Општина Аеродром денеска објави јавен повик за надоместување на дел од трошоците за набавка на печки на пелети за 2019 година. Јавниот повик почнува од денеска, 26 септември, и ќе трае до 10 октомври, а средствата ќе се доделат по принципот „прв дојден, прв услужен“.

Секој жител што купил печка на пелети во тековната 2019 година најдоцна до денот на траење на Јавниот повик, заклучно со 10 октомври, може да достави барање за поврат на средствата во висина до 50 %, но не повеќе од 15.000 денари со вклучен персонален данок на доход по домаќинство.

Потребни документи за аплицирање:

• Барање за надоместок (барањето може да се подигне во Општина Аеродром или од веб-страницата на Општина Аеродром http://www.aerodrom.gov.mk/vest/2255);
• Фотокопија од важечка лична карта на барателот;
• Имотен лист за објектот со адреса на подрачјето на Општина Аеродром;
• Доказ дека е извршено купување печка на пелети, и тоа оригинал фискална сметка или фактура и извод од деловна банка со датум од почетокот на календарската 2019 година до денот на завршување на јавниот повик;
• Фотокопија од трансакциска сметка;
• Потврда за платен данок на имот за станбен објект каде што е инсталирана печката на пелети заклучно со 2018 година (оригинал);
• Изјава (примерок од изјавата може да се подигне во Општина Аеродром) со која барателот под полна материјална и кривична одговорност ќе потврди дека:
• до поднесување на барањето бил корисник на печка на јаглен, дрва, нафта или мазут,
• објектот во кој е/ќе се инсталира печката не е во фаза на градба,
• во домаќинството да нема друг член што поднел барање за добивање субвенција,
• во станбениот објект каде што е инсталирана или ќе се инсталира печката на пелети нема приклучок кон градското централно греење, без оглед на тоа дали го користи.

Документацијата се поднесува во архивата на Општина Аеродром во затворен плик со намена за „Јавен повик за субвенции за печки на пелети“ со назнака НЕ ОТВОРАЈ.

Советот на Град Скопје денес ќе носи одлука за тоа колку ќе чини цената на билетот за едно возење во скопските автобуси.

Со враќањето во употреба на билетот за една употреба најмногу корист ќе имаат граѓаните од внатрешноста но и туристите кои досега не можеа да ги користат услугите на автобусите во главниот град .

Неофицијално цената на билет за едно возење ќе чини 50 денари и ќе може да се купи во секој автобус. Истата ќе почне да се применува од ноември.

Она што исто така е новитет дека градот Скопје ги заменува кинеските автобуси со 33 нови германски еколошки автобуси.

Шилегов тврди дека со истите нема да има загадување и ќе се заштедат 700.000 евра годишно .

Парите за автобусите се обезбедени преку Договорот за користење заем од ЕБОР во висина од 10 милиони евра, кој беше потпишан во јануари годинава. Со тие пари плус со 1,8 милиони евра од сопствено учество на ЈСП „Скопје“ треба да се набават околу 35-те нископодни (зглобни и моно автобуси).

Дванаесет зглобни  и 21 единечни автобуси ќе набави Градот скопје за потребите на ЈСП Скопје со договорот што во моментот го потпишува градоначалникот со производителот МАН.

Најдоцна за седум месеци ускопјани ќе се возат во нови, нископодни автобси со капацитет од 85, односно 149 патници. Со овие автобуси на гас се заштедуваат по 25.000 евра годишно по автобус за гориво.

Министерката за финансии Нина Ангеловска, синоќа во Њујорк, во рамки на 74. Генерално собрание на Обединетите нации (ОН), беше промовирана како една од првите „жени амбасадори на дигитална трговија“ во светот.

Како што информираат од министерството за финансии, признанието и го врачил Мукиза Китуи, генерален секретар на телото за трговија, инвестиции и развој на ОН (УНКТАД).

Покрај Ангеловска, уште шест жени претприемачи од целиот свет ја добија оваа титула од УНКТАД.

„Неискористениот потенцијал на жените ширум светот претставува голема загуба за нашите економии. Синергијата на дигиталната технологија и трансформативната моќ на претприемачкиот дух кај жените, може да придонесе кон намалување на сиромаштијата во ниско развиените земји и земјите во развој, како и забрзување на економскиот раст“, рече министерката.

Ангеловска инаку е единствена претставничка од Европа која е прогласена за „жена амбасадор на е-трговија“. Ова признание го доби како соосновачка на Grouper.mk, првата дигитална платформа за е-трговија од овој тип во Република Северна Македонија.

Другите избрани „амбасадори на е-трговија“ се: Ксиаофеи Јао од Кина, основачка и извршна директорка на Rogrand, Клаудија де Хередиа од Мексико соосновачка и оперативна директорка на Kichnik, Хелианти Хилман од Индонезија, основачка и извршна директорка на Javara, Назанин Данешвар од Иран, основачка и извршна директорка на Takhfifan и Кларис Ирибагица од Руанда, основачка и извршна директорка на DM.HeHe.