За да имате безбеден и спокоен одмор во друга земја пред тргнување осигурајте се околу неколку детали кои може да бидат пресудни за вашиот одмор. 

Ова се насоките кои ги препорачува македонското МНР:

1. Проверете ја валидноста на пасошот (некои држави бараат пасошот да важи дури и 3-6 месеци по напуштањето на државата, а во одделни држави македонските граѓани можат да патуваат со важечка лична карта). 

2. Надлежните препорачуваат да се направат фотокопии од пасош / лична карта. Копијата ќе го олесни и забрза издавањето на патен лист во случај на загуба или кражба на пасош.

3. Проверете дали ви е потребна виза за земјата во која патувате.

4. Проверете кои валути се платежен инструмент, дали е можно плаќање со кредитна картичка и кој е минималниот износ на пари потребни за престој.

5. Почитувајте ги законите и обичаите на земјата во која патувате, истовремено почитувајќи ги локалните обичаи на облекување и однесување за време на вашиот престој. Имајте предвид дека во некои земји постојат закони кои предвидуваат долгорочна затворска казна и смртна казна за поседување на наркотици и други забранети супстанции.

6. Грижете се за себе и за вашата безбедност.

7.Кога влегувате на територијата на друга земја, може да има обврска за евидентирање на влез од страна на надлежните органи за спроведување на граничната контрола - во патната исправа се внесува влезен печат, со ознака на  граничниот премин и датумот на влез. Недостатокот на евидентирањето за влез може да резултира со високи парични казни и забрана за влез во поединечна земја.

8. Проверете ги информациите за безбедноста на воздушниот сообраќај тука и тука.

Граничниот премин Богородица-Евзони од денеска ќе работи 24 часа дневно, објавија грчките медиуми.

Најпрометниот премин помеѓу Македонија и Грција досега работеше од 7 до 23 часот.

Од денеска со целосно 24-часовно работно време ќе работат и граничните премини Дојран, Промахонас, Ники, Кастаниес, Кирои, Нимфаија, Орменеио, Кристалопиги и Какавиа.

Од 2 јули, 24 часа ќе биде отворен и граничниот премни Ексохи, јавуваат грчките медиуми.

Регулаторната комисија за енергетика и водни услуги (РКЕ) донесе одлука со која сметките за електрична енергија на универзалниот снабдувач ЕВН ХОМЕ незначително ќе се намалат, со примена на измените на Законот со кои ДДВ за електрична енергија ќе се намали од 18 % на 5%. 

На одржаната главна седница регулаторите одобрија регулиран максимален приход и цени на пресметковните елементи за вршење на енергетската дејност снабдување со електрична енергија на потрошувачите кои ги снабдува универзалниот снабдувач ЕВН ХОМЕ ДОО Скопје. 

„Евтината тарифа останува на сила во дневните и ноќни интервали како и до сега, а сметките за електрична енергија практично ќе останат непроменети со носење на законот со кој ќе се намали ДДВто за електрична енергија. “ изјави Марко Бислимоски претседателот на Регулаторната комисија за енергетика и водни услуги. 

Со донесената одлука се гарантира сигурност и стабилност во испораката на електрична енергија. Од побараните 50 денари на 1000 денари сметка за електрична енергија од страна на сите енергетски компании што ги регулираме, одобрени се 6 денари. На останатите елементи во крајната цена РКЕ нема влијание, а тоа се: увозот на струјата кој во првите шест месеци изнесуваше 32 милиони евра, маржата на ЕВН Хоме, трошокот за обновливи извори кој е зголемен за 1,5 милиони евра, цената на ЕСМ која во просек во однос на минатата година е зголемена за 2,5%. 

„Намалувањето на ддв-то е добро решение, но неопходeн е системски одговор – да се прошири опфатот на ранливи категории кои ќе добиваат субвенции за сметките за електрична енергија “ изјави Марко Бислимоски претседателот на Регулаторната комисија за енергетика и водни услуги.

Денеска во Министерството за внатрешни работи, министерот Оливер Спасовски  со најблиските соработници присуствуваше на промоцијата и презентирањето на новите ласерски радари наменети за потребите  на сообраќајната полиција опремени со уред  за ноќно снимање, далеку посупериорни од досегашните.

Набавката вредна 21.257.175 денари е  направена согласно побарувањата, односно потребите на Единиците за сообраќај во МВР, следствено на актуелните европски полициски стандарди во овој дел од полициското работење, согласно законските норми и согласно нашите проекции за развој и унапредување на функционирањето на сообраќајната полиција.

Со оваа набавка  нашето Министерство е единствено во регионот кое располага комплетно со уреди од последната генерација, од кои невозможно е да се избрише снимениот материјал, при што бројот на уреди за брзина и алкохол по глава на жител е на исто или дури и повисоко ниво од земјите од Европската Унија.Во крајна линија, сите сме сведоци дека од 2017 година наваму, како раководство на МВР, без престан  инсистираме и делуваме на континуирано организационо и, пред сѐ, материјално-техничко опремување на сите наши служби, што како процес напоредно течеше со процесите на полициски реформи – истакна пред присутните министерот Спасовски.  

За сите нас исклучително важен е фактот што безбедноста во сообраќајот веќе одамна ја третираме не само како прашање на почитување на законската регулатива од таа област или, пак, само како стручно опсервирање на квалитетот на сообраќајната инфраструктура туку, пред сѐ, како приоритетен сегмент, во кој се пресликува нашата посветеност за создавање на безбедни средини за граѓаните, но и поширока по обем проблематика од јавен, односно општествен интерес. Оттаму сосема се логични и неопходни нашите секојдневни активности, не само во поглед на засилените сообраќајни контроли по патиштата низ државата, туку и во делот на материјално-техничкото унапредување на сообраќајната полиција за квалитетно извршување на своите работни обврски и надлежности. Во таа смисла денешнава промоција на 50 модерни, технички високо-софистицирани радарски уреди, што МВР по пат на јавна набавка ги обезбеди за службениците на сообраќајната полиција, е уште еден, за нас многу значаен исчекор, во насока на утврдената цел – зголемување на безбедноста на сообраќајот на патиштата. Уверен сум дека со овој нов зафат уште повеќе ќе се зголеми ефикасноста и квалитетот на сообраќајната контрола што, пак, треба да даде свои резултати во зголемување на нивото на безбедност на сообраќајот на патиштата – рече министерот Спасовски на денешнава промоција на новите радари во министерството.