Собрението денеска го донесе Законот за отпишување камати за наплата на долгови што произлегуваат од услуги од вршители на комунални дејности, телефонија, мобилни и кабловски оператори и одржување на заеднички простории.

Законот за отпишување на камата за наплата на долгови обезбедува отпис на затезната односно казнената камата, што се однесува на главниот долг и на трошоците на постапката за комунални дејности, електрична, топлинска енергија, вода и смет, телефонија, мобилни и кабелски оператори, одржување на заеднички простории, наводнување и одводнување на земјоделско земјиште, вклучувајќи ги и трошоците на постапката од страна на должникот.

Законот предвидува отпишување на каматата што се пресметува од поднесување на тужбата за присилна наплата на паричниот долг, до конечна исплата на паричното побарување.

Станува збор за проблем со кој граѓаните се соочуваат од 2011 година, кога извршните предмети од судовите се пренесени кај нотарите, а потоа тие завршуваат кај извршителите. Во тој процес најголеми жртви се граѓаните кои се соочија со огромни затезни и казнени камати за предмети за кои не биле ни свесни дека постојат, ниту пак дека има предлози за присилна наплата.

Отпис на долговите, согласно законот, се врши врз доброволна основа од страна на доверителот.

Доверителите, кои се во приватна сопственост, доброволно одлучуваат преку своите органи на управување, за едностран опис на побарувањата по основ на наплатата на затезната, односно казнената камата на главниот долг од должниците физички лица кои стекнале право на отпис на камата согласно член 3 од овој закон.

Доверителот е должен во рок од 15 дена по приемот на доставениот доказ за извршена уплата на главниот долг, да го извести должникот по писмен пат со препорачана пратка на адресата што е регистрирана кај доверителот, за усвојување (целосно или делумно) или за одбивање на отписот на каматата. Доколку доверителот изврши отпис на каматата, должен е веднаш, но не подоцна од осум дена по донесената одлука, за истото да го извести нотарот или извршителот кај кого било трансферирано решението за извршување издадено од судот, дека е исплатен главниот долг и извршен е отпис на каматата, заради што бара запирање на постапката пред нотарот или извршителот.

Тарифата за награда и надоместок на другите трошоци за работата на извршителите и нотарите (по предмети кои произлегуват од овој закон) и од услуги утврдени со член 1 од овој закон, по претходно прибавено мислење од Комората на извршителите и нотарите, ја донесува министерот за правда во рок од 30 дена од денот на влегување во сила.

Во рамки на 65 седница пратениците дадоа поддршка и на измените на Законот на државна статистика, дополнувањата на Законот на аудио-визуелни добра, измените на Законот за академија за наставници, на Законот за наставници во основните и средните училишта, дополнувањата на Законот за пензиско и инвалидско осигурување, а во прво читање поминаа измените на Законот за нотаријат и измените и дополнувањата на Законот за извршување.

По завршување на оваа седница, пратениците требаше да продолжат со работа по 66 седница, но по барање на координаторот на пратеничката група на ВМРО-ДПМНЕ Никола Мицевски претседателот на Собранието Талат Џафери даде пауза од 30 минути.

Од јануари влезот во скопската Зоолошка градина најверојатно ќе поскапи. Цената ќе се зголеми само кај билетот за возрасни и тоа од 50 денари на 80 денари, пренесува Вечер.

Билетот за децата останува ист 50 денари за дете, а влезот за деца до три години исто така ќе остане бесплатен. Ова е предлогот на менаџментот на скопската Зоолошка кој ќе го достави на усвојување пред градските советници и кои ќе одлучат дали ќе има или не зголемување на цената. Како причина за барањето за повисока цена од ЗОО Скопје ги наведуваат низата инвестиции преземени изминатите месеци, како и пристигнувањето на новите животни кои носат нови трошоци.

-За цената на влезот не одговарам лично јас одговараат и градските власти. Предлогот доага од мене, но предлогот ќе биде доставен кога ќе завршиме со некои инвестиции и кога ќе пристигнат новите животни тогаш ќе бараме да ја покачиме цената на картата бидејќи ќе треба храна за сите тие животни и одржување на зоолошката. Тоа би било од јануари следната година и не би било драстично зголемување плус 30 денари на билетот за возрасни, вели директорот на ЗОО Скопје, Ѓорѓи Галетановски.

Во изминатиот период скопската Зоолошка го заврши живеалиштето на слоновите кое чини 400.000 евра, а од септември пристигнаа и двете слоници Даела и Дуња кои одлично се прилагодија на условите во зоолошка. Се доопремува и живеалиштето на шимпанзата кое исто така чини околу 250.000 евра. Се поставија и грејачи во живеалиштето на нилскиот коњ Буцо, а се инвестираше и во заштитните огради на животните.

Во меѓувреме интензивно се работи на чистење на живеалиштата во зоолошката, како и реновирање на најстарите живеалишта. од зоолошката планираат до крајот на летото да ги донесат и пингвините, а нивното живеалиште допрва треба да се доградува. Од летото пак досега во зоолошка редовно се организираат настани за најмладите, пред се дружба со омилените ликови од цртаните серии. Новите жители и инвестиции се одразија на зголемен број на посетители дури за 300 отсто. Од скопската Зоолошка велат дека целта им е да станеме европска зоолошка по примерот на големите метрополи.

Денеска напладне Регулаторна комисија за енергетика треба да ги соопшти новите цени на горивата на Македонија.

Со последната промена пред две недели, малопродажните цени на бензините се намалија за 4,5 денари, на дизелот за три денари, а на екстра лесното гориво за 3,5 денари.

Малопродажната цена на дизелот ЕУРОДИЗЕЛ (Д-Е V) изнесува 64,50 ден/лит, додека малопродажната цена на Екстра лесното масло за домаќинство (ЕЛ-1) изнесува 53 ден/лит. 

Цената на ЕУРОСУПЕР БС-95 изнесува 67 денари за литар, додека ЕУРОСУПЕР БС-98 изнесува 69,00 денари за литар.

Денеска се очекува повторно намалување на цените, бидејќи цената на суровата нафта е во слободен пад.

За помалку од 2 недели, цената е пониска за 10 долари за еден барел, што гарантира големо, можеби и историско намалување на малопродажните цени на горивата во Македонија. 

За очекување е секој од дериватите да поевтини за околу 5 денари по литар, доколку Регулаторната комисија за енергетика се држи до пресметките.

Службите за хомологација ќе одредуваат кое возило каква налепница ќе добие при спроведувањето на најавената мерка против загадување, потврдиле од Министерството за економија за „Мета“. Со тоа се расчистуваат шпекулациите дека ќе се мерат издувните гасови на автомобилите пред да биде одредена зелена, жолта или црвена боја.

Постапката за еколошка категоризација  на моторните возила, започнува со поднесување на барање со документација за возилото (сообраќајна дозвола, фотокопија од потврда за сообразност- СОС сертификат и други документи за да се утврди дека конкретното возило кога е произведено и кој ЕУРО стандард на емисии го исполнува) од сопственикот на возилото до техничката служба. Техничката служба ја разгледува доставената документација, ја утврдува еколошката категорија и издава потврда и еколошка налепница во соодветна боја. Техничката служба не врши мерење на емисии на гасови од моторот на возилото, туку прави идентификација на документацијата на моторното возило, објаснија од Министерството за економија.

Предлог-законот што ја предвидува оваа новина веќе влезе во собраниска процедура, Категоризацијата за еко-налепницата ќе се прави еднократно, а бојата може да се промени само ако во возилото се вгради уред за течен нафтен гас, или метан, со што возилото би можело да помине во повисока категорија.

Новите прописи би стапиле на сила шест месеци откако законот ќе биде усвоен и објавен во „Службен весник“.

Правилниците и одредбите ќе се донесуваат од општините и Град Скопје по донесувањето на законот.