На вчерашниот состанок на Комисијата за заразни болести при Министерство за здравство донесени се нови дополнителни мерки за заштита на населението од епидемијата на морбили.

Сите родители кои имаат деца со наполнети 6 месеци, а живеат на територијата на градот Скопје, од утре треба да се јават во најблискиот вакцинален пункт за да ги вакцинираат своите деца со МРП-вакцината. Родителите, пак, кои имаат деца на училишна возраст, а не се ревакцинирани или воопшто не примиле МРП- вакцина, да ги вакцинираат децата, и ова се однесува за сите деца кои живеат во Македонија. Комисијата му предложи на Министерството да се почне со теренска вакцинација.

Родителите кои ќе се посомневаат дека нивните деца се заразиле со морбили или имаат висока температура или, паК, веќе имаат осип на кожата прво да се јават на преглед во пунктови во здравствените домови и по проценка на лекар од пунктовите, само со упат да се насочуваат кон Клиниката за инфективни болести и фебрилни состојби, се вели во препораките.

За да се намали притисокот од пациенти на Клиниката за детски болести и Клиниката за Инфективни болести и фебрилни состојби, граѓаните се упатуваат во трите пунктови во поликлиниките „Јане Сандански“, „Бит-пазар“ и „Ѓорче Петров“. Во овие пунктови има дежурни лекари кои работат секој работен ден од 19:30 часот до 7:30 наутро, а за викендите се на располагање 24 часа во текот на денот.

Во работните денови, родителите треба децата прво да ги однесат на матичен лекар. На овие три места ќе се вршат комплетни прегледи со лабораторија на децата чии родители ќе се посомневаат дека можеби се заболени од морбили (мали сипаници). Доколку лекарите утврдат дека е потребно, пациентите ќе ги упатуваат на Клиниката за инфективни болести и фебрилни состојби. ,,Апелираме до сите родители кои ќе забележат или ќе се посомневаат на првите знаци на болеста, висока температура, децата прво да ги однесат на овие три пунктови”, се вели во соопштението.

На средбата е констатирано дека вакцините кои се аплицираат во сите здравствени домови се со проверен квалитет, од европски производител и имаат добар рок на траење. Комисијата укажа дека само со колективен имунитет, или 95 отсто вакцинирано население со МРП-вакцината, ќе може да ја спречиме епидемијата и смртноста кај населението, кај најранливата категорија, децата кои воопшто не примиле вакцина поради возраста или поради некои други хронични заболувања. Сите преТходни мерки кои ги донесе Комисијата сѐ уште се на сила.

Тоа значи дека децата кои не се вакцинирани со МРП нема да се примаат во градинките, се апелира за интензивна и неодложна вакцинација на децата кои се во добро здравје за да се подигне колективниот имунитет. Да се вакцинираат сите здравствени работници кои имаат непосреден контакт со пациенти заболени од морбили. Најстрого се забранува и посета на болни во сите здравствени установи.

„Потсетуваме, морбилите се високо заразно заболување кое лесно се пренесува по капков пат. Едно лице со морбили (мали сипаници) може да зарази 9 од 10 лица околу него кои не се вакцинирани. Досега се вакцинирани 6.276 деца само во Скопје, а пред прогласувањето на епидемијата во населбата Радишани, на 19 декември годинава, беа регистрирани околу 15 илјади невакцинирани деца со МРП-вакцина. Родителите треба многу сериозно да ги сфатат насоките и од Комисијата за заразни болести и да ги почитуваат препораките на Министерството за здравство.

Потсетуваме дека покрај вакцинацијата, не постои друг лек во светски рамки кој е познат на медицината базирана на докази. Со апстиненција од вакцинација, родителите го доведуваат своето дете во огромен ризик. МРП-вакцината е со одличен квалитет, од европски производител, има добар рок на траење и поседува два сертификати за квалитет. Апел до родителите да ги вакцинираат децата, само така ќе ја спречиме епидемијата и ќе заштитиме некое друго дете од зараза и смрт поради компликации од морбилите”, се додава во соопштението.

Според „Голд брокер“, Македонија во моментов го дели шестото место со Ангола во светот според стапката на невработеност.

Недостижен на врвот е Конго со 46 отсто, втора е Босна и Херцеговина со 35 отсто, а трето Косово со 30 отсто.

Пред Македонија се само уште Јужна Африка со 27 отсто и Нигерија со 23 отсто.

Веднаш зад Македонија следуваат Грција и Јордан со по 18,6 проценти, Боцвана со 18,1 отсто, Либија со 17,7 отсто, Етиопија со 16,8 отсто, Оман и Руанда со по 16 отсто, Тунис со 15,5 отсто.

Косовскиот и албанскиот премиер, Рамуш Харадинај и Еди Рама добиваат највисоки плати во регионот во споредба со колегите од другите земји. 

Овој податок се наведува во извештајот на Светска банка.

Српската премиерка, Ана Брнабиќ е со најниска плата во регионот. Нешто повисока плата од неа имаат премиерите на Македонија, Зоран Заев и на Црна Гора, Душко Марковиќ.

„Шефот на косовската Влада, Харадинај има највисока плата или 2.950 евра. Веднаш по него, според висината на месечната плата е неговиот албански колега Рама, со 1.700 евра. Наспроти тоа Албанија и Косово се со најниски просечни месечни плати на Балканот, кои се пониски дури петпати од премерските плати“, наведуваат албанските меиуми.

Брнабиќ има најниска плата во регионот, односно 1.000 евра, додека македонскиот премиер Заев има месечна плата од 1.300 евра, а претседателот на црногорската Влада, Марковиќ има месечни примања од 1.130 евра.

Министерката за правда Рената Дескоска ја активираше новата тарифа за награда и надоместок на трошоците на извршителите, со што се очекуваат помали трошоци, главно кај граѓаните, на основниот долг на неплатените сметки.

Наградата за платен налог за предмети кои започнуваат да се работат од почетокот на оваа недела, а кои се однесуваат за побарување за неплатени сметки до 100 евра за струја, парно, кабелски оператори, телефон, одржување на заеднички простории се наплаќа само 2 евра. Со старата тарифа тоа можеше да чини 14,5 евра за администрирање и награда. Од 100 до 200 евра наградата е 5 евра по новиот тарифник кој стапи на сила во петокот, а над 200 евра е 10, додека по старо можеше да чини и над 20.

Извршни исправи доколку станува збор за судски одлуки и решенија на државни служби и претпријатија се наплатува 6, 5 евра ако основниот долг е до 100 евра, а ако е од 100 до 300 тогаш тој изнесува 10,5 евра.

Кај поголемите суми нема голема разлика во однос на стариот правилник донесен пред три години. Така, за побарувања до 3.000 евра сега наградата е 7,5 отсто од основниот долг, додека претходно беше 8 проценти плус 30 евра за администрирање.

Поголема разлика има во изготвувањето на налогот за извршување од платата на самото работно место на должникот или над неговата трансакциска сметка во банка. Претходно тоа ги чинеше граѓаните 20 евра, а сега е само 2 евра кога станува збор за неплатени долгови за телен, струја, парно, станување, телевизија и др. Доколку станува збор за друг тип на долг, интервенцијата ќе го чини физичкото лице 6 евра.

Истовремено стапи и тарифата за нотарите, кога станува збор за извршувањето на долг, па така нивната награда не може да биде повисока од 500 денари, ниту за долгови и над 1.000 евра кога по старо би изнесувале 35 евра.

Новата тарифа влегува како подзаконски акт за измените на Законот за нотаријат и на Законот за извршување, донесени претходно од Собранието на Македонија. Во меѓувреме, додека траеше дебатата, министерката Дескоска направи дополнителни компромисни решенија со извршителите, а невладините организации критикуваа дека и понатаму ќе останат високите камати кои тие им ги наметнуваат.