Канада подготвува нови правила со кои на децата под 16 години ќе им биде забрането да отвораат профили на социјалните мрежи, освен ако платформите докажат дека имаат доволно силни механизми за заштита на малолетниците.

Канадската влада го претстави Законот за побезбедни социјални медиуми, со кој се воведуваат построги обврски за социјалните мрежи и за дел од услугите базирани на вештачка интелигенција. Целта е платформите да бидат дизајнирани така што безбедноста на децата ќе биде вградена уште од самиот почеток, а не да се реагира само откако ќе настане штета.

Според предлогот, социјалните мрежи ќе треба да ја ограничат можноста децата под 16 години да имаат профили, да намалат изложеност на штетни содржини, да воведат јасно означување на содржини создадени со вештачка интелигенција и да обезбедат полесни начини за пријавување и блокирање корисници.

Платформите ќе имаат обврска брзо да отстрануваат содржини што злоупотребуваат деца, повторно ги повредуваат жртвите или се создадени без согласност. Предвидени се и правила за длабоки фалсификати, како и за содржини што можат да предизвикаат сериозна штета кај малолетници.

Законот опфаќа и услуги со четботови со вештачка интелигенција, но за нив засега не се воведува старосна забрана како кај социјалните мрежи. Наместо тоа, компаниите ќе треба да покажат дека ги намалуваат ризиците од штетна комуникација и дека имаат јасни правила за постапување во кризни ситуации.

За спроведување на новите правила ќе биде формирана независна Комисија за дигитална безбедност на Канада, која ќе ги следи платформите, ќе постапува по жалби и ќе може да изрекува казни.

Според канадските власти, целта е да се намали штетното влијание на социјалните мрежи врз младите и да се стави поголема одговорност врз технолошките компании. Предлогот доаѓа во период кога слични ограничувања се разгледуваат или воведуваат и во други земји, по примерот на Австралија.

Тагови: забрана на социјалните мрежи закон Канада

Европската Унија воведува нови правила за транспарентност на платите, со кои работодавците ќе треба појасно да ги откриваат платните распони и евентуалните разлики во примањата меѓу мажи и жени за иста работа. Додека во Македонија во огласите и натаму најчесто стојат формулации како „редовна плата“ и „одлични услови“, без конкретна сума, експертите предупредуваат дека ваквата практика го става работникот во нерамноправна позиција уште пред почетокот на преговорите.

Економистите оценуваат дека поголемата отвореност не е „европска мода“, туку неопходност и за домашниот пазар на труд. Според нив, јасно наведениот распон на плата во огласите, како и правото работникот да побара информација дали е платен во рамки на просекот за својата позиција, може да помогне во намалување на неправдите, манипулациите и договорите зад затворени врати. Особено значајно, велат познавачите, тоа би било за младите и за жените, кои полесно би можеле да проценат дали условите се фер.

Сепак, работодавците предупредуваат дека новите обврски би можеле да бидат товар, особено за малите фирми и семејните бизниси. Затоа, како најреален модел се споменува постепено воведување — најпрво кај големите компании и јавниот сектор, а потоа со поедноставени правила и кај помалите работодавци. Пораката од експертите е јасна: Македонија не мора слепо да ја копира ЕУ, но платата не смее да остане тајна, бидејќи таа е основен договор меѓу работникот и работодавачот.

Тагови: ЕУ Македонија плата работници

Собранието го усвои новиот Закон за игрите на среќа и забавните игри, со кој се воведуваат значително построги правила за работа на казината, автомат клубовите и приредувачите на електронски игри на среќа. Според новите одредби, овие објекти ќе можат да работат само ако се наоѓаат на најмалку 500 метри од основните и средните училишта. Обложувалниците се изземени од ова правило, но во нивните уплатно-исплатни места во близина на училишта нема да смее да има видеолотариски терминали и терминали за електронски игри на среќа.

Законот предвидува и строги ограничувања за рекламирањето, со забрана коцкањето да се прикажува како пат до финансиски успех, решавање економски проблеми или општествен престиж. Не ќе биде дозволено ниту користење познати личности во реклами што асоцираат дека нивниот успех е поврзан со игрите на среќа. Една од клучните новини е и обврската секој автомат и видеолотариски терминал да има ГПС-уред поврзан со Управата за јавни приходи, со цел постојан надзор и спречување нелегално поставување.

Со измените се укинува можноста една лиценца да важи за повеќе деловни простории, а операторите ќе плаќаат посебни надоместоци за секој нов објект и ќе мора да обезбедат повисоки банкарски гаранции. Во законот се вградени и препораките на MONEYVAL за посилна контрола против перење пари и финансирање тероризам. Сепак, мерките предизвикаа реакции во индустријата, од каде предупредуваат дека затворање на легални објекти може да остави без работа околу 10.000 луѓе и да поттикне раст на сивата економија.

Тагови: казино собрание училиште ГПС

Променливо облачно време со пониски дневни температури и повремени врнежи од дожд. На одделни места врнежите ќе бидат поинтензивни, проследени со грмежи, засилен ветер и можност за изолирана појава на град. Ќе дува умерен до засилен северен ветер, а дожд. Повардарието повремено ќе достигнува и поголема брзина од 60 km/h.

Во Скопје ќе преовладува променливо облачно и посвежо време, со услови за повремен дожд во претпладневните часови. Ќе дува умерен до засилен северен ветер, кој во одредени делови од котлината повремено ќе биде и силен.