Современиот човек поголемиот дел од денот го поминува во затворени простории, без разлика дали станува збор за домот или работното место. Токму затоа, квалитетот на воздухот и условите во просторијата имаат големо влијание врз здравјето, продуктивноста и општото чувство на удобност.

Температурата на воздухот е еден од најважните фактори што влијаат врз тоа како се чувствуваме во затворен простор. Освен температурата, значајна улога имаат и релативната влажност на воздухот, како и неговото движење. Доколку овие параметри не се во рамнотежа, може да се појават непријатности како замор, намалена концентрација, сувост на дишните патишта и чувство на неудобност.

Еден од честите проблеми во канцелариите е прекумерното загревање на воздухот, што доведува до намалување на релативната влажност. Сувиот воздух може да предизвика иритација на слузокожата, суви очи и намалена природна заштита на организмот од прашина и микроорганизми.

Од друга страна, прекумерната влажност исто така не е пожелна. Таа создава услови за развој на мувла, бактерии и други микроорганизми кои можат негативно да влијаат врз здравјето и квалитетот на воздухот.

Експертите препорачуваат температурата во канцелариските простории да биде околу 21°C, додека релативната влажност да се движи помеѓу 38% и 50%. Овие услови овозможуваат пријатна работна средина, подобра концентрација и поголема удобност во текот на денот.

Создавањето здрава работна средина не зависи само од мебелот и организацијата на просторот. Соодветната температура и оптималната влажност на воздухот се клучни фактори за здравје, комфор и продуктивност на вработените.

Тагови: канцеларија продуктивност температура

Од ноќеска на полноќ цените на бензините ќе се намалат, а на дизелот ќе се зголеми, соопшти Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).

Од 9.6.2026 година од 00:01 часот максималните цени на нафтените деривати ќе изнесуваат:

• Моторен бензин ЕУРОСУПЕР БС – 95 86,00 (денари/литар)
• Моторен бензин ЕУРОСУПЕР БС – 98 88,00 (денари/литар)
• Дизел гориво ЕУРОДИЗЕЛ БС (Д-Е V) 87,00 (денари/литар)
• Масло за горење Екстра лесно 1 (ЕЛ-1) 89,00 (денари/литар)
• Мазут М-1 НС 47,297 (денари/килограм)

Малопродажните цени на бензините ЕУРОСУПЕР БС-95 и ЕУРОСУПЕР БС-98 се намалуваат за 2 денари за литар.

Малопродажните цени на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се зголемуваат за 1,50 денар за литар.

Малопродажната цена на Мазутот М-1 НС се намалува за 0,609 денари за килограм и сега ќе изнесува 47,297 денари. 

Тагови: нафтените деривати Регулаторната комисија за енергетика-(РКЕ) цени на горивата

Германската AI компанија DeepL отпушти околу 250 вработени, што претставува повеќе од 21% од вкупниот број на вработени. Во интерно соопштение, извршниот директор Jarek Kutylowski објаснил дека компанијата се подготвува за новата ера на вештачката интелигенција и дека се потребни помали, поагилни тимови и помалку менаџерски нивоа.

Според него, AI фундаментално го менува начинот на кој компаниите работат, па задачи кои порано барале цели тимови, денес можат да ги извршуваат многу помал број луѓе со помош на напредни AI алатки. Затоа компанијата планира уште подлабоко да ја интегрира вештачката интелигенција во своите процеси.

Овој пристап не е изолиран случај. Слични пораки во последните месеци испратија и други технолошки компании, кои најавија отпуштања проследени со инвестиции во AI и реорганизација на тимовите. Аналитичарите веќе зборуваат за нов „AI layoff playbook“ стратегија во која компаниите се стремат да работат со помал број вработени и поголема автоматизација.

Сепак, не сите се согласуваат дека AI е единствената причина за ваквите потези. Дел од експертите сметаат дека многу компании го користат AI како објаснување за кратења кои и онака би се случиле поради намалување на трошоците или претходно прекумерно вработување.

Едно е сигурно: AI повеќе не е само технолошка алатка. Тој станува фактор што директно влијае врз структурата на компаниите, бројот на вработени и иднината на работните места.

Прочитајте и за: Remote Work Wars: кој победува во битката за работното место?

Тагови: AI HR трендови

Во наредните три месеци, скопјани чии домови се загреваат на парно ќе добиваат пониски сметки. Првата фактура од редовното годишно порамнување веќе е доставена, а истото ќе се повтори и во следните два месеци, со износ за парно кој е речиси преполовен.

Од АД ЕСМ потсетија дека изминатата грејна сезона започна порано од официјално утврдениот почеток, односно на 2 октомври 2025 година, а поради надворешните временски услови беше продолжена и по официјалниот завршеток на 15 април, односно до 2 мај 2026 година.

Сепак истакнуваат дека иако грејната сезона траеше подолго од вообичаеното, просечните надворешни температури во одредени периоди биле повисоки од прогнозираните температури што се користат при пресметката на авансните фактури, па поради тоа стигнуваат „порамнети“ сметки, чиј износ не е процентуално определен и е различен за секој потрошувач.

Во врска со тоа зошто истиот намален износ се фактури во три сметки, од компанијата прецизираат дека всушност утврдената разлика при порамнувањето се дели на три рати.

Доколку при годишното порамнување е утврдена разлика што треба да се фактурира, таа се распределува на три еднакви рати и соодветно се прикажува во фактурите за месеците мај, јуни и јули. Тоа значи дека кај конкретен потрошувач износот на порамнувањето е ист во овие три месеци, но не постои единствен износ што важи за сите потрошувачи бидејќи порамнувањето се пресметува индивидуално за секој потрошувач - објаснуваат од ЕСМ.

Тагови: ЕСМ парно греење