Во склоп на кампањата за поддршка за жени претприемачи, овојпат разговараме со Ана Ристевска, доктор на науки од областа на маркетингот и воедно основач и управител во Јавен Адвертајзинг Битола.
1. Најпрво, раскажете ни нешто за почетоците, кога и како дојде првата идеја за основање на компанија од оваа област во Битола?
Кога ја основав Јавен Адвертајзинг бев во работен однос и зад мене имав 10 годишно работно искуство во областа на информатичките технологии и маркетингот во домашни и интернационални компании, а воедно и искуство во високообразовна област. Целокупното работно искуство што го имав, како и вложувањето во научното истражување, придонесе да почнам да размислувам да воведам нешто ново и иновативно на пазарот за дигитализација на бизнисите и нивно соодветно промовирање. Почетоците на Јавен Адвертајзинг беа со иновативна веб аликација за промоција на бизниси (javen.mk), а сега овие услуги преку Јавен Адвертајзинг се нудат бесплатно. Потоа, следејќи ги потребите на пазарот, дојдов до идеја да започнам со едукативен центар за програмирање (javen-advertising.com) кој ќе нуди нови и иновативни обуки на пазарот од областа на програмирањето и дигиталниот маркетинг, бидејќи тоа недостасуваше во Пелагонскиот регион и застапеноста на кадар од областа на ИТ беше лимитирана. Почетокот со едукативниот центар уште веднаш беше многу успешен и резултираше со голем број на студенти, а и до ден денес бележиме постојан напредок. Тоа е така бидејќи постојано ги менуваме и прилагодуваме обуките според потребите на пазарот, а воедно ги препорачуваме нашите студенти во ИТ компании и после секоја завршена обука ги спремаме за влез во работна средина, како и аплицирање во платформите за фриленс работење.
Огромна поддршка за Јавен Адвертајзинг беше добивањето на грант од страна на ФИТР по година и пол работа на Јавен Адвертајзинг, што ми помогна да растеме како компанија и да започнеме и со нудење на различни други услуги и решенија и тоа: иновативни софтверски решенија и апликации, веб страни и останати услуги од областа на информатичките технологии.
Сега можам да кажам дека Јавен Адвертајзинг работи со голем број на клиенти од нашата земја и од странство, на кои им изработуваме софтвери, веб страни и останати апликации во најразлични технологии според нивните потреби и барања.
.jpg)
2. Што значи да се биде млада жена претприемач во нашата држава и кој беше основниот мотив за реализирање на вашиот бизнис?
Како млада жена претприемач можам да кажам дека многу често ги мотивирам моите студенти да размислуваат во насока своите идеи да ги преточат во бизнис, а воедно да ги следат сите можности кои им се нудат на пазарот за започнување на свој бизнис, и тоа повици за грантови, учество на натпревари и слично.
Во нашата земја во сите вакви повици, секогаш се става акцент на тоа дали компанијата има жена сопственик или управител што сметам дека е многу битно за поттикнување и развој на женското претпприемништво.
Како основниот мотив за реализирање на сопствен бизнис беше да се направи нешто што ќе даде дополнителна вредност на пазарот. А, потоа со зголемувањето на бројот на клиенти, зголемување на нивните барања и проширување на дејноста, се јави мотивот компанијата да стане супериорна на пазарот, побарувана и препорачувана, и се разбира да биде препознатлива во квалитетот на услугите кои ги нудиме и задоволството на нашите клиенти и студенти, што со сигурност можам да кажам дека е на многу високо ниво.
3. Кои се актуелните проекти на кои работите во моментот?
Јавен Адвертајзинг нуди повеќе од 30 различни обуки од областа на програмирањето, бази на податоци, тестирање на софтвер, дигиталниот маркетинг, графичкиот дизајн, а воедно имаме верифицирано и 2 програми и тоа програмите: Веб оператор и Дигитален маркетер од страна на Мин. за образование и наука и Центарот за образование на возрасните. Ние, како едукативен центар во кој имаат поминато повеќе од 1000 студенти изминативе години, постојано размислуваме на воведување на нови обуки според потребите на пазарот и побарувачката во ИТ секторот. Воедно, воведуваме и нови обуки за програмирање наменети за деца за кои имаме огромен интерес, а и уште веднаш многу групи на ученици.
Воедно, во овој период активно работиме и на промовирање на нашето најново софтверско решение кое го воведуваме на домашниот пазар, а воедно и преку дистрибутери на странските пазари.
Со ова решение на нашиот пазар сакаме да воведиме дигитализација и во секторот човечки ресурси, бидејќи соодветното менаџирање со луѓето во организацијата е од клучно значење таа да биде успешна и да напредува.
Повеќе околу ова решение може да најдете на нашата веб страна javensoftware.com
4. Кажете ни нешто повеќе за начинот на избор на вашиот тим, како ја правите регрутацијата на вработени во вашата компанија и кои се клучните елементи кои ги барате кај еден апликант?
При вработување на нови кадри, освен нивните компетенции за работната позиција, многу посветувам внимание на тоа колку тие се спремни да учат нови работи, се флексибилни да се прилагодат на новите случувања на пазарот и потребите на клиентите, а воедно се мотивирани постојано да даваат нови идеи и предлози со цел да бидеме што поконкурентни на пазарот.
При изборот на предавачи клучно е нивното работно искуство, бидејки во оваа област е важно предавачите да се со повеќе годишно работно искуство и да знаат да го пренесат знаењето соодветно на студентите. Додека за регрутирање на програмери без работно искуство, секогаш практикувам прво период на пракса до 3 месеци со цел овој период да биде повеќе насочен кон учење и прилагодување во работната средина.
Можам да се пофалам со тоа дека околу мене имам тим кој постојано работи на развојот на компанијата, и тоа преку постојано учење и целосна посветеност кон нашите клиенти и студенти.
Воедно, јас лично постојано се трудам да придонесам за кариерен и личен развој на моите вработени, бидејќи е многу битно вработените да се чувствуваат вредно и ценето, а истовремено дека им се дава простор да напредуваат и растат како професионалци во својата област.
5. По краткиот разговор, неминовно е да прашаме за идните планови, кога размислувате за иднината, каде ја гледате вашата компанија во наредните 5 години?
Моите амбиции за Јавен Адвертајзинг се во наредните 5 години да напредува како едукативен центар преку верификација на голем број на програми, а воедно да расти и како интернационална компанија која ги нуди и продава своите услуги и решенија на повеќе странски пазари. Воедно, во плановите за иднината влегува и проширувањето на компанијата преку свои претставништва и надвор од границите на нашата земја.
Сметам дека само со силна волја и упорност, правилно и навремено извршување на работните задачи и идентификување на можностите кои се нудат на пазарот, можеме да ги зголемите шансите за напредок и исполнување на нашите цели, и се разбира да ги оствариме нашите замисли.