Работодавците во САД во јуни имаа рекорден број на слободни работни места, што е знак дека растот на вработувањето од претходните месеци најверојатно ќе продолжи.

Американското министерство за труд соопшти дека бројот на слободни работни места пораснал за осум проценти, на 6,2 милиони, што е најмногу откако во 2000 година започна бележењето. Сепак, вработувањето е во пад, како и бројот на луѓе кои даваат отказ.

Судејќи според тие податоци, како што наведува АП, постојат многу слободни работни места, но работодавците имаат проблем да пронајдат работници со потребните квалификации.

Вообичаено е во таквите ситуации работодавците да понудат поголеми плати за да привлечат повеќе пријави и така да го забрзаат растот на платите. Сепак, јулскиот извештај на владата за трудот, објавен во петок, покажа дека платите не започнале да растат.

Најголем број на слободни работни места е во градежната и производната индустрија, финансиите, здравството и државната и локалната управа.

Две монети од САД со номинална вредност пониска од долар поради нивната необичност на аукција се продадоа за неверојатни половина милион долари.
Секако, не станува збор за вообичаени парички, туку за ретки кованици кои токму поради тоа имаат висока колекционерска вредност.

Едната монета е искована далечната 1972 година и е позната како Бирш паричка поради остатокот од гравурата на нејзиниот ковач. Сопственикот кој долго време ја има во свој посед не бил свесен за нејзината потенцијална вредност па ја продал за само 75 долари и пропуштил шанса да се збогати.

Втората монета е со ликот на претседателот Абрахам Линколн и датира од 1943 година. Таа не е толку стара, но е посебна бидејќи е искована во погрешен метал. За време на Втората светска војна во САД било забрането да се користат одредени метали наменети исклучиво за армијата, па така монетата наместо во цинк е искована во бронза.

Затоа доколку имате стари парички, особено од времето на Југославија или постари добро проверете дали имаат некаква специфичност која би им била од значење на колекционерите, па можеби ќе ја продадете за добри пари.

Микаила Улмер има само 12 години, но е милионерка и знае се за бизнисот со пчели!

Исто така е и главен говорник, филантроп, и сопственичка на фирмата  „Me & The Bees“ (Јас и пчелите) која произведува лимонада.

Се работи за пијалок кој девојчето го развило од рецептот на баба си кој датира од 1940 година, а од него направила национален бизнис.

Откако ја освоила првата награда и 60 илјади долари, во хит емисијата Shark Tank, посветена токму на претставување на нови производи, лимонадата на малата Микаила се наоѓа на полиците во 55 продавници од познатиот ланец  Whole Food, кој се занимава со продажба на органски производи.

„Работам после училиште и откако ја завршам домашната работа, а за викенд и целиот распуст сум посветена само на тоа“, рекла Микаила за Nbcnews.

Се почнало кога Микаила имала четири години, кога во текот на една недела два пати ја каснала пчела.

„Беше баш болно. И почнав да се плашам од пчели“, се сеќава девојчето во интервју за NBCBLK.

За да ја расположи, мајката на Микаила Деандра ја убедила да направат мала истрага на интернет и тогаш наишле на податок дека пчелите во наредните години можеби ќе изумрат.

Иако убодите ја болеле, Микаила ја фатило жал за вредните инсекти, па одлучила да почне да прави лимонада со мед наместо со шеќер и вештачки засладувачи. Во разговор со мајката, сфатила дека тоа е здрав избор за луѓето, а воедно и пчелите ќе се сочуваат од изумирање.

Освен што е вредна, ова девојче има и добро срце. Таа донира еден дел од своите приходи од продажба на локалните организации кои се залагаат за чување на пчели.

„Минатата година, пчеларите изгубија дури 40 отсто од своите кошници. Пчелите изумираат. Ако исчезнат целосно, на луѓето ќе им останат само четири години живот“, предупредува Микаила.

Малата претприемничка денес патува и држи работилници на кои едуцира како луѓето да ги сочуваат пчелите.

„Импресионирана сум како таа успева да ги заврши школските обврски кога патува толку многу. Има дарба за јавен говор, но она што сум најмногу горда не е само што е паметна и зборлеста, туку што е и добра личност и што е љубезна кон луѓето. Тоа е поважно од бизнисот“, рекла гордата мајка Деандра.

Микаила моментално се занимава со пронаоѓање на нови вкусови на својата лимонада, како би ги унапредила своите производи и продажба, а во јуни патува во Африка каде што ќе ги едуцира децата на свои години за претприемништвото.

Минатата година го запознала екс претседателот Обама, кога била гостин во Белата куќа на традиционална детска вечера.

Доцнењето е најголемиот проблем кај младите луѓе во бизнис светот. Нема ниту еден од нас што не задоцнил на важен состанок во животот.

Меѓутоа, најлошо е кога доцнењето станува секојдневен проблем, кој кај некои луѓе се повторува постојано иако за тоа се опоменувани. Морате да признаете дека иако не сакате да задоцните повторно одново ви се случи.

За таа цел ви издвојуваме неколку совети за тоа како да престанете да доцните и подобро да се организирате.

По примена на овие совети ќе се чувствувате посигурно и наредниот пат кога ќе задоцните - само потсетете се дека времето е пари и најверојатно нема да ви се случи уште еднаш.

Признајте си дека имате проблем со доцнењето

Луѓето кои не гледаат на доцнењето како на проблем, никогаш нема да бидат точни. Како и за другите проблеми, за да го решите проблемот со доцнењето, прво е потребно да признаете дека го имате.

Планирајте го времето

Секој човек знае отприлика колку време му треба за да се подготви. Ако посветувате многу време на вашиот изглед, станувајте порано. Секогаш знајте ја локацијата на која треба да пристигнете, за да можете точно да си испланирате колку време ќе ви одземе да стигнете до таму.

Испланирајте си и дополнително време

Секогаш додавајте 25% повеќе кон вашето планирано време, за да бидете точни. Многу често работите не се случуваат по план, а вака вие секогаш ќе имате дополнително време, за да се извлечете во непредвидена ситуација.

Подгответе се колку што можете повеќе вечерта

Ако станувањето наутро ви е голем проблем, најдобро е да се подготвите колку што можете повеќе претходната вечер. Изберете каква облека ќе носите и подгответе ја уште вечерта. Чантата, клучевите и сè што секојдневно носите со вас, оставете го на едно место.

Легнувајте си порано

Така полесно ќе можете да се разбудите наутро и ќе имате доволно време за да ги исполните сите обврски.
Во секое време треба да знаете колку е часот. Во секој момент додека се подготвувате треба да знаете уште колку време ви преостанува. Каде и да одите, со вас имајте или часовник или мобилен.

Имајте потсетник

Дали ќе го употребите мобилниот телефон, компјутерот или обичен бележник не е важно, важно е да добиете потсетување за важните настани, на кои не треба никогаш да доцните.