Холандија е избрана за најбезбедна држава за патување во 2026 година, според најновото истражување на туристичката агенција „Berkshire Hathaway Travel Protection“. Годишната ранг-листа, која веќе десет години ги анализира земјите според безбедноста за туристите, ги зема предвид политичката стабилност, инфраструктурата и стапката на криминал. Според извештајот, Холандија особено се издвојува како безбедна дестинација за жени, ЛГБТ заедницата и посетители од различно потекло, иако во големите градови како Амстердам се препорачува зголемено внимание поради интензивниот велосипедски сообраќај.

На второто место се најде Австралија, благодарение на ниската стапка на криминал и стабилниот општествен систем, но со јасна препорака туристите строго да ги почитуваат правилата за внесување храна и да бидат внимателни поради специфичната флора и фауна. Австрија за првпат влегува меѓу водечките безбедни дестинации, пред сè поради политичката стабилност и добро организираните институции, иако експертите предупредуваат на можни ризици при повремени протести. Исланд, кој традиционално важи за една од најбезбедните земји, оваа година бележи пад на листата поради зголемената вулканска активност што влијае врз авионскиот сообраќај и туристичките рути.

Во продолжение на листата се Канада, Нов Зеланд, Швајцарија, Јапонија и Ирска. Иако сите овие земји се оценети како исклучително безбедни, извештајот посочува и конкретни ризици: мали кражби во урбани средини во Канада, непредвидливи услови на авантуристички локации во Нов Зеланд, лавини и нагли временски промени во Швајцарија, строги правила за внесување лекови во Јапонија и сообраќајни предизвици за туристите во Ирска поради возењето по левата страна. Истражувањето покажува дека и најбезбедните дестинации бараат информираност и претпазливост од страна на патниците.

Тагови: дестинација земји патување

Современото работно темпо често носи кратки рокови, постојани обврски и чувство дека мораме да бидеме достапни во секое време. Иако притисокот на работа понекогаш е неизбежен, важно е да научиме како да го заштитиме сопственото ментално здравје пред стресот да прерасне во исцрпеност и burnout.

Еве неколку начини кои можат да ви помогнат да останете психички стабилни и продуктивни, дури и во најхаотичните работни денови:

1. Поставете јасни граници

Не мора секогаш да одговарате на пораки по работното време. Кога работата почнува да навлегува во секој дел од денот, мозокот нема време да се одмори. Поставувањето граници не е мрзеливост – туку здрав начин на функционирање.

2. Правете кратки паузи

Дури и неколку минути одмор можат да направат голема разлика. Кратка прошетка, кафе пауза или неколку минути без екран му помагаат на мозокот повторно да се фокусира.

3. Не се обидувајте да бидете совршени

Перфекционизмот често создава дополнителен стрес. Понекогаш „доволно добро“ е сосема доволно, особено кога работите под голем притисок.

4. Научете да кажете „не“

Преземањето премногу обврски може брзо да доведе до ментална исцрпеност. Важно е реално да процените колку можете да постигнете без да го загрозите сопствениот мир и енергија.

5. Одвојте време за себе после работа

Работата не треба да биде единственото нешто во денот. Хоби, физичка активност, дружење или едноставно време без обврски помагаат да се намали стресот и да се „ресетира“ умот.

6. Зборувајте кога чувствувате притисок

Не мора сè да носите сами. Разговор со колега, пријател или професионалец може да помогне многу повеќе отколку што мислите.

7. Препознајте ги знаците на burnout

Постојан замор, недостаток на мотивација, нервоза и чувство на исцрпеност се предупредувачки сигнали кои не треба да се игнорираат. Колку порано реагирате, толку полесно ќе ја вратите психичката рамнотежа.

Вашето ментално здравје не е луксуз

Успехот на работа не значи ништо ако постојано се чувствувате исцрпено и под стрес. Грижата за менталното здравје не ве прави помалку професионални туку ви помага да бидете подобри, пофокусирани и поздрава верзија од себе и на работа и надвор од неа.

Прочитајте и за: 7 причини поради кои претпоставените мислат дека не давате максимум на работа

Тагови: ментално здравје совети за работа

Секој работник има законски загарантирано право на платен годишен одмор, но дали знаете колку денови одмор ви следуваат и како може да ги искористите?

Според Законот за работни односи, работникот има право на платен годишен одмор од најмалку 20 работни дена. Со колективен договор или договор за вработување, овој број може да се зголеми и до 26 работни дена, во зависност од работното искуство, условите за работа, сложеноста на работните задачи, возраста и други критериуми.

Во деновите на годишен одмор не се пресметуваат празници, викенди, денови на боледување и други оправдани отсуства од работа.

Работникот кој првпат заснова работен однос стекнува право на целосен годишен одмор по шест месеци непрекината работа, без разлика дали работи со полно или скратено работно време. Доколку не го исполни овој услов, има право на пропорционален дел од одморот  по два дена за секој месец работа.

Годишниот одмор може да се користи во повеќе делови, но еден дел мора да трае најмалку 12 работни дена без прекин. Работодавачот е должен да му овозможи на работникот да искористи најмалку 12 работни дена до крајот на тековната календарска година, додека остатокот може да се искористи најдоцна до 30 јуни наредната година.

Доколку работникот не можел да го искористи одморот поради боледување, породилно отсуство или отсуство за нега на дете, неискористените денови може да ги искористи до 30 јуни следната календарска година.

Законот предвидува и дека работникот има право еден ден од годишниот одмор да го користи по сопствен избор, доколку тоа не го нарушува работниот процес, а за тоа треба да го извести работодавачот најмалку три дена однапред.

Тагови: боледувања годишен одмор платено отсуство породилно отсуство празници работнички права

Изминатиот викенд, East Gate Mall беше домаќин на најголемиот кариерен настан во земјата – KARIERA DAYS Vol.3. Во организација на KARIERA.mk  и East Gate Mall, овој настан на 15 и 16 мај понуди два дена исполнети со професионални можности, директни интервјуа и многу инспирација за сите кои сакаат да направат чекор напред во својата кариера.

Главниот фокус на настанот беа компаниите кои со својата визија и отворени позиции привлекоа стотици посетители. Огромна благодарност до сите партнери кои го направија овој настан возможен и понудија реална шанса за вработување:

На своите штандови, посетителите ги пречекаа тимовите на:

• Макстил и ВДЛ Бус Македонија – како претставници на индустрискиот гигант и производството;
• Lidl, Жито Маркети и КАМ Маркет – лидерите во секторот на маркети;
• Fashion Group и LPP – за сите вљубеници во модната индустрија;
• Адмирал и KFC – кои донесоа енергија од секторот услуги и угостителство;
• Credi-Yes, Винком, Транском и Мотиви – клучните играчи во финансискиот и бизнис секторот;
• УТМС Скопје – кои ги презентираа образовните патеки за идните професионалци;
• Светот на Колорес и ФС Штампа ХИЛ – креативниот центар на настанот;
• East Gate Mall – како домаќин и партнер на ова успешно издание.

Ова издание на KARIERA DAYS стави посебен акцент на практичноста. Преку популарните speed interview сесии, кандидатите имаа „брзи состаноци“ со работодавците, што се покажа како најефикасен начин за првична селекција на таленти.

Покрај официјалните разговори, атмосферата беше збогатена со интерактивни активности, каде преку „Тркалото на среќата“ посетителите освојуваа награди, но и добиваа вредни совети за тоа како да го подобрат своето претставување на пазарот на труд.

KARIERA DAYS Vol.3 заврши со стотици пополнети апликации, остварени пријателства и професионални вмрежувања. Благодарност до сите компании и посетители кои беа дел од оваа успешна приказна.

Продолжуваме заедно кон нови кариерни победи! Се гледаме на следното издание!

Тагови: kariera days креативност саем за вработување успешни компании