Традиционалната манифестација „Бела ноќ“ ќе се одржи вечер во Скопје по 13. пат. Во рамки на програма на повеќе локации во градот ќе се одржат концерти, изложби и перформанси.

Големата изложба на генијалниот Салвадор Дали е поставена во Галеријата на Младинскиот културен центар – МКЦ. 

На плоштадот „Македонија“ вечерва перформанс ќе има корејска трупа, додека на платото на Младинскиот културен центар ќе настапи тричлен бенд од Стокхолм, предводен од американскиот композитор Николас Фараоне. Како и многу други музичари од светот и Македонија.

Во горното фоаје на кино „Фросина“, во МКЦ ќе биде поставена изложбата „Сексот и револуцијата“. Авторскиот тим Катерина Станковиќ - Бјеговиќ, ликовна уметничка, и Јелена Живковиќ, историчарка, ги претставуваат љубовните тајни на некои од најголемите имиња на револуциите.

На платото на Младинскиот културен центар ќе настапат „Barbarisms“ - тричлен бенд од Стокхолм, предводен од американскиот композитор Николас Фараоне; „Конкверинг лајон“ (Conquering Lion) - даб/реге/кросовер бенд од Тетово, кој своето творештво го започнува во април 2007; „Нинос Ду Бразил“ – перкусионистичко италијанско дуо, со позадина од бразилската карневалска музика.

Возењето во градските автобуси на ЈСП Скопје кои сообраќаат кон централното градско подрачје, од 19 часот до раните утрински часови, ќе биде бесплатно.

Во Бугарија од денеска стартува проектот „Вработени родители“. Со овој проект вработените родители, чии деца не се запишани во градинка, ќе можат да аплицираат за средства доколку детето го чува невработен родител или баба и дедо.

Невработените родители чии деца не се запишани во градинка, ќе можат од бугарското Биро за труд да добијат финансиски средства како дадилки.

Платата на „дадилките“ ќе биде минималната и ќе може да се добива во период од максимум 18 месеци. Исплатата ќе биде со европски средства од програмата „Развој на човечките ресурси”, соопштува бугарски „Блиц“.

Ако жената одгледува две деца во едно семејство, ќе добива 150 проценти од минималната плата, односно 690 лева (352 евра). Пензионираните баби и дедовци, исто така, ќе можат да се регистрираат во канцелариите за труд, за да ги одгледуваат внуците,  објаснија од Министерството  за социјални работи. .

Според пропозициите, предност ќе имаат самохрани родители, големи семејства, членови на семејства на социјална помош и други ранливи групи.

Се очекува 1.500 семејства со мали деца да аплицираат и на тој начин да се вработат најмалку 2000 невработени лица. Целите на програмата се родителите, чии деца не се запишани во установи за згрижување деца,  да можат да се вратат на работа или, ако се невработени, да можат да најдат вработување. Апликантите треба да се грижат за дете до најмногу пет години.

Невработените родители ќе можат да аплицираат за згрижување на деца, но тие ќе мора активно да бараат работа преку заводите за вработување.

Народната банка информира дека се пуштени во оптек кованите пари за колекционерски цели „Година на кучето – богата година на кучето“, „Година на кучето – безбедна година на кучето“, „Руски лавиринт“ и „50 години од Македонската академија на науките и уметностите“.

Цената на кованите пари „Година на кучето – богата година на кучето“и „Година на кучето – безбедна година на кучето“ изнесува 3.200 денари.

Цената на кованaтa парa „Руски лавиринт“ изнесува 4.300 денари, а цената на кованaтa парa „50 години од Македонската академија на науките и уметностите“ изнесува 2.500 денари.

Кованите пари за колекционерски цели издадени од Народната банка се законско средство за плаќање во Република Македонија.

Дополнителни информации за кованите пари за колекционерски цели се објавени на интернет-страницата на Народната банка на Република Македонија www.nbrm.mk.

Новата грејна сезона за потрошувачите кои се приклучени на системот на снабдување со топлинска енергија Балкан енерџи во Скопје (БЕГ) стартува од утре, велат од компанијата и потенцираат дека Регулаторна комисија за енергетика (РКЕ) даде одобрение за старт на грејната сезона пред вообичаениот почеток на 15 октомври поради падот на температурите.

– Законската регулатива предвидува доколку, според податоците на Управата за хидрометеоролошки работи на РМ, прогнозираната средна надворешна температура за наредниот ден е еднаква или помала од 12 степени Целзиусови, снабдувањето со топлинска енергија на тарифните потрошувачи може да почне и пред 15 октомври, но не и пред 1 октомври, и тоа по претходно одобрение од РКЕ, појаснуваат од БЕГ.

Според нив, почетокот на грејната сезона порано од вообичаено нема да донесе зголемување на авансните сметки што ги добиваат граѓаните.

– Согласно прописите секој ден до 15 октомври се следи временската прогноза и само доколку прогнозата за средната надворешна температура е еднаква или под 12 степени Целзиусови ќе има испорака на топлинска енергија. Во деновите кога прогнозата за средната надворешна температура ќе биде повисока од 12 степени Целзиусови, испорака на топлинска енергија нема да има, велат од БЕГ и додаваат дека од 15 октомври до 15 април ќе се врши редовна испорака на топлинска енергија, согласно утврдените правила и во континуитет.

Од БЕГ апелираат потрошувачите да ги отстранат евентуалните пречки и дефекти во внатрешната инсталација и тоа веднаш да го пријават во Снабдување со топлина Балкан Енерџи. Истовремено заедниците на станари или управителите на зградите да овозможат непречен пристап на службените лица до топлинската станица, како и да обезбедат постојано напојување на топлинската станица со електрична енергија (платени сметки за електрична енергија, за топлинската станица и за функционална електрична инсталација).

Компанијата ги информира сите потрошувачи дека евентуалните дефекти се пријавуваат на телефонскиот број 02/3076-200, на следниот линк http://beg-snabduvanje.com.mk/customers/pregled-i-veb-prijava-na-defekt/ или со СМС порака на следниве телефонските броеви: 076 350 298, 078 207 056 и 070-369-337.