Граѓаните и претпријатијата се во исчекување на четвртиот пакет на еконосмки мерки за справување со последиците од корона кризата по составувањето на новата Влада, инаку најавен уште пред изборите дека ќе се реализира во септември, но за тоа прво ќе треба да се направи вториот ребаланс на буџетот годинава.

Одлуката се очекува да биде донесена следната недела кога ќе се види колку средства се останати помеѓу институциите кои може да се повлечат назад во буџетот, колку непродуктивни трошоци дополнително ќе бидат намалени и колку средства ќе бидат потребни за евентуално задолжување.

Крешник Бектеши, министерот за економија, вчера пред средбата со Сојузот на стопански комори, одговарајќи на новинарско прашање, рече дека од следната недела ќе започне процесот на ребалансирање на буџетот поради корона-кризата и најавениот четвртиот пакет на економски мерки.

- Ќе има ребаланс на буџетот, одлука следната недела ќе се донесе, кога го очекуваме и предлогот од Министерството за финансии, изјави Бектеши, при тоа не откривајќи какв мерки од четвртиот сет за справување со економските последици од коронавирусот ќе бидат донесени.

Бектеши најави дека главно ќе се работи за даночни олеснувања и директни субвенции за претпријатијата, особено од секторите кои се најмногу погодени и кои се уште немаат дозвола за работа од државата.

Данела Арсовска, претседателката на ССК, рече дека државата од сите останати во регионот процентуално најмалку одвоила од своето БДП за економска помош и дека голем број на дејности се уште не смеат да работат, а немаат право на субвенции уште од јули месец.

Првото прекројување на државната каса се случи во мај на безмалку два месеци по појавата на пандемијата во земјава со кој се дополнија буџетите на одредени министерства како клучни за борба со Ковид-19, а се укинаа одредени мерки кои се сметаа за ирелевантни и се редуцираа одредени трошоци.

Платежни картички за категориите граѓани како самохраните родители и пензионерите со ниски пензии, односно за категориите кои не беа претходно опфатени, се новините кои се најавуваат за четвртиот пакет економски мерки. 

Ова го најави вицепремиерот за економија Фатмир Битиќи во своето гостување за ТВ 24, нагласувајќи дека ќе има и други таргетирани мерки за оние кои не можат без помош во третиот и четвртиот квартал.

Според Битиќи, средства за четвртиот пакет ќе бидат обезбедени со ребаланс на Буџетот и со префрлања на заштедените пари кои некои институции не ги потрошиле. 

Одлуката за тоа кога ќе биде ребалансот ќе се знае за десетина дена. 

Тој нагласи дека фокусот на Владата е економијата, интензивно се одржуваат средби со сите чинители, а владините проекции за рецесијата остануваат исти, односно дека таа нема да биде подлабока од четири отсто. 

Битиќи нагласи дека и со четвртиот пакет мерки ќе покажат дека Владата сака секој еден денар на граѓанинот што се дава за даноци, да отиде каде што треба. 

Во интервјуто на МТВ, премиерот Зоран Заев најави одлука за задолжително пензионирање за сите вработени на 64 години, додека дамите ќе може да одберат да се пензионираат на 62 години.

Заев истакна дека се предвидува можност за вработување на дефицитарни кадри на возраст над 64 години, во случај ако на конкурс за некој стручен профил не се јави никој и тогаш се отвора можноста за вработување стручни луѓе над 64 години.

„Втората важна компоненета во рамките на реформите на пензискиот систем е пред полнење на 64, односно 62 години, да може да се докупи стажот – истакна Заев, додавајќи дека се отвора можноста граѓаните за тие пет години да ги платат придонесите за пензиско осигурување и може да заминат во пензија.

Заев појасни дека сумата на придонесите за пезниско осигурување за тие пет години е 18,4 проценти од платата, односно до 2.500 евра.

„Ние мораме да го заштитуваме пензискиот фонд и истовремено отвораме нови работни места, пензискиот фонд мора да го држиме стабилен да дава редовно пензии, но и да обезбедува пензии за идните пензионери – нагласи Заев.

На крајот на септември ќе го имаме викендот без ДДВ.

– Викендот ќе биде воведен пред почетокот на школската година бидејќи тогаш знаеме дека родителите повеќе трошат за дечињата, изјави Заев.

Дан Прајс, претприемач и сопственик на компанија со седиште во Сиетл, пред 4 години си ја намали платата од 1 милион долари годишно на 70.000 за да може да им исплаќа и на вработените по 70.000 долари.

Тој неодамна се појави на социјалните мрежи и ги откри последиците од ваквата одлука.

„Кога воведов минимална плата од 70.000 долари годишно во мојата компанија во 2015 година, Раш Лимбог рече:„ Се надевам дека оваа компанија ќе стане предмет на настава во МБА програмите за тоа како социјализмот не делува затоа што нема да успее “. Нашата фирма оттогаш се зголеми тројно, а денес сме предмет на студии на Харвард “, напиша Прајс.

Вели дека бизнисот е зголемен за трипати, а бројот на вработени кои поседуваат свој дом се зголемил за десет пати. 

„Седумдесет проценти од вработените ги исплатија своите долгови. Бројот на деца на вработените се зголеми за десет пати. Заминувањата на вработените се преполовија. Дури 76 проценти од вработените се поангажирани, двојно повеќе од националниот просек “, напиша тој.

Но, вели дека постојано добива критики од луѓето кои сметаат дека работниците не ја заслужуваат таа плата. 

Во февруари изјави дека се велича алчноста, дека луѓето се отпуштани и понижувани. 

Над 300 матуранти од земјава и од балканскиот регион добија стипендии од Програмата за стипендии при Меѓународниот балкански универзитет.

Учениците кои се прогласени за најдобри во генерација, што се докажува со потврда од средното училиште, добиваат целосна стипендија и ќе бидат целосно ослободени од школарина.

Аплицирањето за програмата за стипендии на Меѓународниот балкански универзитет ќе трае до 25 септември 2020 година.

Стипендијата од 80 проценти ќе важи за учениците со среден успех 5.00, а школарината за нив ќе изнесува 200 евра по семестар. Учениците со среден успех од 4.50 до 4.99 ќе добијат стипендија од 70 проценти, односно ќе плаќаат школарина по 300 евра од семестар. Стипендија во вредност од 60 проценти, односно школарина од 400 евра по семестар, е предвидена за учениците со среден успех помеѓу 4.00 и 4.49, додека стипендија од 50 проценти или школарина од 500 евра од семестар, може да добијат учениците со среден успех од 3.00 до 3.99.

Од Универзитетот велат дека најмногу се радуваат на фактот што матурантите што аплицираат се квалитетни ученици и имаат висока просечна оценка од средното образование.

– Бевме убедени дека новата програма за стипендии ќе има голем ефект во општеството. Прво, ќе им помогне на најдобрите матуранти и нивните семејства од финансиски аспект, добивајќи стипендии до степен на целосно ослободување од школарина. Второ, таквата политика ги мотивираше најуспешните матуранти да аплицираат за стипендија, па така се придонесува најдобрите идни студенти да останат во државата и тука да се стекнат со високо образование. И трето, што е многу важно, низ нашиот модерен образовен систем ориентиран кон кариера и професионалност, идните дипломци со нивното стекнато знаење и практични вештини ќе помогнат за севкупниот развој на државата и општеството, истакна Висар Рамадани, Генерален секретар на Меѓународниот балкански универзитет.

Рамадани додава дека се горди на фактот што програмата за стипендии на Меѓународниот балкански универзитет низ која досега поминаа над 1.200 студенти прераснува во најистакнат општествено-одговорен проект во високото образование во државата и регионот

Програмата за стипендии на МБУ за сите матуранти нуди меѓународни стандарди, најдобро рангиран универзитет во категоријата настава и учење според последната Шангајска ранг-листа, студии на англиски јазик, активни програми за размена на студенти со преку 200 универзитети во 40 земји од светот, одлични можности за практична работа и вработување по дипломирањето во најреномирани институции и компании и целосно нов универзитетски кампус во Скопје.

Аплицирањето се врши онлај на веб страната  www.scholarships.ibu.edu.mk