Во 2019 година по барање на невработените лица, освен досегашните основни обуки за ИТ вештини, за првпат АВРМ ќе спроведе обуки за напредни ИТ вештини, напредни степени на странски јазици и други обуки за кои има интерес.

Покрај тоа, обезбедени се финансиски средства за обуките за невработени лица за Б, Ц и Д категорија за возачи, но се чека одлуката од Второстепениот управен суд по поднесената жалба за изборот на економски оператор од страна на останатите оператори.

За МИА, директортката на Агенцијата за вработување Билјана Јовановска истакна дека по добивањето на одлуката ќе се знае дали ќе се распише нов тендер за избор на нов оператор или ќе продолжи постапката со сегашниот економски оператор.

Во секој случај, таа нагласи дека финансиски средства се обезбедени за оваа година и истите ќе преминат во реализација во наредната година.

И покрај благиот раст на цените во последните 3 дена, нафтата и натаму е на ниво кое ни гарантира ново намалување на цените, идниот понеделник, на 26 ноември кога регулаторот ќе ја прави новата корекција.

Во моментов барел нафта од типот „брент“ на берзата во Лондон се продава за 67,5 долари, што е за нешто помалку од 5 долари поевтино од просечната цена врз основа на која Регулаторната комисија за енергетика во понеделникот ги формираше малопродажните цени.

Најниска цената беше во вторникот, кога за само еден ден се спушти за цели 5 долари по барел до нивото од 65,5 долари.

Од среда до денеска нафтата поскапи за околу 2 долари, што и натаму е цена под просекот, која гарантира пониски цени во малопродажба.

Во понеделникот сведочевме на едно од најголемите намалување на малопродажните цени во последните години. Дизелот поевтини за 3 а бензините за 4 односно 4,5 денари.

Вредноста на најпопуларната криптовалута во светот оваа недела забележа пад под 6.000 долари, што е најниска вредност на биткоинтот годинава.

Вредноста на биткоинтот во средината на неделата се намали дури за 11 отсто само во еден ден и изнесуваше 5.534 долари. Но, во текот на денот вредноста на криптовалутата се искачи на 5.680 долари. Тоа е значаен пад по повеќемесечната стагнација на нивото околу 6.000 долари.

Биткоинтот најголемата вредност од речиси 20.000 долари ја достигна во декември 2017 година.

Криптовалутата е релативно стабилна од септември кога нејзината вредност се движеше од 6.000 до 7.000 долари.

Пазарната капитализација на биткоинтот во текот на неделата забележа пад под 100 милијарди долари, првпат од средината на септември.

Властите на Исланд соопштија дека е сѐ поголем бројот на малолетни лица во таа земја кои влегле на пазарот на труд.

Според тамошните медиуми, во 2011 година платена работа извршувале 56 отсто од лицата на возраст од 17 години, а во 2018 година нивниот број се искачи на 68 проценти.

На прес-конференцијата на Обдусманот во Исланд е соопштено дека економската криза од 2008 година значително ја забавила стапката на вработеност на малолетни лица, но по кризата, на пазарот на труд е сè поголем бројот на 16-годишници и 17-годишници.

Малолетните лица во таа земја можат да работат од возраст од 13 години, а нивната стапка на вработеност секоја година се зголемува.

Според последните податоци, 13 отсто од 13 -годишниците извршуваат одредена платена работа, како и 21 отсто од 14-годишниците, 45 отсто од 15-годишниците и 59 отсто од 16-годишниците.

Најголемиот дел од малолетните лица на возраст од 14 до 17 години се вработени во секторот на трговија на големо и мало или во ресторани и хотели.