Министерството за здравство останува на ставот дека нема да се примаат деца во градинка ниту во училиште од септември без приложен вакцинален картон, велат од ресорното министерство за Фактор.

Здравствените власти во соработка со Министерството за труд и социјална политика го изменија и Правилникот за упис на деца во градинка. Сега родителите кои сакат да го запишат своето дете во предучилишна установа мора да приложат и пополнет вакцинален картон, со вакцини кои се задолжителни и предвидени според календарот.

Иако во последните шест недели е забалежан континуиран пад на бројот на ново заболени лица со морбили, според министерството нема крај на епидемијата, бидејќи престанок се прогласува откако две недели нема да има ниту еден пријавен случај на заболен од мали сипаници на територијата каде била прогласена епидемијата.

Според информациите од Иститутот за Јавно Здравје, од почетокот на епидемијата од декември минатата година заклучно со 12 јули годинава се регистрирани 1854 случаи на мали сипаници. Само минатата недела се пријавени нови 10 случаи.

Властите во екот на епидемијата започнаа и со агресивна кампања за вакцинација со МРП вакцина на деца и сите невакцинирани лица над 14 години до 60 годишна возраст кои не преболелеле мали сипаници, вработени во предучилишните установи, здравствени работници и студенти на медицина, фармација и стоматологија, како и на ученици во средните медицински училишта.

Податоците на ИЈЗ покажуваат дека досега на територија на Република Северна Македонија има вакцинирано вкупно 32.653 лица до 14 години со вакцината против мали сипаници.

На прашањето кои се најчестите причини кои ги наведуваат родителите при одбивање да ги вакцинираат своите деца, од Јавно здравје ни одговорија дека немаат официјални податоци, но преку годишните извештаи за имунизација заклучиле дека најчесто родителите ја одложувале МРП вакцината за поголема возраст на нивните деца. Исто така од Институтот најавија студија за знаењата, ставовите и практиките на родителите во однос на МРП вакцината со која ќе се дојде до дополнителни одговори поврзани со оваа прашање.

Патувањата во странство вообичаено ги поврзуваме со убави спомени, но понекогаш и некои непредвидени ситуации се составен дел од нив. Како најнепријатна случка што може да ви се случи на некое патување е да ја изгубите или оштетите патната исправа – пасошот.

Доколку се најдете во таква ситуација и останете без валиден документ во друга држава, не е можно да го продолжите патувањето или да се вратите во земјата.

Затоа пред да тргнете на патување најдобро е да направите фотокопија на првата страна од вашата патна исправа, бидејќи така ќе имате оригинален документ што ќе ви помогне да извадите нов, а втора опција е да ја скенирате копијата од пасошот и да ја имате на мејл.

Првиот чекор што треба да се направи доколку се најдете во ваква ситуација е да проверете во хотелот во кој сте сместени случајно да не направиле фотокопија од вашиот пасош.

Потоа, на интернет пронајдете го најблискиот Конзулат или Амбасада од вашата земја, проверете кога работат и прегледајте кои сè документи треба да ги однесете за да ви дадат нов пасош. Пред да појдете во Конзулатот или Амбасадата треба да појдете во полициска станица и да пријавите дека ви е изгубена патната исправа.
По добивање на потврдата од полицијата за пријавување на изгубениот пасош потребно е да се обратите до дипломатско-конзуларните претставништво на Република Северна Македонија во земјата во која се наоѓате.
Во ДКП ќе ви биде издаден патен лист што служи само за враќање во земјата и не може да се користат за патување во некоја друга држава. Патниот лист има рок на важење 30 дена од денот на нејзиното издавање.

За добивање патен лист при губење или оштетување на патна исправа, лицето треба да приложи фотографија и документ со кој го докажува идентитетот (или фотокопија на документ).

– За оваа услуга лицето уплатува 30 евра на жиро сметка на ДКП-то. По приложувањето на документите и уплатата, патниот лист веднаш се издава, велат од МНР.

За државите со друга национална валута од еврото, таксата се плаќа во соодветната национална валута.

Доколку лицето нема документ за идентификација, податоците изнесени од нивна страна, по систем се доставуваат до МВР. По извршените проверки во рок од 48 часа МВР треба да го потврдат идентитетот на лицето, по што се издава патен лист.

За некои држави, покрај патен лист, потребно е да се достави и потврда од надлежните органи дека патната исправа е изгубена или украдена.

Пред да тргнете назад со патен лист доколку транзитирате преку повеќе земји информирајте се дали за некоја од тие земји ќе ви треба соодветна виза за транзит.

Колку наши државјани се нашле во ваква ситуација?

Според статистиката на Министерството за надворешни работи во 2018 година на наши државјани им се издадени вкупно 12.875 патни листови,  додека од 1 јануари до 30 јуни оваа година издадени се 5.028 патни листови.

Денеска и официјално се отвори долго најавуваниот прв Retail Park во Македонија - Point Retail Park. На прес конференцијата по повод отворањето присуствуваа сопственикот и инвеститор г. Али Ќаили, градоначалникот на Општина Бутел, г. Велимир Смилевски, како и генералниот директор на ФОРТОН МКА/ Cushman & Wakefield ексклузивниот лизинг агент, г. Влатко Богоевски.

Според сопственикот, Point Retail Park е инвестиција која ќе влијае позитивно на градот Скопје и државата генерално, позиционирајќи ја Македонија како лидер во регионот.

"Многу сме среќни и горди што денеска то го отвараме првиот Retail park кај нас, кој со својот принцип на работа ќе постави темели на еден поинаков модерен и европски концепт, кој во иднина може да претставува пример и што направивме инвестиција на која сите ќе бидат горди. Поинт Ритеил Парк е инвестиција која ќе ги отвори вратите за околу 200 лица и која вреди околу 9 милиони евра. Сакам на нагласам и дека овде во Поинт ќе можете да видите познати и реномирани домашни и странски брендови и воедно ќе искористам и да им се заблагодарам на сите закупци кои го препознаа нашиот план и ја препознаа нашата инвестиција." - изјави Али Ќаили, сопственик на Point Retail Park.

Според градоначалникот на Општина Бутел, г. Велимир Смилевски, оваа инвестиција ќе ја позиционира општинaта на едно повисоко ниво.

"Општина Бутел е навистина горда што првиот Retail Park во Македонија се отвара токму тука. Јас како градоначалник сум особено горд што со оваа инвестиција ќе се влијае на локалниот економски развој на општината и ќе влијае на нејзина модернизација. Сигурни сме дека оваа инвестиција ќе ги привлече сите граѓани од Скопје и другите градови од регионот да бидат редовни посетители." - изјави градоначалникот на Општина Бутел, Велимир Смилевски.

Во Point Retail Park ќе има голем број на познати домашни и странски брендови кои имаат што да понудат. Според Влатко Богоевски, генерален директор на Фортон МКА/ Cushman & Wakefield, која е екслузивен лизинг агент на Point Retail Park интересот од брендовите бил огромен уште од самиот почеток.

"Овој концепт кој е развиен насекаде во светот посебно во Европа и регионот околу нас како Србија, Хрватска, Косово, Црна Гора се веќе високо позиционирани во овој сегмент. Ние, успеавме за кратко време да го наполниме целосно со голем број на брендови кои се светски познати, но и локални кои навистина имаат што да понудат. Од самиот почеток и најавата за идејата побуди голем интерес кај потенцијалните закупци и  интересот беше навистина голем. Оваа инвестиција која е прва од ваков тип со сигурност ќе влијае на економијата во Македонија и ќе ја направи горда, позиционирајќи го Скопје како лидер во регионот." - изјави Влатко Богоевски

Сите посетители во Point Retail Park ќе можат да уживаат во шопинг на познати брендови како LC Waikiki, Sport Vision, KFC, JYSK, NEPTUN, Зегин, Сара Фешн, LTB, Шатци парфимерии, Спортекс, КРШ, Д Спортска опрема и други. Во склоп на Point Retail Park ќе има и ексклузивен ресторан, супермаркет КИТ-ГО, игрoетка и продавница за деца КРШ на површина од 2500 м2.  Point Retail Park се простира на површина од 9500 м2 и ќе има 300 паркинг места. Инвеститор на Point Retail Park  е компанијата Али Тобако. Point Retail Park се наоѓа во Општина Бутел, поранешно ТИПО, на раскрсницата помеѓу булевар Словенија и Македонско - Косовска бригада.

За вечер со почеток од 19:30 часот е предвидено и свечено отворање на кое се очекуваат голем број на гости и посетители да уживаат во забавата. Од 13 до 15 часот ќе има и забава за деца на која ќе ги забавува Ивце Пивце и Газменд, а ќе има и магионичари, пантомимичари, детски песни и многу забава.

За наредниот период од страна на Поинт предвидени се гоем број на активности.

Секој македонски државјанин кој не си е задоволен со своето име или презиме и сака да го промени во друго, тој може да го стори тоа едноставно, со поднесување неколку документи и трошок не повисок од околу 300 денари за потребните барања, заедно со административните такси.

Оваа цена е за оние кои поднесуваат барања кои се во редовна постапка. За оние кои тоа го сакаат по брза постапка или институциите на системот им го наложуваат тоа, цената не е драстично поголема.

Законот за промена на лично име, меѓу другото, дозволува промена на сопственото име дури и безброј пати, се додека избраното име некого не го повредува.

На овој чекор годишно во Македонија се одлучуваат неколку стотици сограѓани.

Право на промена на лично име имаат сите постари од 15 години кои се способни за расудување, не се осудувани и против нив не се води кривична постапка.

Барањето се поднесува во матичните служби на Министерството за внатрешни работи, а потребна документација е лична карта, уверение од управа за приходи дека нема даночни долгови, извод од матична книга на родени, државјанство и уверение дека нема истрага против него.

- Најчесто презимиња менуваат жените кои се разведуваат, но има случаи и поради промена на верата, националноста или за да се вклопи во околината. Исто така, на децата им ги сменуваат имињата поради утврдување или оспорување на мајчинство или татковство, како и по посвојување на деца, но во овие случаи можна е само промена на презимето, велат официјални извори.

Невообичаени и егзотични имиња бараат некои уметници, но тоа главно се стандардни имиња.