Од вчера прехрамбените компании во земјата произведуваат без субвенционирана електрична енергија на слободниот пазар од 80 евра по мегаватчас.

Бидејќи поголемиот дел од нив не ги намалија цените на производите, државата одлучи да ги раскине договорите за евтина струја со нив, а паралелно донесе одлуки за замрзнување на цените на некои од нив.

Оваа субвенционирана струја од минатата година околу 400 прехрамбени компании ја добиваа од ЕСМ 

Од Владата претходно информираа дека нема да има последици, односно одговорност, за ваквото повлекување на мерката која се финансираше од буџетот, бидејќи неиспочитуваниот договор бил џентламенски со коморите.

Министерството за економија соопшти дека утре ќе биде донесена одлука за замрзнување на цените на овошјето и зеленчукот, при тоа откривајќи дека се работи за домати, крастивици, кромид, карфиол, пипер, грав, леќа, банани, портокали, мандарини и лимон.

Анализите на податоците за овие производи се завршени, а минситерот за економија Крешник Бектеши најави дека листата може да биде проширена.

Ги повикувам граѓаните да дадат исто така придонес во делот на дополнување на листата на производи како и на цените на кои тие сметаат дека треба да се замрзнат во делот на овошје и зеленчук или други производи! Се грижиме ЗАЕДНО!, објави министерот за економија Крешник Бектеши.
Останува утре да се види која ќе биде максималната цена за овие производи и од кога ќе започне да важи одлуката.

Премиерот Димитар Ковачевски, заедно со српскиот претседател Александар Вучиќ и албанскиот премиер Еди Рама, денеска остварија трилатерална средба во Бардолино, Италија, како дел од програмата на работната посета на меѓународниот саем за вино „Винитали“, каде лидерите ќе учествуваат на презентациите на вината од трите земји на заедничкиот штанд на Отворен Балкан.

Како што информираа од Владата, на средбата се разговарало за имплементација на активностите во рамките на регионалната иницијатива Отворен Балкан, како и заедничкото учество на меѓународниот саем за вино „Винитали“, кој годинава се одржува по 55-ти пат.

Беше истакнато дека со заедничкото претставување на саемот „Винитали, еден од винските саеми со највисок квалитет на глобално ниво, го носиме и промовираме винскиот и туристичкиот квалитет на трите земји поблиску до светската публика и потенцијалните инвеститори.

Констатирано е дека на заедничкиот Отворен Балкан штанд, македонските, српските и албанските винарии и вина стојат рамо до рамо со светските врвни производители. На заедничкиот настап на трите земји на саемот за вино „Винитали“ се гледа како огромна можност за промоција, вмрежување, привлекување на странски инвеститори и отварање нови пазари“, соопштија од Владата.

На средбата било потенцирано дека од летово можноста за слободен пристап до пазарот на труд за граѓаните од трите земји станува реалност.

Правото на пристап до пазарите на труд во трите држави ќе се стекнува многу побрзо и поедноставно, со електронско издавање на Отворен Балкан идентификациски број и издаден единствен матичен број за странец од Министерство за внатрешни работи, по извршените соодветни проверки, посочија од Илинденска.

После средбата, Вучиќ рече дека разговарале за тоа како да им се помогне на обичните луѓе и како да се отстранат сите пречки за да се овозможи слободна трговија и слободен проток на стоки. Тој истакна дека е постигнат договор за завршување на процесот на осигурување на работните дозволи, што ќе биде основа на економската соработка на трите држави.

Имавме плодни дискусии за прашања поврзани со прашањето за Отворениот Балкан. Разговаравме како можеме да ги отстраниме сите пречки, да овозможиме слободна трговија и проток на стоки, услуги и капитал. Разговаравме и за многу други прашања поврзани со безбедноста на храната и како да се обезбеди пристап до други земји.

Разговаравме и за електронските картички за сите луѓе за да можат да се усогласат. Таа ситница означува многу голем напредок. Разговаравме и за приемот на нови идентификациони картици и сите тројца се согласивме дека ќе можеме да направиме одреден напредок по тоа прашање во наредните месеци. Се договоривме за завршување на процесот за обезбедување работни дозволи и тоа ќе биде, се осмелувам да кажам, основата на економската соработка меѓу нас – рече Вучиќ.

Даночниот советник Павле Гацов објави дека во првите два месеци од 2023 има голем пад на наплатата на ДДВ, што алудира на гопемо намалување на потрошувачката кај граѓаните, и покрај тоа што периодот е засегнат со рекордна инфлација.
„ДДВ-то во „илегала“ за првите два месеци од 2023 година! Високиот раст не цените за првите два месеци од 2023 година не испорача висок раст на приходите од ДДВ во Буџетот на Македонија !!?? Напротив. Нето приходот од ДДВ за првите два месеци од 2023 година има пад од 6,3% споредено со истиот период претходната година. (Бруто приходот од ДДВ во 2023 година има скромен раст од 1%.)“, напиша Гацов на социјалните мрежи.
Експертот тврди дека реалниот пад на ДДВ е уште поголем ако се земе заедно со инфлацијата, а интересно е тоа што наплатата на другите даноци се зголемила.„За илустрација, цените (инфлацијата) во истиот период имаат раст од 16,9%. Од овие две бројки (6,3 + 16,9) се добива реалниот пад на нето приходот од ДДВ за повеќе од 23% !!???? Даноците на доход (данок на личен доход и данок на добивка) имаат добра наплата за правите два месеци. 

Наплатата на овие два даноци ќе продолжи добро и во наредниот период (зголемена минимална плата, зголемена просечна плата, исплата на дивиденди, ....). За данокот на добивка на ред се најиздашните месеци - март и април. Добар раст имаат и социјалните придонеси (18%), исто така темелен на растот на платите, од април натаму нивниот раст ќе биде уште подобар заради растот на платите“, анализира Гацов.