Горивата пред Нова Година поскапеа од половина до еден денар по литар, одлучи денеска Регулаторната комисија за енергетика (РКЕ). Со одлуката се врши зголемување на малопродажните цени на нафтените деривати во просек за 1,28 отсто.

Малопродажната цена на бензинот ЕУРОСУПЕР БС-95 се зголеми за еден денар по литар и ќе изнесува 68,5 денари. Малопродажните цени на бензинот ЕУРОСУПЕР БС-98, ЕУРОДИЗЕЛ (Д-Е V) и на Екстра лесното масло за домаќинство (ЕЛ-1) се зголемуваат за половина денар по литар и сега ЕУРОСУПЕР БС-98 ќе чини 70,5 денари, ЕУРОДИЗЕЛ (Д-Е V) 63, а Екстра лесното масло за домаќинство (ЕЛ-1) 52 денари за литар.

Со одлуката на РКЕ за 0,904 денари по килограм се зголемува и малопродажната цена на мазутот М-1 НС и ќе изнесува 38,243 денари.

Како причина за зголемувањето на малопродажните цени на нафтените деривати од РКЕ ги посочуваат зголемените референтни цени на нафтените деривати на светскиот пазар во изминатите седум дена и тоа кај бензинот во просек за околу 1,68 отсто и за околу 1,01 отсто кај дизелот, како и за 0,44 отсто повисокиот курс на доларот во однос на денарот.

По Бадник и Божиќ следи нова промена на цената.

Првото коло од наградната игра поврзана со скенирањето фискални сметки претпразнично им донесе среќа на петнаестмина кои се израдуваа на парична награда од по 100 000 денари.

Најголеми среќници од синоќешното извлекување се Скопјанци, по двајца Велешани и Штипјани, а по една парична награда израдува житечи на Кочани, Кавадарци, Битола, Вевчани и Крива Паланка.

Имињата на среќниците може да ги погледнете подолу.

На дневно ниво пак се влечат награди од 1000, 2000 и 3000 денари а дали вие сте добитник може да проверувате на сајтот на Државна лотарија тука.

Јавното претпријатие за јавни паркиралишта „Паркинзи на Општина Центар” донесе Одлука за усвојување на новиот Ценовник на услуги и надоместоци на јавните паркиралишта со кои стопанисува. Зголемувањето на цените на паркинзите се воведува за како што велат да се намали бројот на паркирани возила во централното градско подрачје и да им овозможи на жителите похумани услови за живеење.

Во Општина Центар живеат повеќе од 45.000 жители кои секојдневно се соочуваат со сериозен проблем со паркирањето и поминуваат по неколку часа во нивните автомобили барајќи слободно паркинг место. Со цел да им се овозможи на жителите полесен и побезбеден пристап до нивните домови, од 8 јануари 2020 година, цените за паркинг за 1 час на комерцијалните паркиралишта со кои стопанисува ЈП Паркинзи на Општина Центар ќе се покачат за 20 денари, се вели во соопштението од јавното претпријатие.

Ова покачување се однесува само за паркиралиштата со наплата, додека цените за месечниот билет, дневната паркинг карта и останатите услуги на ЈП ПОЦ остануваат исти. Жителите на Општина Центар и понатаму ќе можат бесплатно да ги користат комерцијалните паркиралишта и монтажните гаражи со кои стопанисува ЈП Паркинзи на Општина Центар.

Одлуката за усвојување на новиот Ценовник на услуги и надоместоци на јавните паркиралишта со кои стопанисува претпријатието, донесена од Управниот одбор на ЈП Паркинзи на Општина Центар, едногласно беше изгласана од советниците на сите политички партии на последната седница на Советот на Општина Центар, додаваат тие.

ЈП Паркинзи на Општина Центар апелира до сите граѓани кои не се жители на Општина Центар да ги остават своите автомобили и да го користат повеќе градскиот и  алтернативниот превоз (велосипеди, електрични тротинети и т.н.) со кој значително ќе се реши сериозниот проблем со паркирањето во Општина Центар, како и проблемот со загадувањето на воздухот и животната средина.

Новонасадените јапонски цреши на улицата Максим Горги во центарот на градот станаа место каде што се фрлаат отпушоци и друг вид отпадоци. Иако се крена голема врева кога старите цреши беа исечени, сега пак, кога се засадија нови тие не се почитуваат и стануваат место за отпад.

Првозасадените цреши беа исечени затоа што беа болни од тоа што некој во нивниот корен истурал отпадна вода со хемикалии. Јасно е дека продолжува непочитувањето на комуналните правила и непочитувањето на природата. Кога градот има енормен недостаток од зеленило и кога се вложува во него посебно во вака вредни садници тогаш навстина е крајно нецивилизирано тоа некој да не го почитува и да го уништува. 

Јапонските цреши, посебно во нивниот период на цветање, станаа своевиден симбол на центарот на градот а посебно на улицата Максим Горки која буквално беше наjфотографираната улица во градот во тој период.