Мерката ваучери за домашен туризам ќе продолжи и следната година за што веќе се обезбедени средства во предлог-буџетот на Министерството за економија, кажа министерот за економија Крешник Бектеши во дебатната емисија „И што сега“ на Националната телевизија.

Министерот кажа дека досега се искористени 46.000 ваучери за домашен туризам, а податоците од Државниот завод за статистика за раст на бројот на домашни туристи во август и септември покажуваат дека мерката ги дала очекуваните резултати.

„Согласно Уредбта која што ја донесе Владата рокот за искористување на ваучерите за туризам кои ги доделивме во јули истекува на 15 декември, бидејки овие средства беа предвидени во Буџетот за 2020 година и средствата мора да бидат исплатени до 25 декември.

Но, во предлог – буџетот за 2021 година предвидовме средства за да продолжи мерката за ваучери за поддршка на домашниот туризам, по барање на туристичкиот сектор. Мерката ќе се продолжи, но можеби тоа нема да биде во јануари, тоа би можело да биде веќе во вториот квартал, односно во април. Но, во Буџетот на Министерството за економија се предвидени средства за оваа мерка и за следната година“ кажа министерот Бектеши.

Министерот потенцираше дека секторот туризам и угостителство беше најпогоден од здравствено-економската криза предизвикана од пандемијата, затоа и најголем дел од мерките во сите четири сета кои што ги донесе Владата за поддршка на економијата беа креирани за поддршка токму на овој сектор.

„Ваучерите во вредност од 6.000 денари беа неменети за граѓани со ниски приходи за поддршка на домашниот туризам, а истовремено имаше и платежни картички во вредност од 3.000 денари кои што можеше да се користат во домашните угостителски и хотелски капацитети. Досега се искористени над 46.000 ваучери, а граѓаните имаат уште еден месец да ги искористат и ги повикувам да ги искористат што помасовно се со цел на тој начин да го поддржат секторот“, потенцираше Бектеши.

Министерот додаде дека хотелиерите и угостителите на располагање ја имаа и мерката за финансиска поддршка за исплата на плати, каде што според податоците од Управата за јавни приходи најголем дел од компаниите кои што ја искористија оваа мерка се од туристичко-угостителскиот сектор и од транспортот, како и бескаматни кредити, што според податоците на Развојната банка на Северна Македонија, најголем дел на компании токму од овој сектор беа од оние кои добија бескаматни кредити. Целта на мерките е зголемување на ликвидноста на компаниите во државата за полесно да ја пребродат кризата, но и зачувување на работните места.

Вработените во приватниот сектор до крајот на 2020 година треба да добијат исплата на регрес за годишен одмор, попознат како К-15.

Износот на К-15 секоја година се утврдува во зависност од висината на просечната нето и бруто плата по вработен во последните три месеци пред датумот на исплата.

Минималниот износ треба да изнесува најмалку 40 проценти од висината на просечната нето плата, а максималниот до 40 проценти од висината на просечната бруто плата.

За вработените во приватниот сектор важи условот да бидат вработени најмалку шест месеци во тековната година кај ист работодавач.

Според последните информации за платите на Државниот завод за статистика, износот на К-15 за 2020 година треба да се движи од 10.956 до 16.349 денари.

Крајниот рок за исплата на регресот за годишен одмор за работодавците е 31 декември 2020 година.

Сопственикот на компанијата „Тесла Моторс“ и „Спејс Х“, Илон Маск, го престигна основачот на „Мајкрософт“, Бил Гејтс, на списокот на милијардери на „Блумберг“ и стана вториот најбогат човек на светот.

Откако цените на акциите на „Тесла“ пораснаа, нето-вредноста на богатството на Илон Маск се зголеми на 128 милијарди долари, што е доволно за да биде втор најбогат човек на светот во овој момент. Гејтс сега падна на третото место на списокот.

Маск беше рангиран на 35. место на оваа листа на почетокот на годината, но во меѓувреме, поради бројните успешни проекти, вредноста на неговото богатство се зголеми за 100,3 милијарди долари, што е рекорд кога станува збор за зголемувањето на вредноста за една година.

Со овој раст, Маск го престигна Гејтс на списокот, што секако ќе биде дополнително задоволство за Маск, со оглед на тоа што неколкупати влезе во судир со американскиот милијардер и основач на „Мајкрософт“.

Првата расправа помеѓу Маск и Гејтс беше за електрични автомобили, а Маск тогаш му порача на Гејтс дека нема поим за нив, и сето тоа кулминираше за време на пандемијата на коронавирусот, бидејќи милијардерите имаат различни ставови кога станува збор за односот кон ковид 19.

Основачот на „Амазон“, Џеф Безос, и понатаму води на листата на најбогати луѓе според „Блумберг“. Покрај Безос, Маск и Гејтс, на врвот на листата милијардери се и Бернард Арно и Марк Цукерберг.

Откако министерствата ќе го разгледаат, нацрт-законот за неработна недела ќе биде објавен на ЕНЕР за да се слушне реакцијата од јавноста, соопшти министерката за труд и социјална политика, Јагода Шахпаска.

„Законот за прогласување на недела како неработен ден е измена на Законот за работни односи, во членот 134, каде дефинираме дека недела е неработен ден, ако со друг закон или колективен договор не е поинаку решено. Тоа е главната измена во Законот за работни односи“, рече Шахпаска.

Здравство, полиција, противпожарните и комуналните служби се единствените кои министерката ги наведе како витално важни дејности, кои и понатаму ќе работат во недела.

„Имавме меѓусекторски и меѓуресорски консултации меѓу сите министерства за да се утврди кои сектори ќе бидат изземени од овој закон. Ние го драфтиравме законот, го испративме до сите министерства и очекуваме нивен одговор за дополнувања и сугестии“, рече Шахпаска.

Таа вели дека Министерството за труд и социјална политика има најголем буџет, во однос на другите министерства, а најави и дека Буџетот за наредната година е проектиран во насока за надминување на последиците од корона-кризата.