Владата планира недела да биде прогласен за неработен ден за сите, а работниците да се плаќаат по час. Токму работењето прекувремени саати, работа на празници и во недела, се забелешките кои работниците ги изнесувале како проблеми со кои се соочуваат на средбите со претставници од Министерството за труд и социјална политика. Ваквите барања доаѓаат од работниците кои имаат најниски плати во земјава како што се текстилните работници, вработените во супермаркети, трговски центри и градежни работници.

Во Министерството за труд и социјална политика се размислува да се донесе ново законско решение со кое ќе бидат решени овие прашања. Токму тоа вчера го навести вицепремиерката за економски прашања, а поранешна министерка за труд и социјална политика Мила Царовска, на дебата на СДСМ во Штип.

„Недела неработен ден и плаќање по час се новите предизвици на коишто треба да работиме идниот период. За ова ќе мора да дебатираме со бизнис секторот и со синдикатите. Сите заеднички да ја донесеме одлуката што ќе биде најдобра за сите“, рече Царовска.

Истражувањето на здружението на граѓани „Гласен текстилец“ во кое биле опфатени 870 испитаници, покажува дека 70 отсто од нив работат прекувремено, 59,3 отсто работат над 50 часа неделно, а само 11,3 отсто се изјасниле дека не работат на празници и за викенд.

„Вработените во текстилните фабрики, трговските центри, во супермаркети, градежните работници имаат право на одмор еден ден во неделата. Сега тоа не е случај, недела е работен ден за голем број граѓани. Владата мора да донесе политичка одлука, како што направи со зголемување на минималната плата и во Законот за работни односи недела да биде неработен ден и да се најде систем како работниците да се плаќаат по час. Кога веќе се стремиме да станеме членка на Европската унија, треба да носиме и европски закони во кои работниците ќе имаат повеќе права“, вели Кристина Ампева активистка во здружението „Гласен текстилец“.

Град Скопје на фејсбук објави фотографии со новите заштитни столпчиња на улицата спроти Сити Мол.

„Екипи на ЈП „Улици и патишта“ деновиве поставија заштитни столпчиња на улицата „Манапо“ спроти Сити Мол. Со поставените столпчиња се става крај на непрописно паркираните возила на овој потег“, велат од Град Скопје.

Ова значи дека тие што ќе сакаат да одат на шопинг во овој популарен шопинг центар, веќе нема да можат своите автомобили да ги паркираат бесплатно на околните локации.

Дизелот и екстра лесното масло за домаќинство од понеделникот на полноќ поевитинија за 1,5 денари, цената на бензините остана непроменета.

Новата цена на Дизелот изнесува 61 денар за литар, на екстра лесното масло за домаќинство 50 денари за литар. Еуросупер БС 95 се продава и неделава по цена од 68 денари за литар и Еуросупер БС – 98 по 70 денари за литар.

Малопродажната цена на мазутот се намали за 2,539 денари за килограм и ќе изнесува 37,885 денари.

По викендот не чека нова промена на цените на горивата, како и секој понеделник во неделата.

Израелската авиокомпанија „Изрер“ ќе воведе сезонски летови меѓу Тел Авив и Скопје претстојното лето, како резултат на разговорите меѓу израелските и македонските власти во ноември минатата година.

Авиопревозникот ќе лета два пати неделно меѓу главните градови на двете земји секој четврток и недела, почнувајќи од 11 јуни, а според „Рутс онлајн“, ќе се користат авиони „Ербас А320“ со 180 седишта.

„Изрер“ е трета по големина авиокомпанија во Израел по „Ел Ал“ и „Аркиа“, а веќе со успех дејствува на блиските пазари, како Црна Гора, Србија и Албанија.