Шефот на американската програма за брз развој на вакцината за коронавирус, д-р Монсеф Слауи, рече дека првата вакцинација во САД може да започне на 12 декември, пренесува АП.

Советничкиот одбор на Администрацијата за храна и лекови (ФДА) треба да го разгледа барањето на „Фајзер“ за одобрување на итна употреба на вакцината на таа компанија против Ковид-19 на состанокот на 10 декември.

„Фајзер“ и неговиот германски партнер „Бајонтек“ неодамна објавија дека, според клиничките испитувања, нивната вакцина е 95% ефикасна во спречување на лесни до тешки случаи на инфекција со коронавирус.

Слауи за кабелската мрежа Си-Ен-Ен изјави дека испораката на вакцини до американските држави е планирана во рок од 24 часа од очекуваната позитивна одлука на управата.

Тој додаде дека очекува вакцинацијата да започне на вториот ден по одобрувањето за итна употреба на вакцината, на 12 декември и дека вакцините ќе бидат доставени врз основа на популацијата на секоја земја. Државите одлучуваат кој прв ќе ја прими вакцината, но се препорачува тоа да бидат здравствени работници и стари лица.

„Фајзер“ очекува да има доволно дози за да заштити 25 милиони луѓе до крајот на годината.

Бројот на случаи со коронавирус во Америка надмина 12 милиони и за прв пат се зголеми за повеќе од еден милион за помалку од една недела. Рекорден е бројот на Ковид-19 пациенти во болниците низ целата земја, а болеста однесе најмалку 255.000 животи во Америка, пренесува Ројтерс.

„Се соочуваме со многу тежок бран на коронавирус низ САД и на глобално ниво“, изјави за Ен-Би-Си д-р Ентони Фаучи, водечки американски експерт за инфективни болести.

Основачот на „Мајкрософт“, Бил Гејтс, изјави дека службените патувања по короната најверојатно ќе бидат намалени за дури 50 проценти, а исто така верува дека ќе поминуваме 30% помалку време во канцеларијата.

Тој додава дека за многумина секогаш ќе постои начин да се работи од дома, пишува CNBC.

Сепак, тој посочува дека не сите компании прават еднакви напори да им овозможат на вработените да работат од далечина, истото е и со состаноците, кои не мора секогаш да се одржуваат во живо, за да бидат ефикасни.

Гејтс исто така истакна дека неговиот деловен распоред сега е многу поедноставен, во споредба со оној пред корона-кризата, бидејќи тој не може и не мора да патува толку многу. Од почетокот на пандемијата на „Ковида-19“, неговата фондација активно работи на наоѓање вакцина против вирусот корона. Еден од најголемите технолошки генијалци, исто така, изјави за Business Insider дека не ги разбираат луѓето кои не носат маски.

Што се тие, божем се некои нудисти? Се прашуваше Гејтс.

Пандемијата, патем, ги уништи аеродромите ширум светот и драстично ја намали побарувачката за авионски патувања. Туризмот, исто така е значително погоден и веројатно ќе требаат години за сè да се врати на нивото од 2019 година.

Државната помош од 6.000 денари пензионерите, самохраните родители, невработените и младите до 29 години, ќе треба да ја искористат за неколку дена, откако ќе им легнат парите. Предлог законот стигна во Собранието, но не е ставен на дневен ред ни наредната недела. Во него стои дека лицата со месечни примања под 15 илјади денари, евидентирани во ПИОМ до 27 октомври ќе добијат помош на трансакциската сметка во банката, со која ќе потпишат договор во рок од  5 дена по влегување на законот на сила. Конечната листа на корисници пак, со име, презиме и банка каде ќе се врши  уплатата, Генералниот секратаријат ќе ја објави на www.kupuvamdomasno.gov.mk во рок од 8 дена по стапување на сила на законот, а за самохраните родители на кои статусот го утврдува центарот за социјални работи во рок од 12 дена.

За лицата пак,  кои ќе поднесат приговор, Ген секратаријат ќе им одговори и ќе достави конечна листа до банките во рок од дваесет дена.

Со овие пари граѓаните нема да можат да купуваат каде сакаат, туку само во објектите кои ќе се регистрираат на интернет страната Купувам домашно, во рок од 5 дена по изгласување на законот.

Парите нема да може да се подигнат во кеш и со нив нема да може да се плаќаат производи и услуги на фирми кои нема да се пријават како даватели на услуги. Помошта треба да се искористи  до 25 декември. за што Владата издвои 27 милиони евра.

Во септември просечната нето плата изнесувала 27.405 денари.

Таа е за 7,7 отсто повисока во однос на септември лани, а просечната бруто исплатена плата е 40.913 денари и е повисока за 8,2 отсто.

Според податоците на Државниот завод за статистика, зголемувањето се должи на повисоката просечната месечна исплатена нето плата по вработен во секторите: Уметност, забава и рекреација за 10,6 отсто, во Преработувачка индустрија за 10,2 отсто и во Дејностите на здравствена и социјална заштита за 10 отсто.

Намалување на просечната месечна исплатена нето плата, во однос на претходниот месец има во секторите Земјоделство, шумарство и рибарство за 7,1 отсто, Уметност, забава и рекреација за 6,4 отсто и Трговија на големо и трговија на мало, поправка на моторни возила и мотоцикли за 3,2 отсто.

Зголемување на исплатената бруто плата се должи на зголемувањето на просечната месечна исплатена бруто-плата по вработен во секторите: Преработувачка индустрија за 10,7  отсто, Уметност, забава и рекреација за 10,6 и Дејности на здравствена и социјална заштита за 10,2 отсто.

Намалување на просечната месечна исплатена бруто-плата по вработен, во однос на претходниот месец, е забележано во секторите: Уметност, забава и рекреација за 6,4 отсто, Земјоделство, шумарство и рибарство за 5,4 и Трговија на големо и трговија на мало, поправка на моторни возила и мотоцикли за 2,9 отсто.

Според статистичките податоци, дејност што има најниска просечна плата, помала од 20.000 денари, е заштитни и истражни дејности со 16.587 денари. 

Меѓу дејности чија просечна исплатена нето плата во септември не надминува 20.000 денари се и рибарство и аквакултура со 17.442 денари, дејности за подготовка на оброци и служење на храна со 17.684 денари, услуги поврзан со одржување на згради и дејности на уредување и одржување на животната средина и природата со 17.819 денари, туристички агенции, организатори на патувања (туроператори) и останати резервациски услуги како и дејности поврзани со нив со 17.966 денари, објекти за сместување со 19.224 денари и производство на мебел со 19.559 денари.Просечната месечна исплатена нето-плата по вработен, во август 2020 година, изнесувала 27.535 денари.