Коj стои зад Orange Peel и како започна целата приказна?
Јас сум Елизавета, по потекло од Украина. Сакав да создадам нешто што ќе им се допадне на Македонците и што ќе може да се понесе како подарок за семејството и пријателите. Свеќите Orange Peel се инспирирани од градовите, природата и атмосферата на Македонија. Секој мирис е обид да се пренесе едно расположение, сеќавање или чувство поврзано со одредено место.
Сите свеќи се изработуваат рачно: јас ги избирам мирисите, ги правам свеќите, ги пакувам нарачките и ја водам страницата. Па така, ако ѝ пишете на Orange Peel, најверојатно комуницирате токму со мене.
Дали имашe момент кога сфати дека ова може да прерасне во нешто поголемо?
Да бидам искрена, засега само експериментирам и гледам каде ќе ме однесе овој пат. Но, навистина се надевам дека од Orange Peel ќе израсне нешто убаво, пријатно и омилено за многу луѓе.
Како изгледа еден твој „креативен ден“?
Обично наутро, кога има убава дневна светлина, снимам фотографии и видеа за страницата. Потоа ги излевам свеќите ако треба да се дополнат залихите, или пак ги поправам оние што не зацврстиле баш онака како што сум сакала.
Соиниот восок е прилично пребирлив материјал - при ладењето се собира и понекогаш создава празнини или нерамнини, па затоа на некои свеќи им треба малку дополнително внимание.
Исто така, ги пакувам и ги испраќам нарачките, доколку ги има. Всушност, зад еден мал бренд стои многу невидлива работа, но токму тоа најмногу ми се допаѓа.
Дали секоја свеќа има своја „приказна“?
Да, околу тоа и се гради идејата на брендот. Некои мириси се прилично буквални. На пример, свеќата „Галичица“ мириса на кедар, бор и мов - речиси како самата шума. Други мириси се повеќе асоцијативни. На пример, „Охрид“ е инспириран од летото охридскиот крај: зрели сливи, вишни и малку ванила.
Има и мириси кои предизвикуваат дискусии. За мене Скопје мириса на манго и кокосово млеко. Овој град ми делува модерен, жив и малку неочекуван. Но, моите пријатели воопшто не се согласуваат со овој избор.
Асоцијациите се многу субјективна работа. Еден и ист мирис може кај различни луѓе да разбуди сосема различни места, моменти и сеќавања, и тоа е сосема во ред.
Колку експериментираш додека го добиеш совршениот производ?
Секако, производ како што се свеќите мора да се тестира. Погрешната големина на фитилот може да предизвика „тунелирање“ кога свеќата гори само во средината. Исто така, погрешно пресметаниот процент на ароматично масло може да доведе до тоа свеќата да не биде доволно миризлива. Но, јас се држам до едно едноставно правило: подобро е да ја покажуваш својата работа отколку постојано да ја усовршуваш и никогаш да не почнеш. Затоа, кога сум задоволна од резултатот и кога сите технички детали се средени, ја споделувам готовата свеќа со вас.
Кој мирис ти е лично омилен и зошто?
Малку ми е жал, но мојот омилен мирис од линијата се покажа како најмалку популарен. „Зелен пазар“ мириса на грејпфрут и нане свеж, жив мирис со блага горчина, исто како вистински грејпфрут.
Како го градиш својот бренд и препознатливост?
Засега само социјалните мрежи, особено видеата. Во иднина планирам да учествувам на базари.
Каде ги гледаш Orange Peel во иднина?
Се надевам дека Orange Peel ќе продолжи да расте и да создава свеќи инспирирани од градови, природа и моменти од Македонија, притоа задржувајќи го рачниот пристап и личниот допир.
Какви реакции најчесто добиваш од клиентите?
Сите повратни информации се многу топли и позитивни. Луѓето често пишуваат колку им се допаѓаат мирисите а тоа е огромна инспирација. Јас самата не сакам тешки мириси, па затоа свеќите на Orange Peel се создадени да бидат лесни и пријатни, дури и за оние кои обично не сакаат парфимирани ароми.
Што би им порачала на луѓето што сакаат да започнат нешто свое?
Пронајдете го она што сакате да го правите и размислете што им е потребно на луѓето во моментов токму таму се раѓа вашиот идеален производ. Ако чекате сè да стане совршено, можеби никогаш нема ни да почнете. Едноставно направете го вашиот прв чекор. Ова се принципите до кои и самата се трудам да се придржувам.
Тагови: креативност Македонија уметност свеќи