Идејата за трамвај во Скопје повторно заживеа. Градските власти го најавија овој капитален проект, за што е подготвена целосна сообраќајна студија со техничко решение.

Студијата предвидува изградба на првата фаза од трасата за трамвај на релација Ново Лисиче – Ѓорче Петров.

Реализацијата би започнала веќе следната година, а проектот ќе тежи помеѓу 130 и 150 милиони евра.

Очекувањата на властите се дека тоа ќе го унапреди јавниот превоз во главниот град и ќе влијае на намалување на аерозагадувањето.

На граѓаните им остануваат уште неколку дена да се регистрираат во системот на е-Персонален данок и да ја однесат пријавата во некоја од единиците на Управата за јавни приходи.

Сепак, според последните информации од УЈП, околу една третина од граѓаните, се уште не ја завршиле својата законска обврска. Како и секоја година, се чека на последните неколку дена.

Дел од граѓаните кои ги затекнавме денеска пред Управата, велат дека процесот за електронско пријавување бил едноставен, но поради обврски немале време да дојдат и лично да ја донесат пријавата.

Од УЈП информираат дека нема да има казни за тие што ќе го пропуштат рокот за поднесување електронска пријава.

Законот не предвидува казна за нерегистрирање во системот е-Персонален данок, но предвидува казна за даночно затајување.  Потенцираме дека системот е -Персонален данок чијашто цел е поедноставување на пријавувањето на личниот доход,  како и изготвувањето на Годишна даночна пријава од страна на УЈП, е начин физичко лице да пријави данок, велат од УЈП.

Оваа обврска нема да важи за пензионерите во наредните седум години.

Инаку, новиот систем предвидува Управата да ги изготвува годишните даночни пријави и електронски да ги доставува до секој корисник, кој пак треба да потврди дали пресметката е точна. Но, за тоа да функционира неопходно е секој граѓанин да има електронска пошта пријавена во УЈП.

Платите растат, невработеноста се намалува, полека се зголемува и активното население, а продуктивноста на трудот останува стандардно ниска и во пад.

Анализа на Народна банка на Македонија што се базира на податоците на Државниот завод за статистика покажува дека работниците во Македонија стануваат се поскапи.

На страната на понудата продолжи годишниот раст на активното население, што започна во последниот квартал од 2016 година. Сепак, показателите за конкурентноста и понатаму упатуваат на неповолни поместувања, коишто иако се поумерени, сепак и натаму упатуваат на намалена продуктивност на трудот и зголемени трошоци за труд по единица производ, констатираат аналитичарите на НБРМ.

Нивните пресметки покажуваат дека продуктивноста на трудот и понатаму е во пад, но тој е поумерен од порано. Во вториот квартал од годинава, за кога се расположивите податоци, продуктивноста на трудот на македонските работници паднала само за 0,3 проценти.

Во услови на солиден раст на додадената вредност, но при истовремено натамошен раст и на вработеноста, продуктивноста на трудот се намали за 0,3 проценти, што претставува значително забавување на падот, имајќи го предвид годишниот пад од 4,4 отсто во првиот квартал на 2018 година, се наведува во најновито квартале извештај на Народната банка.

Во извештајот се додава дека секторски анализирано, подобрените изгледи кај пазарот на труд, гледани преку значителното забавување на падот кај продуктивноста на трудот, во најголема мера се должи на значително понискиот пад во услужниот сектор. Поради зголемените плати и намалениот пад на продуктивноста во тој сектор помалку пораснале и трошоците за труд по единица производ. Тој раст изнесувал 6,1 проценти, наспроти 9,9 проценти во првиот квартал на 2018 година.

Притоа, во најголем дел намалувањето на растот кај трошоците за труд по единица производ се објаснува со понискиот раст на трошоците за труд по единица производ во индустријата и во услужниот сектор, при истовремен умерен придонес од секторот земјоделство, стои во извештајот.

Во анализираниот период НБРМ нотира и раст на активното население, односно на бројот на лица кои работат или бараат работа. Вкупното активно население во вториот квартал е зголемено за 0,2 отсто на годишна основа, со што стапката на активност е покачена на 56,9 проценти.

Телекомуникациската компанија Vip повторно излегува во пресрет на своите корисници за побрзо и поедноставно дигитално искуство со новата верзија на мобилната апликација Мојот Vip со која корисниците добиваат дополнителна можност за контрола и едноставно управување со услугите што ги користат.

Редизајнот на Мојот Vip нуди виртуелен простор во кој корисниците добиваат можност самите да управуваат со своите услуги каде и да се наоѓаат без да одат во продажните салони и без да бараат помош од контакт центарот на Vip.

Корисниците добиваат бесплатна и апликација едноставна за користење со дополнителни корисни содржини како и полесно менаџирање на сметките, увид во сметката, нејзино плаќање, проверка на остварениот сообраќај и искористеноста на пакетите, проверка на состојбата на сметката или на припејд кредитот, проверка на тарифа, договорна обврска или валидност на припејд SIM.

Користејќи го богатото искуството на А1 Телеком Австрија Групацијата чиј член е Vip, апликацијата Мојот Vip е дизајнирана според современите светски трендови и според навиките и потребите на корисниците, а за македонскиот пазар е достапна на македонски, албански и англиски јазик.

Апликацијата Мојот Vip е достапна за корисниците на мобилната телефонија  во сите сегменти, пост пејд, при пејд како и деловните корисници и е бесплатна преку Google Play и App Store за поновите верзии на Android и iOS уреди.

Апликацијата Мојот Vip е уште еден доказ за посветеноста на компанијата кон дигитализација на процесите што придонесува кон обезбедување на супериорно дигитално корисничко искуство и развој на дигитално општество во целина.