Со години наназад транвајот се најавува како алтернативен јавен превоз низ градот. За време на мандатот на скопскиот градоначалник Трифун Костовски изградбата на трамвајска линија беше веќе готова работа.

Тогаш беше најавено дека првиот промотивен трамвај од Аеродром до Центар ќе тргне во мај 2009 година. Исто така трамвајска линија беше ветена и од градоначалникот Коце Трајановски , чија идеја беше на трасата на која ќе се движи трамвајот, да не соообраќаат автобуси. Според студијата требаше да има  22 транвајски композиции. Во првиот период требаше да има една линија од населбите Ново Лисиче до Ѓорче Петров.

Метежот по скопските улици, проблемот со паркирањето но и рекордната загаденост предизвикуваат стрес и нервоза кај сите учесници во сообраќајот.

Пред извесен период градоначалник Петре Шилегов ги слушна предлозите на граѓаните како да се намали загадувањето во главниот град. Поранешни функционери, инженери, засегнати граѓани ги образложија студиозно своите идеи и предлози како да се намали загадувањето во главниот град.

Дел од препораките на 40 тината граѓани кои се одзваа на повикот од градоначалникот беа во Скопје конечно да се направи трамвај, да се обезбеди гас но и да запрат градежните активности. 

Трамвајот ќе минува низ строгиот центар на Скопје, а улицата „Димитрие Чуповски“ кај „Рекорд“ ќе биде затворена за возила. Првата линија ќе почнува во Ѓорче Петров, ќе се движи по „Партизанска“, ќе врти на булеварот „Климент Охридски“ и ќе излегува во централното градско подрачје. Покрај Собранието, Црвениот крст и „Веро центарот“ ќе се движи кон Аеродром и ќе завршува во Ново Лисиче, каде што е треба да се гради и депо.

Решавањето на јавниот превоз на патници со една трамвајска линија, за која градоначалникот вели дека ќе ги замени 40 отсто од автобуските линии, градските власти идната година ќе го работат паралелно со проектирање на северен сообраќаен прстен. Еден од најважните булевари кои треба да се почнат да се градат е „Хрватска“, кој од населбата Автокоманда, кај клучката „Дијамант“, ќе треба да ја заобиколува населбата Железара и да се спои со булеварот „Босна и Херцеговина“, кој во моментов се проширува. Тој е поврзан со булеварот „Словенија“, и ќе претставува брза врска на источниот и западниот крај на Скопје. Тоа, според Шилегов, ќе треба да обезбеди услови граѓаните и возачите да не го почувствуваат затворањето на центарот за возила.

Градоначалникот на Скопје, Петре Шилегов, изјави дека во моментов единствената дилема околу трасата на трамвајот е дали тој да се движи по средината на булеварите или, пак, по крајните десни линии. Проектот направен од експертите на „Загрепски електричен трамвај“ (ЗЕТ) ги предвидува и двете варијанти, а која ќе биде избрана ќе се знае до крајот на јануари. Опцијата трамвајот од зградата на Народната банка кон центарот да продолжи по кејот на Вардар е отфрлена, со образложение дека на влезот на плоштадот „Македонија“, кај зградата на „Телеком“, нема доволно место за изградба на пругата.

„Проектната документација ќе се заокружи во текот на идната година, а изградбата ќе започне истовремено од двете почетни позиции во Ново Лисиче и во Ѓорче Петров. Со оглед на тоа дека технологиите се многу напредни, сите производители нудат возила кои можат до два километри да се движат без електрична мрежа. Тоа за нас ќе значи сериозна заштеда во изградба на мрежата, но ќе значи и дека низ центарот на Скопје нема да висат кабли“, изјави Шилегов.

Изградбата на една трамвајска линија, заедно со депото, според првичните проценки би чинела меѓу 130 и 150 милиони евра. Обезбедувањето на финансиите ќе се бара преку европските фондови или од државниот буџет.

Првиот трамвај во Скопје

Знаете ли дека првиот трамвај во Виена се појавил во 1864 година, а Скопје имало трамвај во 1884 година? Тоа не е голем временски интервал, бидејќи Скопје многу брзо фатило чекор со Европа. Тоа се сознанија кои трамвајот во нашиот град временски го поместуваат многу поназад. Како се случило тоа вистинско чудо за скопјани, односно појавата на трамвајот?

За тоа придонел случајот, но и богатството што го поседувале браќата Шабан-паша, сопственици на една од првите мелници во Скопје. Нивните имиња се Беќир Емин, Реџеп Емин, Осман Емин, Сулејман Емин и, најстариот и најпознатиот од нив, Шабан-паша Емин. Едниот од браќата Сулејман Емин тешко се разболел, а браќата веднаш го однеле на лекување во Виена. Таму првпат виделе трамвај, многу им се допаднал, и веднаш решиле таков модел да донесат во Скопје. Трамвајот бил и спомен за нивниот болен брат, кој наскоро починал. Во Скопје настанале големи турканици за да се дојде до билет за трамвајот. Тој бил вистинска сензација. Сообраќал од Идадија и Дебар маало, кон центарот.

Тој не се разликувал од европските трамваи, бидејќи оттаму бил донесен. Најпрвин се движел на шпедитерски тркала, а подоцна на шини, влечен со коњска сила. Хроничарите на тоа време велат дека настанувале многу комични ситуации. Кога ќе се изморел, коњот легнувал среде патот за да се одмори. Патниците чекале, возачот на трамвајот пушел цигара и си правел муабет со минувачите. На светски познатите фотографии може да се види дека слични трамваи сообраќале и во Њујорк во 1893 година. Но наскоро Скопската општина станала љубоморна на браќата, и решила самата да воведе трамвај.

Општината никако не можела да се договори од каде ќе бидат купени шините, а еден службеник, кој за таа цел заминал за Истанбул, ги проневерил парите. Така, во Скопје официјално трамвајот постоел сè до 1912 година, а подоцна функционирале само некои негови делови, главно за превоз на службениците до каменоломот во Кисела Вода. Во 1903 година, во Виена веќе бил воведен електричен трамвај.

Во Скопје се обновува и заштитува постојното и се подигнува ново зеленило. За само една година екипите на Град Скопје реконструираа 129.000 квадратни метри, а засадени се над 8.000 висококвалитетни садници на повеќе локации во градот.

Градските власти велат дека акцент бил ставен на засадување нови дрвореди и обновување на постојните. Од оваа година Скопје е побогат и за неколку нови паркови.

Нови паркови во Скопје

Екипите на Град Скопје работат на хортикултурно уредување на зелен плоштад на булеварот „Гоце Делчев“, на просторот зад Филхармонија. Во овој дел, на површина од 7.300 квадратни метри ќе се постави хидрантска мрежа и ќе се засадат стотина висококвалитетни листопадни садници.

Со зеленило ќе се уреди и дворот на Министерството за култура. Зелената површина од 300 квадрати ќе ја разубават 20 висококвалитетни листопадни садници.

На просторот кај последната постојка на автобусот со број 41 во Драчево никна нов парк, на местото каде што до неодамна имаше дива депонија. На површина од околу 5.500 квадратни метри се засадени 200 висококвалитетни садници и е поставена нова хидрантска мрежа со прскалки, шахти и хидранти. Во паркот ќе се постават и нови клупи и корпи за отпадоци.

Финскиот парк во населбата Ченто е реконструиран и хортикултурно уреден на површина од околу 13.000 квадратни метри. Во паркот е подигнат нов тревник и за првпат е поставена хидрантска мрежа со прскалки, шахти и хидранти.

Уреден е и паркот до Градежниот факултет, на булеварот „Партизански одреди“. Реконструирана е јавна зелена површина од 2.149 квадратни метри и е поставена хидрантска мрежа со хидранти, шахти и систем за полевање со прскалки.

Градскиот трговски центар ќе добие зелен покрив

Минатиот месец градските власти најавија дека Градскиот трговски центар (ГТЦ) ќе добие зелен покрив. На зелениот покрив со површина од 1.800 квадратни метри ќе бидат засадени 29 висококвалитетни дрвја и повеќе од 30 други видови садници. Ќе бидат поставени неколку водени зони во форма на фонтани и базени, монтажна бина, партерно шаховско поле, кафе-бар, модерна урбана опрема од клупи, корпи за отпадоци и паркинзи за велосипеди. Се очекува во текот на летото граѓаните да можат да го употребуваат овој покрив. За проектот се обезбедени околу 32 милиони денари.

– ГТЦ е симбол на модерно, постземјотресно Скопје. Со проектот „Зелен покрив на ГТЦ“ финансиран од Град Скопје и имплементиран со поддршка на нашите пријатели од УНДП, постојниот покрив кој сега е речиси неискористен ќе стане атрактивен простор со зелена површина за одмор, рекреација и културно-забавен живот. Освен во урбаниот развој на градот, овој проект ќе придонесе и за намалување на температурата во централното градско подрачје преку намалување на ефектот на урбаните топлински острови, подобрување на квалитетот на воздухот и управувањето со врнежите, изјави минатиот месец Шилегов.

Зазеленувањето на покривот на ГТЦ е дел од проектот со кој Програмата за развој на Обединетите нации (УНДП) ќе го поддржи Градот Скопје во спроведувањето на Стратегијата за климатски промени – Отпорно Скопје.

Зелен катастар

Во јануари годинава Град Скопје и УНДП го презентираа проектот за Зелен катастар на јавните зелени површини во градот. Основна цел на овој проект е заштита на животната средина, подобрување на управувањето со јавното зеленило и собирање и анализа на податоци за зеленилото. Досега се попишани 65.844 дрвја и 28.395 грмушки во парковското и во булеварското зеленило.

Во рамките на проектните активности, реализирана е првата фаза што опфати геодетско снимање на 650 хектари површини на јавно зеленило, изработка на веб апликација за управување со јавното зеленило и мобилна апликација за попис на дрва и грмушки на терен. Во следната фаза ќе се реализира теренското собирање податоци за дрвјата и грмушките на јавните зелени површини на територијата на Град Скопје.

Преку оваа апликација граѓаните имаат можност активно да учествуваат во подобрувањето на урбаната отпорност на Град Скопје преку внесување на податоци/атрибути за зеленилото – дрвјата и грмушките кои се наоѓаат на нивниот имот. Понатаму ќе бидат процесирани од стручните лица на Град Скопје и ЈП „Паркови и зеленило“ и ќе бидат дел од зелениот катастар.

Воспоставувањето на Зелениот катастар на Град Скопје е дел од проектот ИКТ за урбана отпорност, реализиран во соработка со Програмата за развој на Обединетите нации (УНДП).

Целосно уредување на вториот дел од Градскиот парк

По седумдесет години целосно ќе се уреди вториот дел на Градкиот парк, од хотелот „Александар Палас“ до Луна паркот. Годинава е предвидено да се засадат нови 12 илјади садници. Ова неодамна го најави директорот на ЈП „Паркови и зеленило“ Ардијан Муча.

Минатогодишниот буџет за животна средина на Град Скопје беше дотогаш најголемиот буџет издвоен за оваа намена. За 2019 година, пак, се предвидени 186,2 милиони денари што е 30 отсто зголемување од минатата година.

Ќе им пружи ли достоинствен живот новата мерка која се крчка?

Дали социјалната пензија ќе биде доволна или тешко со неа ќе имаат егзистенција пензионерите?

Ова прашање го поставуваат многумина а од Здружението на пензионери на Македонија посочуваат дека вака тешко ќе се оставрува достоинствен живот за категоријата граѓани за кои е наменета.

За кој ќе важи социјалната пензија:

Сите граѓани кои се постари од 65 години, кои не ги исполниле условите за пензија и не работеле ниту ден, оваа година ќе добијат државна пензија.

Тоа нема да се однесува на оние кои се во брак или живеат во вонбрачна заедница, а чиј партнер веќе ужива пензија. Таа категорија граѓани, според Владата , не е социјално загрозена и нема да може да добива социјална пензија.

Законот за социјална сигурност на постари лица стигна во Собрание и за него ќе се гласа по скратена постапка. Имено, со него е пропишано државната социјална пензија да изнесува 6000 денари месечно или (96,7 евра) и еднаш годишно да се усогласува со трошоците на живот.

Услов за добивање на оваа пензија е лицето да биде државјанин на Северна Македонија и во земјава да живее во последните 15 години.

За првиот човек на ЗПМ Драги Аргировски без најмалку 12.000, 13.000 или 14.000 денари пензија тешко ќе може да се остварува еден достоинствен живот за пензионерите.
foto: The Financial Planning Group

Возачите повеќе нема да бидат обврзани да плаќаат за налепници дека нивните возила се регистрани. Министерството за внатрешни работи заклучи дека таков билет претставува дополнителен трошок за граѓаните, а во исто време не му помага на полицајците да се утврди дали или не возилото е регистрирано. 

Сите центри за техничка контрола се информирани за оваа одлука. објави Алсат.

Известувањата се испратени до сите центри за техничка контрола, тие да не се користат повеќе. Полицијата може да ја провери регистрацијата во сообраќајната дозвола - рече Тони Ангеловски, помошник-министер за внатрешни работи.