Владата денеска треба да донесе дополнителна одлука со која и компаниите од месната индустрија ќе бидат ставени на списокот за добивање субвенционирана електрична енергија од 80 евра за мегават час.

Ова го соопшти министерот за економија Крешник Бектеши, а согласно одлуката, покрај „одгледувањето живина“, додадени ќе бидат и шифрите на дејности за одгледување свињи, молзни крави, овци и кози, со што целиот ланец на месната индустрија ќе биде покриен со субвенционирана струја.

Стопанската комора на Северна Македонија го поздрави ваквиот чекор и јавно и заблагодари на Владата што му излегува во пресрет на бизнисот во вакви услови на криза.

Според Комората, податоците од терен велат дека компаниите одгледувачи на животни работат во отежнати услови зашто сточната храна веќе е поскапена за 70 отсто. Тие бележат екстремен раст на транспортните трошоци, но и на сметките за струја, а сето тоа го доведува во прашање нивниот опстанок.

Утре ќе се донесе дополнителна одлука со која ќе се прошири списокот на дејностите кои ќе бидат поддржани од Владата согласно барањата на Стопанската комора и целиот ланец на месната индустрија ќе биде покриен со субвенционирана електрична енергија, рече вчера министерот Бектеши откако одржа брифинг со новинарите.

Поради воведувањето на оваа мерка, тој очекува, како што нагласи, до крајот на наредната недела да се намалат цените на месните производи.

Владата ќе излезе во пресрет на барањето на Стопанската комора за проширување на списокот со дејности кои ќе бидат поддршани со мерката субвенционирана електрична енергија од 80 евра за мегават час. Со новата Одлука за преземање мерка во услови на кризна состојба со електрична енергија, што според најавите на министерот за економија Крешник Бектеши ќе биде усвоена утре, покрај „одгледувањето живина“, ќе бидат додадени и шифрите на дејности за одгледување свињи, молзни крави, овци и кози, со што целиот ланец на месната индустрија ќе биде покриен со субвенционирана електрична енергија. Оваа нова Одлука ќе овозможи сите што имаат фарми за одгледување животни и се наоѓаат на слободниот пазар на електрична енергија, да бидат подеднакво третирани со мерките. Воедно, тоа ќе придонесе и за зачувување на сточниот фонд во земјата, наведе Комората.

Наредните денови намалување на цените и на лебот и млекото

Според министерот Бектеши кој порача дека сите треба да придонесат во справувањето со кризата и да бидат општествено одговорни, во наредните десет дена се очекува намалување и на цените на лебот и млекото.

Во наредните десет дена очекуваме намалување на цените на основните прехранбени производи, посебно на тие наведени во Одлуката за утврдување на маржите од 5 до 12 отсто. И во делот на лебот веќе почна поевтинувањето. Очекуваме во наредните 3-4 дена намалување на цените на млекото и млечните производи, рече Бектеши.

Од 1 декември се очекуваат и поголеми поевтинувања, дополни министерот, ако суровините останат со истите увозни цени, а тогаш стапува во сила и мерката за субвенционирано снабдување со струја.

Владата донесе одлука да ја замрзне цената на пелетите на 27.000 денари за тон согласно предлогот на Министерството за земјоделство, шумарство и водостопанство и на Министерството за економија, информира денеска ресорниот министер Крешник Бектеши.

Одлуката за цените на пелетите и огревното дрво е донесена согласно анализите и предлозите на Министерството за земјоделство, шумарство и водостопанство и Национални шуми. Во анализите за октомври просечната увозна цена за тон пелети е 22.940 денари, а цената која ја замрзнавме е 27.000 илјади денари по тон, рече Бектеши на денешната средба со новинарите.

Во замрзнатата цена, како што рече, се предвидени трошоците за ДДВ и транспорт, како и одредена маржа за трговците.

Има разлика од повеќе од 4.000 денари по тон што сметам дека е солидна разлика за трговците да не се во загуба и да ги покријат сите режиски трошоци, прецизира Бектеши.

Продажната цена по килограм пелети во земјава е околу 55 денари, а со замрзнувањето ќе биде 27 денари за килограм.

Во Буџетот за 2023 обезбедени се средства за раст на минималната плата и не пзниите согласно новата методологија. Ова деновиве го објави министерот за финансии Фатмир Бесими, а денеска го повтори и пратеничката на СДСМ Санела Шкријељ.

Март следната година е новиот термин кога согласно новиот воспоставен модел минимланата плата треба да порасне за нови 10 проценти или за 1 800 денари, со што таа ќе изнесува неполни 20.000 денари.

Во истиот месец, ќе следува и ново покачување на пензиите согласно новата методологија со која пензиите растат на секои шест месеци.

Министерката за труд и социјална политика и членка на раководството на СДСМ, вчера на партиски настан во Радовиш најави дека во март пензиите согласно новата методологија ќе пораснат за 7 проценти.

Пензионерите оваа година два пати добија покачување на пензиите прво од 2.9 а потоа и од 6.8 отсто, додека во март годинава минималната плата порасна од 15.200 нa 18.000 денари.

Рестрикции на струја нема да има, нѐ уверуваа со месеци од Владата, но можно е да нема струја поради дефекти, признаа денеска од Илинденска.

Имено, како што посочија од Владата, поради дополнителната оптовареност што се очекува на енергетските производни капацитети, зависно од временските услови и од зголемената потрошувачка на струја, во наредниот период се можни неочекувани испади (во електричната мрежа). Состојбата, велат, се следи, а за преземените мерки граѓаните навреме ќе бидат информирани.

Мораме да имаме во предвид дека државата во моментот располага со енергетски капацитети кои се стари повеќе од половина век. Во периодот што следува заради временските услови и заради зголемената потрошувачка на електрична енергија овие производните објекти дополнително ќе бидат оптоварени и можни се неочекувани испади. Состојбата секојдневно се следи и ќе се следи, а за преземените мерки граѓаните навреме ќе бидат информирани, изјави денеска на прес-конференција Виктор Андонов – советник за енергетика во Кабинетот на премиерот.

Како што соопшти, вчерашниот биланс покажува дека вкупното производство на електрична енергија од ЕСМ изнесува 10.756 мегават часа на електрична енергија, од кои 7.800 се произведени во термоелектраните, додека останатите 2.956 од обновливи извори на енергија, односно од хидроелектраните и од ветерниот парк.

Како што беше најавено, 2.400 мегават часови се обезбедени од набавката на електрична енергија, додаде Андонов.

Тој повторно апелираше да се штеди струја.

Граѓаните, компаниите и институции да посветат уште поголемо внимание на штедење на електрична енергија. Да не се опуштаме во периодот што ни претстои. Мораме да бидеме внимателни, одговорни и рационални, порача тој.

На прес-конференцијата, Андонов ги повика субјектите од прехранбениот сектор, комуналните дејности и образовните институции да се пријават за субвенционирана електрична енергија која ќе ја добиваат од ЕСМ продажба.

Со одлука на Владата, прехранбениот сектор, односно производството на основни продукти, млеко, месо, леб, масла и друго, ќе добиваат електрична енергија по цена од 80 евра за мегават час, со цел намалување на основните продукти за живот.

Намалувањето на цените на некои од овие продукти веќе може да се забележи, а истото е пренесено и од дел од медиумите. Ова е дел од ветувањето на Владата дека храна оваа зима ќе има за сите. Навремено се преземаат сите мерки за стабилизација и намалување на цените и даваат резултат, рече Андонов, потсетувајќи дека комуналните претпријатија кои вршат дејност снабдување со вода, како и основните и средните училишта ќе добиваат електрична енергија по цена од 95 евра за мегават час.

Извор: МИА