Како и секоја година, на затворањето на фестивалот „Синедејс“ беа прогласени најдобрите и им беа доделени  награди. Оваа година, наградите ги освоија:

Филмот „Влажност“ во режија на Никола Љуца е добитник на наградата најдобар филм и „Златна ѕвезда“ во Oфицијалната конкуренција на Фестивалот на европски филм „Cinedays 2016“.

Наградите ги прогласи жирито во состав Чедомир Колар, еден од извонредните продуценти во холивудската индустрија и претседател на жирито, Зринко Огреста, сценарист и режисер, професор по филмска режија на Академијата за драмски уметности во Загреб и член на Европската Филмска Академија во Берлин и македонскиот режисер Игор Иванов – Изи.

Наградата за најдобра режија ја доби филмот „Убијци на тркала“ во режија на Атила Тил, а за најдобро сценарио филмот „Тони Ердман“ по сценарио и режија на Марен Аде.

Во категорија СинеБалкан за најдобар филм во оваа категорија е прогласен филмот „Не ми зјапај во чинијата“ на Хана Јусиќ. И годинава селектор на филмовите во официјалната селекција и во категоријата „Синебалкан“ беше Бернд Будер.

Доделена е награда и за најдобар филм во категоријата Студентска програма, која ја доби Сандра Јовановска за филмот „Страшилото крст“. Таа е студент на Академија за уметност, Универзитет во Нова Горица.

Жирито во состав, Влатко Галевски, Илина Јакимовска и Виолета Караџовска – Стојанова ги прогласи најдобрите на конкурсот за Филмска критика. Првата награда ја доби Фросина Крушкаровска, втората награда е за Владимир Лазороски, а третата награда и припадна на Вероника Камчевска.

На 1ви Декември 2016 година, со почеток во 12:00 часот, во ИНФО-КЛУБОТ во Битола (Ректорат на Правен Факултет во Битола) ќе се одржи саем за Кариера.

Настанот ќе вклучува штандовска презентација на компании кои нудат слободни работни места за млади невработени лица, кратки презентации (говори) од претставници на иновативни бизниси од Македонија и интерактивни работилници за мотивација на млади да започнат сопствен бизнис.

Настанот е отворен за сите заинтересирани млади невработени лица и студенти. KARIERA.mk ќе има своја презентација и излагање за посебните можности кои им се нудат на младите лица. 

Светско жири составено од дами специјализирани за автомобилизам го избра Jaguar F-Pace за автомобил на 2016 година. Моделот на британската марка победи и во категоријата на теренски возила. Со тоа се потврдува дека на дамите им се допаѓа чувството на безбедност што им го нудат теренците, но и марката и пораката за активен животен стил што ја оддава F-Pace не заостануваат во критериумите.

Дамите го избраа Jaguar F-Pace како автомобил што најмногу ги разиграл нивните срца од сите новитети годинава. Во составот на жирито за избор на женски автомобил на годината влегуваат 17 дами специјализирани за автомобилизам, кои доаѓаат од 14 држави. Во категоријата спортски теренци и кросовери не постоеше друг автомобил што им остави посилен впечаток на дамите.

Во останатите категории победија Honda Civic (мал семеен автомобил), Ford Mustang (спортски автомобил), Honda Jazz (најекономичен автомобил), Volvo S90 (луксузен автомобил) и Toyota Prius (најеколошки автомобил).

За изборот беа кандидирани 294 модели, од кои на 32 им беше дозволено да продолжат во финалниот избор.

Според податоците на Државниот завод за статистика на Македонија, најниски плати се во секторот рибарството и аквакултурата, каде просечна бруто плата им е 16.933 денари, па следуваат вработените во индустријата за производство на кожа со 17.078, луѓето кои работат на одржување на згради/животна средина/природа со 19.707 и луѓето вработени во производство на мебел со 19.982 денари.

За споредба најплатените професии во Македонија се компјутерско програмирање со бруто плата од 74 971, правни и сметководствени дејности со 68 481, воздушен сообраќај 63 469 и фармација со 62 786 денари.