Постојат пет таканаречени „Сини зони“ во светот - региони во Италија, Јапонија, Костарика, Калифорнија и Грција - каде што луѓето имаат 10 пати поголема веројатност да доживеат 100 години. Заедничко за овие луѓе е тоа што го практикуваат правилото од 80 проценти, кое значи дека престануваат да јадат кога се 80% сити.

Ова правило, познато и како „Хара Хачи Бу“, помага да се избегне прејадување, да се задржи енергијата преку денот и да се намали ризикот од болести кои се појавуваат во зрелоста. Истражувањата покажуваат дека намалениот внес на калории (околу 1900 на ден) го забавува стареењето и помага за подолг и поздрав живот.

Нутриционистите советуваат дека покрај контролата на количината на храна, важно е и да се јаде побавно и свесно, за да се почувствува ситост навреме. На овој начин, без ригорозни диети, полесно се одржува здрава тежина и се живее подолго и поквалитетно.

Тагови: здрава храна долг живот

Четвртокот (10.04.2025), тимот на KARIERA.mk со задоволство учествуваше на настанот организиран во рамки на проектот „Зајакнување на младите преку нови можности 2“, од страна на СОС Детско село. Настанот беше посветен на поврзување на младите со бизнис заедницата и отворање на простор за дијалог, совети и потенцијални можности за вработување.

Како платформа која секојдневно работи на олеснување на пристапот до пазарот на труд, ни беше особена чест што имавме можност да запознаеме многу млади, амбициозни и инспиративни луѓе, кои се подготвени да го направат својот следен чекор во професионалниот развој. Слушавме лични приказни, разговаравме за предизвиците со кои се соочуваат младите при барање работа, и споделивме практични совети поврзани со подготовка за интервју, избор на кариера и напредување на работното место.

Особено сме благодарни што бевме дел од еден продуктивен ден исполнет со искрени разговори, размена на идеи и многу мотивација. Веруваме дека ваквите иницијативи имаат клучна улога во градењето на самодовербата кај младите и во нивната подготовка за пазарот на труд. Со нетрпение очекуваме нови средби и соработки кои го поддржуваат овој позитивен правец.

Тагови: настани нова работа СОС Детско село

Регулаторната комисија за енергетик донесе Одлука со која се врши намалување на малопродажните цени на нафтените деривати во просек за 2,40 % во однос на одлуката од 10.04.2025 година.

Малопродажната цена на бензинот ЕУРОСУПЕР БС-95 се намалува за 2,50 ден/лит. Малопродажните цени на бензинот ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се намалуваат за 2,00 ден/лит. Малопродажната цена на Мазутот М-1 НС не се менува.

Од 12.4.2025 година од 00:01 часот максималните цени на нафтените деривати ќе изнесуваат:

• Моторен бензин ЕУРОСУПЕР БС – 95 71,50 (денари/литар)
• Моторен бензин ЕУРОСУПЕР БС – 98 74,00 (денари/литар)
• Дизел гориво ЕУРОДИЗЕЛ БС (Д-Е V) 64,50 (денари/литар)
• Масло за горење Екстра лесно 1 (ЕЛ-1) 64,50 (денари/литар)
• Мазут М-1 НС 37,708 (денари/килограм)

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 5,777%, кај дизелот за 5,057%, кај екстра лесното масло за 5,078% и кај мазутот намалувањето е за 1,745%. Курсот на денарот во однос на доларот во изминатиот период по кој беа формирани цените со претходната пресметка е понизок за 0,4851%.

Тагови: нафтените деривати Регулаторната комисија за енергетика

Реномираната авијациска организација Скајтракс (Skytrax) го рангираше Меѓународниот Аеродром Скопје, управуван од ТАВ Македонија, подружница на ТАВ Аеродроми, меѓу најдобрите десет аеродроми во регионот на Источна Европа, во рамки на својата програма наречена Светски Аеродромски Награди (Skytrax World Airport Awards). Наградите кои Скајтракс ги доделува според гласовите на патниците, беа објавени на авијацискиот саем Passenger Terminal Expo кој се одржа во Мадрид, Шпанија, каде што се собраа над 2.000 професионалци од авиоиндустријата, од повеќе од 120 земји во светот.

Најдобрите аеродроми во Источна Европа за 2025 година, според Скајтракс се: 1. Будимпешта; 2. Софија; 3. Тбилиси; 4. Талин; 5. Рига; 6. Кутаиси; 7. Белград; 8. Букурешт; 9. Батуми; 10. Скопје, информираше денеска во соопштение ТАВ Македонија.

Како ТАВ Македонија оваа година ја славиме нашата 15-годишнина, што значи дека веќе 15 години посветено работиме со цел да им го понудиме најдоброто патничко искуство на нашите патници. Во рамки на Светските Аеродромски Награди на реномираната организација Скајтракс оваа година со Меѓународниот Аеродром Скопје влеговме меѓу најдобрите десет аеродроми во Источна Европа. Навистина сме среќни поради ова признание и ќе продолжиме да работиме на подобрување на квалитетот на аеродромските услуги и целокупното патничко искуство, изјави Неџат Курт, генерален директор на ТАВ Македонија.

Покрај Меѓународниот Аеродром Скопје, уште седум други аеродроми управувани од ТАВ Аеродроми, членка на групацијата АДП, беа признати меѓу најдобрите аеродроми во светот, во рамки на наградите Skytrax World Airport Awards. Тоа се аеродромите во:  Алмати - Казаxстан, Анкара и Измир - Турција, Батуми и Тбилиси - Грузија, Рига - Латвија и Медина - Саудиска Арабија.

Наградите на Скајтракс (Skytrax), наречени Светски Аеродромски Награди (World Airport Awards), се одредуваат преку резултатите од истражувањето за мислењето на патниците, кое беше направено од август 2024 до февруари 2025 година, односно во период од шест месеци. Притоа луѓе од над 100 различни националности оценуваа 575 аеродрома во светот, преку клучни индикатори за квалитет, опфаќајќи го патничкото искуство од услугите и од производите коишто се нудат на аеродромите.  

Светските Аеродромски Награди се независна програма на авијациската организација Скајтракс кои функционираат од 1999 година и претставуваат глобален репер за совршеност на аеродромите.

Тагови: авио сообраќај ТАВ Македонија Skytrax)