Данска, Шведска и Норвешка се земји кои се најдобри за растење на деца. 

Рангирањето го направи Универзитетот во Пенсилванија. 

Данска е прогласена за најдобра држава за одгледување на деца. Таа е „многу дарежлива кога станува збор за породилното отсуство на мајките и татковците” и има одличен здравствен и образовен систем. 

Зад неа се најдоа Шведска и Норвешка, поради фактот што имаат добри социјални програми и ниска стапка на криминал.

Во топ пет се и Канада и Холандија, а понатаму на листата следат Финска, Швајцарија, Нов Зеланд, Австралија и Австрија.

Рангирањето се прави четврта година по ред. 

Казахстан, Либан, Гватемала, Мјанмар, Оман, Јордан, Саудиска Арабија, Азербејџан, Тунис и Гана се земји каде е најлошо да се одгледува дете.

Грција е 21-ва, Хрватска е 24-та, Словенија е на 31-то место, Бугарија 42-ра, Србија е 62-ра, а Македонија ја нема на листата. 

Брисел планира да воведе заедничка европска минимална плата. 

Данска, Шведска и Финска немаат минимална плата. Наместо тоа, за платите се преговара директно меѓу синдикатите и работодавачите – т.н. систем на колективно договарање – и обично се повисоки отколку во повеќето други земји на ЕУ.

Европската комисија ќе се обиде да ги убеди скептичните северни земји во Унијата да ја поддржат иницијативата. Тоа го најави Николас Шмит, комесар на ЕУ, одговорен за работни места и социјални права.

Тој рече дека започнале консултации за планот на Комисијата за борба против експлоатацијата на евтина работна сила во Европската унија и фактот дека во многу земји во Унијата  работниците добиваат значително пониски плати за одредени професии отколку во други земји.

Соседна Албанија е заинтересирана да ја примени мерката „Мој ДДВ“ која кај нас се реализира веќе неколку месеци а од чие скенирање фискални сметки на трансакциите на граѓаните во декември легнаа и првите парични средства за првото тримесечие.

Дека Албанија по наш приемер сака да се обиде да ја намали сивата економија, станува јасно од средбата на директорката на УЈП со директорката на даночната администрација на Република Албанија, Делина Ибрахимај, на која Лукаревска и го пренела искуството кое го носи мерката.

Делина Ибрахимај е на ставот дека и кај нив оваа ерка може да допринесе да се намали сивата економија која е на ниво од 30%.

Имено, во февруари треба да почне исплатата на скенирани сметки за второто тримесечие а мерката продолжува и во 2020 година

Собранието по скратена постапка ги усвои измените во Законот за извршување, со кои, меѓу другото, се доуредува постапувањето на извршителите. Како што соопшти министерката за правда Рената Дескоска преку „Фејсбук“, Законот за извршување е одраз на реалната потреба за помош и поддршка на загрозените категории на лица кои се соочуваат со егзистенцијални проблеми, но и на социјално ранливите групи на лица, кои не по своја вина не се во можност да го намират своите долгови без да им се загрози егзистенцијата, не само лична, туку и на нивните семејства.

Со измените:

Целосно се изземаат од присилното извршување примањата на граѓани кои се корисници на гарантирана минимална помош од социјалната заштита, примањата на децата согласно Законот за заштита на децата, како и примањата за социјална сигурност на старите лица, согласно прописите за социјална сигурност на старите лица.

Дополнително со измените се намалува износот на максималната вредност која може да биде задржана односно се менуваат ограничувањата на извршувањето и тоа од 1/3 на 1/5 од плата и пензијата за лицата приматели на просечна плата и пензија, надомест на трошоци за сместување на лице и надоместок за згрижување на згрижувачко семејство, како и за децата корисници на семејна пензија.

Примената на законските одредби се однесува и за веќе започнатите извршувања како поповолен закон за граѓаните.