На вчерашната владина седница беше прифатена предлог-програмата за обезбедување средства за болничко лекување без наплата на учество (партиципација) за пензионери и за обезбедување средства за специјалистичко-консултативни и болнички здравствени услуги за корисниците на правото на социјална парична помош во Република Македонија за 2019 година, соопшти Владата.

Според програмата, пензионерите што имаат пензија пониска од 14.000 денари се ослободени од плаќање партиципација при лекување во болнички здравствени установи. А корисниците на правото на социјална парична помош се ослободени од партиципација при користење специјалистичко-консултативни и болнички здравствени услуги во Република Македонија.

Високи казни за оние кои нема задолжително да ги кастрираат своите домашни миленици, ова е клучната измена во Законот за заштита и благосостојба на животните, предложен од страна на група пратеници од власта, со кој тие се убедени дека ќе се намали бројот на улични кучиња.

Во образложението на предлог-измените стои:

Сопствениците на кучиња кога тие се во репродуктивен период се должни да ги кастрираат или ојаловат во ветеринарни амбуланти, болници и клиники овластени со законските одредби за ветеринарна здравствена заштита, освен сопствениците на кучиња кои имаат регистрирано одгледувачници. Трошоците за овие постапки се на товар на сопствениците на кучиња, се вели во текстот.

Се предлага казна од 100 евра за сопствениците на кучиња кои нема да ги кастрираат и ојаловат своите миленици, како и зголемување на глобите за правни лица од 100 на 700 евра, доколку ги прекршат одредбите од член 27 од Законот, односно ако не го пријават своето куче еднаш годишно во ветеринарните амбуланти, потоа ако не истакнат табла која укажува на присуство на куче, ако на јавни места не ги држат на поводник, потоа ако не го пријават леглото во ветеринарна амбуланта, ако не ги пријават лицата кои ги вдомиле.

Со измените и дополнувањата на Законот за заштита и благосостојба на милениците што го предлага Агенцијата за храна и ветеринарство се забранува неконтролирано размножување и продажба на миленици, се забранува продажба на мачки и кучиња во продавниците за миленичиња, како и продажба на овие животни на малолетни лица.

Регулаторната комисија за енергетика денес ги соопшти новите цени на горивата.

Од полноќ бензините поевтинуваат за 2,50 денари, а дизелот 3 денари.

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 2,50 ден/лит, во однос на цените утврдени со Одлуката од 24.12.2018 година и со тоа малопродажната цена на ЕУРОСУПЕР БС-95 изнесува 58,50 ден/лит, додека малопродажната цена на ЕУРОСУПЕР БС-98 изнесува 60,50 ден/лит.

Малопродажните цени на дизелот ЕУРОДИЗЕЛ (Д-Е V) и на Екстра лесното масло за домаќинство (ЕЛ-1) се намалуваат за 3,00 ден/лит, во однос на цените утврдени со Одлуката од 24.12.2018 година и со тоа малопродажната цена на дизелот ЕУРОДИЗЕЛ (Д-Е V) изнесува 55,00 ден/лит, додека малопродажната цена на Екстра лесното масло за домаќинство (ЕЛ-1) изнесува 43,50 ден/лит.

Малопродажната цена на мазутот М-1 НС се намалува за 2,227ден/кг во однос на цената утврдена со Одлуката од 24.12.2018 година и со тоа цената на мазутот М-1 НС изнесува 25,949 ден/кг.

Државните здравствени и санитарни инспектори, од денеска продолжуваат со контроли по градинките, по времената мерка забрана за прием на невакцинирани деца со МРП вакцина, информира за „Мета“директорката на инспекторатот, Ирина Бухова.

Нашите инспектори се на терен откако започна забраната. Од сите градинки кои досега се поминати на територија на Скопје, во ниту една не беа направени отстапки. Но, морам да нагласам дека сепак најверојатно поради празниците и распустот, во градинките беа згрижени многу мал број на деца. Од денеска контролите продолжуваат и ќе траат се` додека е на сила решението за забрана за прием на невакцинирани деца – информира Бухова.

Таа потсетува дека има парични казни за правното и за одговорното лице во случај во некоја градинка да се затекнат деца без примена вакцина.

Казната за правното лице се движи од 2.000 до 4.000 евра, а одговорното лице треба да плати 30 отсто од одредената сума за правното лице – вели директорката.

Инаку денеска во 17 часот е најавен протест на членови на движењето „Вакцинизам“, пред Министерството за здравство, кои се против ваквата забрана. Тие протестираа и пред неколку дена, а изјавија дека паричните казни нема да ги предомислат и дека ќе ги оставаат децата во градинка, со и без дозвола на надлежните.

Министерството за здравство прогласи епидемија од морбили на 3 јануари. За прв пат се донесе мерка – забрана за прием на невакцинирани деца со МРП вакцина за морбили, рубеола и паротитис. За да можат да посетуваат градинка, наложено е прво да појдат на вакцинација. Оттогаш досега, како што информираат во Министерството за здравство, вакцинирани се повеќе од 1.000 деца.