сума за активностите.

МВР вчера вечерта спроведе голема сообраќајна акција за „лов“ на возачи кои се во алкхолозирана состојба, при што извршена е контрола над 1.234 возачи, од кои дури кај 248 возачи е утврдено присуства на алкохол над дозволеното. Акцијата е спроведена од 23 часот вчера до 5 часот утрово. 

726 возачи се алкотестирани и кај 248 од нив е утврдено присуство на алкохол над дозволеното. Констатирани се и други 252 прекршоци – рече Тони Ангеловски, портпаролот на МВР

Тој најви дека Министерството за внатрешни работи ќе продолжи со вакви акции и во наредниот период, особено на територијата на Скопје.

Набавени се нови 80 дрегери за проверка на алкохол кај возачите. Апелираме до граѓаните да ги почитуваат сообраќајните правила и прописи за да ја зголемиме безбедноста во сообраќајот на патиштата – рече Ангеловски.

Граѓаните кои се оштетени од работата на извршителите и кои бараат законски измени на први мај ќе излезат на голем протест за заштита на правата на граѓаните. Протестот ќе започне пред МТВ, а ќе заврши пред Владата и Собранието на Република Македонија, па затоа сите граѓани кои сакаат да дадат своја поддршка и да го искажат револот може да се придружат на иницијативата „Стоп за извршителите“. 

На 1 Мај ги повикуваме тие што се сега блокирани и тие што биле блокирани и заради тоа биле многу онеправдани, ги повикуваме сите вработени кои одвојуваат една третина од платата, тешко спечалена и мала, ги повикуваме сите пензионери, кои исто така одвојуваат по една третина од малите пензии за извршителите, за виртуелни долгови кои им се додадени на нивните сметки, ги повикуваме тие што плаќаат заостанати долгови од пред 20 години, спротивно на сите закони, сите кои се дискриминирани и осиромашени, кои едвај врзуваат крај со крај, да дојдат на Протестен марш на 1 Мај, во 11 часот, на просторот меѓу Основен суд 1 и Македонска телевизија. Ќе поминеме покрај Собрание, покрај Министерство за правда и ќе завршиме пред Владата на РМ, рече денес Ана Глигорова од иницијативата „Стоп за извршителите“.

Неколкуте здруженија кои стојат зад иницијативата не се задоволни од предлог-законот за извршување. Тие бараат итно одблокирање на сите блокирани сметки на граѓаните и ревизија на работењето на судовите, банките, извршителите и нотарите.

Ни се случува социјален геноцид. Бараме извршителите и нотарите да се вратат во рамките на судот, а не да се богата врз грбот на нејакиот народ, кажа Глигорова.

Останува да се види дали и синдикалните и социјалните организации ќе се приклучат на овој повик.