Кој ќе може  да оди во пензија со 64 години? Во владата различни ставови по ова прашање.

Според министерката за труд Шахпаска, задолжителното пензионирање на работниците на 64 години  ќе  важи за сите вработени во јавниот сектор , не и за оние во приватните фирми. 

Работиме на законот за пензионирање со возраст со 64 години и 15 години стаж кој ќе ги вклучува сите вработени во јавниот сектор и ќе остава можност во реалниот сектор работникот и работодавецот со заемен интерес да се договорат за продолжување на работниот век, вели министерката за труд Шахпаска.

Пред извесно време пак премиерот Заев посочи дека се носи одлука за задолжително пензионирање со 64 години и ова да важи за сите вработени, освен за дефицитарните кадри кои не може да  се надополнат. 

 Се носи одлука за задолжително пензиопнирање за сите на 64 години, освен за дамите кои можат да изберат  да одат во пензија и на 62. Се размислува за одредени  кадри да не важи како за дефицитарните, сестри доктори.., рече Зоран Заев.

Во новиот закон ќе се даде можност во пензија да се оди пет години порано од 64 и 62, но работникот ќе треба сам да си го докупи стажот. Ова правило сеуште не се знае за кои дејности ќе важи, не се знае ниту колку ќе треба да платат работниците за докуп, ако сакаат да одат порано во пензија.

Од ССМ сметаат дека не може работници од различни дејности со различна тежина на работата да се пензионираат под исти услови. Тие бараат жените во пензија да може да одат со 35, а мажите со 40 години работен стаж без разлика на нивната возраст.

Меѓународните инситуции ММФ и Светска банка  неколку пати советуваа да се зголеми старосната граница за пензионирање. 

Според податоците во земјава има 327 илјади пензионери.

И во услови на пандемија, во Агенцијата за вработување во моментов има над 5.500 слободни работни места. 

Се бараат разни видови на профили на работници, со различен степен на образование, стручност, искуство и во разни стопански и нестопански дејности, од страна на компании кои се лоцирани во различни региони и општини во државата. 

Се бараат директори, трговски раководители, менаџери, комерцијалисти, возачи, медицински сестри, општи работници, продавачи, инженери, магацински работници, економисти, адвокатски приправници и слично.

Сите овие огласи се јавни и видливи и секое заинтересирано лице може да ги види на веб страната на АВРМ – аврм.гов.мк што претставува исклучително корисна платформа преку која значително се овозможува доближување на понудата и побарувачката на работа.

На оваа веб страна постојано се ажурираат податоците и граѓаните преку неа може да се запознаат со сите слободни работни места за кои се распишани огласи од страна на компаниите за нивно пополнување и е добра можност за лицата кои се невработени или пак кои бараат работа детално да се запознаат со моменталната состојба на пазарот на труд и доколку ги исполнуваат предвидените услови да аплицираат на истите.

Бизнисот во Македонија преку Сојузот на стопански комори на Македонија упати до државата 25 барања за помош за надминување на економската криза предизвикана од епидемијата, меѓу кои едно од нив е и засилено доделување на грантови до претпријатијата како една од најпотребните мерки.

„Приоритетна мерка треба да биде директна таргетирана финансиска поддршка преку доделување на грантови за помош за најпогодените сектори, за да се ублажат негативните ефекти врз економијата предизвикани од пандемијата, бидејќи има дејности кои се пред пропаѓање.

Неопходно е да се креираат прецизни протоколи за работа за сите дејности од Националната класификација на дејности, со цел да им се овозможи на сите право подеднакво да функционираат во контролирани услови по квалитетно утврдени правила. Исто така, од голема важност е да се предвиди можност за одложување или репрограмирање на постоечките кредити за оние претпријатија кои се борат со одржување на ликвидноста за да се превенира пропаѓање или одземање на имотите од страна на банките“, изјави Данела Арсовска, претседателката на Сојузот на стопански комори на Македонија.

Од таму бараат државата дополнително да обезбеди олеснет пристап до бескаматни кредити за како што велчат - покривање на варијабилните трошоци, како што се оние за тековните оперативни потреби, но и да им се овозможи на сите на кои им се потребни да имаат можност за пристап до овие средства преку национална гарантна шема за поддршка на претпријатијата при кредитирањето.

Се бара продолжување на мерката од 14.500 денари до март 2021 година, како и одложување на сите даночни долгови за 2020 година и истите да се плаќаат на рати, без камата.  Од Сојузот информираат и дека доставиле до Владата предлози за финансиски мерки за секторите угостителство, туризам и транспорт.

Наближува почетокот на учебната година, која поради корона кризата ќе стартува на 1 октомври, а Комисијата за заразни болести вчера и денеска ја разгледува можноста за воведување целодневна настава во основните училишта, со оглед на тоа што наставата со физичко присуство, која е предвидена за деца до трето одделение ќе биде скратена.

Министерот за здравство Венко Филипче вчера истакна дека е направена анализа за бројката на деца коишто би требало да останат во училиште и по завршувањето на часовите во смена.

-Ќе се донесе позитивна одлука исто како што се носи одлука и за исклучоците во сите други училишта, односно ако бројката на децата е толку мал да никако не ја загрозува нивната безбедност, односно да нема дополнителен епидемиолошки ризик што одредена група на деца ќе остане и после завршувањето на смената. Предност што е тоа истата група на деца, значи не се зголемуваат контактите, тие биле во контакт претходно, сега само се зголемува времето на престојот, појасни Филипче.

Премиерот Зоран Заев и министерката за образование Мила Царовска в петокот ја презентираа првата Национална онлајн платформа преку која ќе се одвива новата учебна година. Следи период за прилагодување на наставниот кадар, учениците и родителите. Новата алатка, според надлежните, треба да биде значаен ресурс и по надминување на кризата со коронавирусот.

Платформата, според надлежните, е едноставна за користење и нуди учење на пет јазици. Ученикот преку компјутер или телефон ќе може да ја гледа училницата и наставникот и ќе може да ги користи сите поставени аудио и видеоматеријали на платформата и да ги изработува домашните задачи, а наставата нема да биде здодевна и ќе има брзи квизови, тестови и други иновативни содржини.

Царовска во петокот потенцира дека за 40.000 ученици што немаат ИТ-уреди за да следат настава преку националната платформа за учење од далечина, часовите што ќе ги одржуваат наставниците ќе се снимаат и потоа ќе се пренесуваат во одредено време на националната телевизија, а вчера Министерството за образование излезе со подетален план.

Целта е, како што велат од МОН, децата коишто немаат уреди за следење на онлајн настава во време на Ковид-19 да добијат можност за учење како и останатите деца.

-За таа цел, детето има можност наставата да ја следи со физичко присуство на часовите во самите училници, додека наствниците предаваат на другите деца преку онлајн платформата. Исто така, за децата, чии родители се изјасниле дека не сакаат да ги пуштаат во училиште со физичко присутсво, а немаат уреди, во Планот е предвидена опција да добиваат печатени материјали. Овие материјали ќе се доставуваат на родителите од страна на наставниците според сите мерки и протоколи за заштита од Ковид-19. За да може секое дете да има пристап до наставниот материјал, МОН е во преговори 15-минутни видеа со одреден час да се емитуваат на Националниот сервис на посебни канали кои се обезбедени, појаснуваат од МОН.

Наставниците ќе имаат обврска редовно да комуницираат со децата и нивните семејства и да следат колку напредуваат во учењето.

Приоритетната и најважната цел, велат од МОН, е да се обезбеди пристапност до наставата за секое девојче и момче во државата, без разлика каде живее.

-Нашата примарна цел е да создадеме образование достапно до секого и образовен процес којшто ќе ги постави темелите за развој на идни генерации кои ќе бидат движечката сила и умот на државата, се истакнува во соопштението на Министерството.

МОН вчера објави и видео во кое се прикажани протоколите кон кои ќе треба да се придржуваат учениците, наставниците и родителите со враќањето на децата во училниците од 1 октомври.

Според протоколите на секое дете ќе му се мери температура при влез во училиштето, а децата ќе треба да држат растојание од најмалку 1,5 метар и да носат маски на лицето за време на целиот престој во училиштето, освен за време на оброкот и активностите на отворено. Предвидено е и почесто миење на рацете и проветрување на училниците.

– Заштитата од ширењето на Ковид-19 е заедничка одговорност на родителите, наставниците, учениците и на останатиот персонал, односно на сите нас. Само со придржување на протоколите сите заеднички ќе допринесеме да се заштитиме себе, нашите најблиски и целото јавно здравје, посочуваат од МОН.