Трамвајот кој градоначалникот Петре Шилегов најави дека ќе се гради во Скопје, ќе го затвори за сообраќај центарот на градот. Во најстрогиот центар, на улицата Димитрие Чуповски односно на Рекорд, нема да се движат коли, туку ќе биде дозволено да минува само трамвајот и автобусите од градскиот превоз.

Според сообраќајниот проект и техничкото решение изготвени од „Загребски електричен трамвај“ (ЗЕТ), се предвидува трасата да почнува од кружниот тек кај комплекстот Порта Влае, низ булеварот Партизански одреди преку Рекорд и Собранието, потоа да минува покрај зградата на Црвен крст кон Комплекс банки, Железничката станица, па преку булеварот Јане Сандански до крајната станица во Ново Лисиче каде сега е последната станица на автобуските линии 5 и 15.

Според решението, се предвидува трамвајот да се движи низ средината на булеварот Партизански одреди. Низ Плоштадот и покрај кејот, поради градбите кои низ годините никнуваа не може да минува, па затоа ќе оди низ центарот на градот. Сегашната технологија овозможува до 2 километри од трасата да не биде приклучена  на струја, што значи дека низ центарот може да не се поставува електрична мрежа, вели градоначалникот Шилегов.

Шилегов на 26 декември за САКАМДАКАЖАМ.МК изјави дека во соработка со збратимениот град Загреб, од јануари годинава се работело на техничко решение за изградба на првата фаза на трамвајот од Ново Лисиче до Ѓорче Петров, а вгодина се очекува да стартува реализацијата на овој капитален проект за Скопје кој ќе го помогне и Владата.

ШИЛЕГОВ ЌЕ ГРАДИ ТРАМВАЈ ВО СКОПЈЕ, ПРВАТА ТРАСА ОД НОВО ЛИСИЧЕ ДО ЃОРЧЕ ЌЕ ЧИНИ 150 МИЛИОНИ ЕВРА

Според првичните проценки, изградбата би чинела од 130 до 150 милиони евра. Парите ќе се бараат од европски фондови или од буџетот на Владата. Шилегов вели дека од 130 до 150 милиони евра за изградба на шините, депото и набавка на возила не е прескапо, особено ако се има предвид дека за набавката на двокатните кинески автобуси биле потрошени 80 милиони евра и повторно имаме проблем со јавниот транспорт во Скопје.

Заедно со премиерот Зоран Заев и министерот за финансии Драган Тевдовски ги разгледувавме финансиските можности. Во фаза сме да се обратиме до нашите европски партнери да го помогнат развојот на Скопје или Владата да одлучи да изврши финансирање. За мене е многу важно дека Градот конечно ги создаде условите да започне со реализација на овој проект, очекувам дека поддршката од Владата, како што најави и премиерот Заев, ќе биде сестрана и дека во текот на наредната година ќе почнеме со реализација на овој проект. Трамвајот во еден град го менува самиот град, го менува ликот на градот, навиките на граѓаните. Моите очекувања се дека со реализација на овој проект многу брзо јавниот транспорт во Скопје ќе стане финансиски исплатив имајќи предвид дека сега Град Скопје издвојува 9 милиони евра од буџетот за помагање на јавниот транспорт. Ова е едно трајно решение и повеќедецениска желба на скопјани, рече Шилегов.

Во 2019-та година македонските граѓани ќе имаат седум продолжени викенди. Од вкупно 11 неработни денови за сите граѓани, седум се поврзуваат со викендот, за разлика од годинава, која имаше четири продолжени празнични викенди.

Првиот продолжен викенд в година ќе биде за Божик, зашто неработен ден е 7 јануари, понеделник. Слична е ситуацијата и со христијанскиот празник Велигден, кој в година како неработен е на 29 април, понеделник. Неработниот ден за 24 Мај –  „Св. Кирил и Методиј“, Ден на сесловенските просветители, е в петок, така што граѓаните ќе одмораат уште еден продолжен викенд. Продолжен викенд има и за Денот на Републиката – 2 Август, кој е в петок, како и за Денот на независноста – 8 Септември, кој е в недела, но неработниот ден се префрла за 9 септември.

Денот на народното востание – 11 Октомври е уште еден неработен ден што се врзува со викенд, бидејќи е в петок, додека 8 Декември – „Св. Климент Охридски” е в недела, а неработниот ден се префрла за понеделник, 9 декември.

За сите граѓани неработни денови се и 1 јануари (вторник), 1 Мај – Денот на трудот (среда), 4 Јуни (вторник) – Рамазан бајрам, и 23 Октомври (среда) – Ден на македонската револуционерна борба и 8 Декември.

Граѓаните од православна вероисповед најмногу ќе одмораат за големиот христијански празник Велигден, бидејќи за нив, освен понеделник, 29 април, неработен ќе биде и петок, 26 април. Продолжен викенд ќе имаат и за Духовден, петок, пред Духовден на 14 јуни.

Неработни денови за православните верници се и Бадник на 6 јануари, недела, 19 јануари (сабота) и  Успение на Пресвета Богородица, 28 август, среда.

За граѓаните од католичка вероисповед неработни се и 22 април (понеделник) – Велигден, вториот ден на Велигден, 1 ноември – петок – Празникот на сите светци, како и 25 декември (среда) – првиот ден на Божик.

За граѓаните од муслиманска вероисповед неработен е и 11 август (недела) – Курбан бајрам.

Со одлука на Владата за неработен ден за јавната администрација е и 2 јануари.

Програма на неработни денови за 2019 година

Во согласност со Законот за празниците на Република Македонија (Сл. весник на РМ број 21/98 и 18/07) во 2019 година неработни денови се:

За сите граѓани на РМ

– 1 јануари (вторник), Нова година,
– 7 јануари (понеделник), Божик, првиот ден на Божик според православниот календар,
– 29 април (понеделник), Велигден, вториот ден на Велигден според православниот календар,
– 1 мај (среда), Ден на трудот,
– 24 мај (петок) „Св. Кирил и Методиј“, Ден на сесловенските просветители,
– 4 јуни (вторник), Рамазан бајрам, првиот ден на Рамазан бајрам,
– 2 август (петок), Ден на Републиката,
– 8 септември (недела), Ден на независноста, односно 9 септември (понеделник) е неработен ден,
– 11 октомври (петок), Ден на народното востание,
– 23 октомври (среда), Ден на македонската револуционерна борба,
– 8 декември (недела), „Св. Климент Охридски”, односно 9 декември (понеделник) е неработен ден.

За граѓаните од православна вероисповед

– 6 јануари (недела), Бадник, ден пред Божик,
– 19 јануари (сабота), Богојавление (Водици),
– 26 април (петок), Велипеток, петок пред Велигден,
– 14 јуни (петок), Духовден, петок пред Духовден,
– 28 август (среда), Успение на Пресвета Богородица (Голема Богородица).

За граѓаните од католичка вероисповед

– 22 април (понеделник), Велигден, вториот ден на Велигден,
– 1 ноември (петок), Празникот на сите светци,
– 25 декември (среда), првиот ден на Божик.

За граѓаните од муслиманска вероисповед

– 11 август (недела), Курбан бајрам, првиот ден на Курбан бајрам.

За граѓаните припадници на албанската заедница во РМ

– 22 ноември (петок), Ден на албанската азбука.

За граѓаните припадници на српската заедница во РМ

– 27 јануари (недела), Свети Сава.

За граѓаните припадници на ромската заедница во РМ

– 8 април (понеделник), Меѓународен ден на Ромите.

За граѓаните припадници на влашката заедница во РМ

– 23 мај (четврток), Национален ден на Власите.

За граѓаните припадници на еврејската заедница во РМ

– 9 октомври (среда), Јом Кипур, првиот ден на Јом Кипур.

За граѓаните припадници на бошњачката заедница во РМ

– 28 септември (сабота), Меѓународен ден на Бошњаците.

За граѓаните припадници на турската заедница во РМ

– 21 декември (сабота), Ден на наставата на турски јазик.

Еврото во вторник ќе наполни 20 години, временски период во кој преживеа голема криза и трајно се зацврсти на финансиските пазари и во европските паричници.

Но, без потесна интеграција на еврозоната, судено му е да остане колос на стаклени нозе, предупредуваат аналитичари.

Еврото е „родено“ на 1 јануари 1999 година, и во почетокот постоеше само како виртуелна валута што се користеше во сметководствени и финансиски трансакции. Физичката реалност ја имаше три години подоцна, а сега го користат повеќе од 340 милиони луѓе во 19 европски држави.

Валутата не беше веднаш засакана и на неа се гледаше како на зголемена цена, па така и прекарот во Германија во почетокот и беше „теуро“ што значи – скапо.

Еврото денес е популарна валута и покрај јакнењето на евроскептичните и популистички движења во голем број држави.

Во анкета на ЕЦБ 74 отсто граѓани на еврозоната сметаат дека еврото е добар за ЕУ, а 64 отсто дека бил добар и за нивната држава.

Еврото се вкорени кај населението, па дури и антиестаблишментски партии тоа мора да го признаат, вели Николас Верон од аналитичкиот центар Бругел од Брисел и Петерсон институтот за меѓународна економија во Вашингтон.

Еврото сега е втора светска валута иако се уште не може да се доведе во прашање доминацијата на американскиот долар.

Пресуден момент за еврото беше финансиската криза од 2008 година која кулминираше со спасување во неколку држави, доведувајќи ја валутната унија и заедништвото во неа на раб на „пукање“.

Експерти тврдат дека тој период открил инхерентни маани на тој проект вклучително непостоење фискална солидарност во облик на поделба на долгови, вложување и ризици или непостоење кредитори во крајна потреба. Кризата откри и економски разлики меѓу државите членки особено меѓу фискално помудриот север и презадолженито југ.

За да продолжи да циркулира во еврозоната и да се спречи закана од дефлација, пад на цените и економските активности, Европската централна банка во изминатите години презема незапамтени мерки. Одреди каматните стапки да бидат рекордно ниски, понуди евтини заеми за банките и откупи нешто повеќе од 1,6 билиони евра државни и корпоративни обврзници меѓу 2015 и 2018 година.

Бидејќи инфлацијата се доближи до саканата вредност од под два отсто, тие мерки се оценети како успешна монетарна политика.

Сепак, аналитичари забележуваат дека 19 членки на еврозоната не направиле доволно за потребните политички реформи за подобра подготовка за идни кризи и да постигнат поголема економска конвергенција.

Обидот на францускиот претседател Емануел Макрон за воведување функција министер за финансии во еврозоната или европска верзија на ММФ, отфрлени беа уште во почетокот.

ЕЦБ во меѓувреме, направи колку што можеше за да го зацврсти еврото, вели Жил Моек поранешен економист во француската национална банка.

Аналитичарот Вернон вели дека е оптимист и дека еврото зајакнало со расчистување на билансите на банките со ставање под контрола на државните долгови и вонвредните мерки на ЕЦБ.

Еврото сега е колос со стапала од цигли, а не од глина, вели тој.

Сепак, банкарската унија што долго се планира се уште не е довршена поради несогласување околу воведувањето единствена европска шема за осигурување депозити. 

Гинеколошкиот оперативен тракт на болницата „Мајка Тереза“ во Скопје беше комплетно реновиран со донација на компанијата Алма-М.

По четири децении од неговата изградба, овој дел од болницата никогаш не претрпел обнова и покрај тоа што во последните три години е забележано сукцесивно зголемување на обемот на работа и бројот на породувања од 10% на годишно ниво, сигнализирајќи дека е потребна итна реновација.

Се радувам што со Новата година, пациентите на нашата куќа ќе добиваат услуга на повисоко ниво, а нашите колеги прекрасни услови за работа. Конечно, сакам во името на целиот персонал на СБГА Мајка Тереза, да упатам јавна и огромна благодарност до Компаниите Алма-М, како главен донатор, како и Ефтинија Импектс и Темпо99, изјави директорот на болницата Башким Исмаили.

За овој проект, компанијата Алма-М како главен донатор, со помош на компаниите Ефтинија Импелс и Темпо99, издвоија над 6.000.000 денари за целосна реконструкција на 420 м2 простор, со комплетно реновирање на двете гинеколошки операциони сали, со поставување на централен довод на гасови, реновирање на одделот на интензивна нега и на сите помошни простории неопходни за работата на тимот на трактот.

Како општествено одговорна компанија, ние имаме годишен буџет за донации. Досега поголемиот дел на нашите донации биле насочени кон образованието. По неколку разговори и состаноци со директорот на клиниката д-р Башким Исмаили, одлучивме нашиот буџет за оваа година целосно да го насочиме кон оваа клиника и да извршиме реновирање на овој тракт. Оваа одлука ја донесов бидејки инвестициите во образованието се многу важни во градењето на подобра иднина, но инвестициите во здравството спасуваат животи, истакна Муарем Муртезани, сопственик на Алма-М.