Англија – Сопственикот на „Амазон“ Џеф Безос е најбогатиот маж во светот, чиј имот се зголемил за 19 милијарди долари во последната година и сега изнесува 131 милијарда долари, објави „Форбс“.

Списанието наведува дека она што не е познато е дали Безос ќе биде симнат од „тронот“ на најбогатите по разводот од долгогодишната сопруга Макензи. Доколку тие немаат предбрачен договор, тогаш законите предвидуваат поделба на семејниот имот на еднакви делови.

Најбогата жена во светот е Франсоаз Бетанкур Мејер, наследничка на козметичката империја Лореал, со богатство од 49,3 милијарди долари.

Контото на 65-годишната Бетанкур Мејер е значително зголемено во текот на минатата година и тоа за 7,1 милијарда долари, односно 17 проценти. Таа е единствената ќерка на Лилиан Бетанкур, која во текот на 14 години ја имаше титулата „најбогата жена во светот“, пред да почине во 2017 година. Во заедничката класификација на најбогатите луѓе во светот, Франсоаз Бетанкур Мејерс е на 15. место.

Поскапи нафтени деривати ќе плаќаат во следните две недели возачите.

Ова станува јасно од последната одлука на регулаторната комисија за енергетика која реши да ги поскапи бензините и дизелот.

Тоа значи дека бензин  „супер 98“  ќе се точи поскапо за два денари или ќе чини 66,50 денари, додека пак „супер 95“ поскапува исто толку и ќе чини 64,50 денари.

Од друга страна, дизелот бележи скок на цената од еден денар а тоа значи дека ќе чини 61,00 денари за литар.

Новите цени стапија на сила ноќеска и ќе бидат важечки во следните две недели.

Со 23 гласа „за“ и 11 „против“ Одборот на Европскиот парламент вчера донесе резолуција со која од 2021 година во цела Европска унија ќе се укине летното и зимското сметање на времето.

Земјите-членки сега треба да се координираат и до април 2020 година да одлучат дали ќе останат на зимско или летно сметање на времето.

Според направените анкети, 84 проценти од Европејците се изјаснија да не се менува времето во летно или зимско, односно да има само едно сметање на времето како пред 1976 година, 56 отсто сакаат да остане летното сметање, додека 36 проценти на зимското сметање на времето.

Промената на времето, воведена во 1976 година, отсекогаш беше критикувана. Во септември 2018 година, претседателот на Европската комисија Жан-Клод Јункер, по консултација со неколку милиони европски граѓани, предложи во Европската унија да се запре со промената на времето во зимско и летно сметање.

Последната промена на времето требаше да биде на 1 април 2019 година. Но, европските министри за транспорт, кои се состанаа на 3 декември 2018 година, ја разгледуваа можноста, датум за напуштање на овој систем, да биде одреден дури во 2021 година. На крајот од координативното дејство, секоја земја-членка ќе мора да избере дали да остане на летното или зимското сметање на времето.

Зиплајнот кој ќе се спушта од тврдината Кале до Градски парк ќе почне да се поставува пролетва и ќе биде пуштен во употреба во текот на летото, дознава СДК. 

На последната седница на Советот на Град Скопје која се одржа минатиот четврток беше усвоена одлуката за дефинирање на локацијата за поставување на адреналинската жичница. Почетната станица ќе биде под Музејот на современа уметност, ќе оди преку реката Вардар и ќе завршува на кејот на реката Вардар во близина на арената „Филип Втори“.

По завршувањето на проектната фаза ќе се изработи елаборат за поставување на урбана опрема за спортско-рекреативни активности, согласно кој ќе се постави зиплајнот. Целта на овој проект е да им овозможи на граѓаните на Скопје спортско-рекреативна содржина како и да овозможи развој на алтернативниот туризам преку кој ќе се стимулира развојот на туристичката понуда. Особено внимание при изборот на локацијата е посветен и на изборот на местоположбата, односно помеѓу останатото се предвидува со овој проект да се поврзат скопското Кале и Старата скопска чаршија како културно-историски амбиенти со музејот на Современа уметност и градскиот парк, вели градоначалникот Петре Шилегов.

Адреналинската жичница, според проектот ќе биде во должина од 400 метри, ќе биде опремена со соодветна безбедносна опрема и систем за кочење со кој ќе се регулира брзината на движењето. Ќе чини околу 50.000 евра, а со него ќе стопанисува ЈСП „Скопје“

Покрај зиплајнот летово Град Скопје ќе работи и на заживување на тврдината Кале, која сега според Шилегов е запуштена и речиси да нема посетители. Градот во соработка со Управата за заштита на културното наследство ќе прави проект за уредување, ревитализација и одржување на Кале. Какви содржини ќе има на Кале односно дали ќе има кафулиња сè уште не се знае. Градоначалникот Петре Шилегов најави дека ќе биде распишан јавен конкурс за избор на решение со кое тврдината ќе стане атрактивно место за посетители.