Малите трговци со собир пред Владата побараа да им се исплатар бруто-плати до престанокот на важноста на мерките и со уредба да им наложи на сопствениците на објектите каде што тие ги остваруваат своите дејности да ја замрзнат наплатата на киријата.

„Почитувани, ние трговците, кои се занимаваме со малопродажба бараме од Владата и надлежните институции да не не забораваат и во пакетот мерки да бидат вклучени и нашите мали бизниси. Во Македонија од вкупно регистрираните фирми,. 80 отсто се микро и мали претпријатија, тоа покажува дека сме значителен дел од економијата на земјата и Владата треба сериозно да размисли. Сите вие, кога се движите по улица, каде и да се свртите гледате мали, малопродажни продавници. Тоа е Македонија, тоа сме ние, а од средина на март сите имаме клуч на врата и со овие загуби ни се заканува целосен колапс и од пуштање на повеќе од 20.000 работници, а за голем дел од нас ова е основен и единствен начин ан егзистенција“, велат малите трговци.

Од таму бараат бруто плати додека траат мерките од страна на Владата да бидат на товар на државата за месеците март, април, мај, да се замрзнат ратите за кредитите во деловните банки како и плаќањето на тековните сметки за електрична енергија, вода итн, субвенционирање неповратни средства се до престанокот на важноста на вонредната ситуација.

„Исто така сакаме да апелираме до сопственциите на објектите, во знак на солидарност, да се откажат од закупнината за овие месеци бидејќи не работиме. И молба до Владата да ги употреби сите механизми во вонредната ситуација, преку Уредба да им наложи на истите да ги замрзнат или олеснат околностите во однос на плаќањето. Товарот треба сите заеднички да го понесеме“, додаваат тие во повикот.

Да го заштитиме секое работно место, секој да има средства за да го преживее и преброди овој период. Да ја заштитиме ликвидноста на буџетот за да ги сервисираме обврските и да ја заштитиме ликвидноста на стопанството кое потоа треба да се рестартира. Ова се целите по кои се раководиме во справувањето со кризата и менаџирањето со буџетот, рече министерката за финансии Нина Ангеловска во интервју за Радио Слободна Европа.

Зборувајќи за што би се кратело од буџетот Ангеловска вели дека се што е во функција на справување со кризата, не може да биде предмет на кратење, како здравството и безбедноста. Таа посочува дека треба да се обезбедат средства секој граѓанин да има средства, да тече социјалната заштита и сите да бидат солидарни, реални и самосвесни. 

Ако зборуваме за кратење на расходната страна, ќе има кратења на одредени стоки и услуги, одредени капитални услуги кои што се купување на опрема, лиценци, софтвери, значи во едни такви услови сè што суштински и директно не се поврзано со справување со корона-кризата мора и може да биде предмет на кратење. А како и зошто со една единствена цел – да се заштити секое едно работно место, секој да има средства да го преброди овој период, сите да бидеме солидарни, да ја заштитиме пред се ликвидноста на буџетот за да ги сервисираме овие обврски и да ја заштитиме ликвидноста на стопанството коешто потоа треба да се рестартира и да продолжи да ја полни цевката за да може да продолжи да оди и да тече нормално и расходната страна – рече Ангеловска.

Таа посочи дека првиот пакет на мерки со кои се нудат бескаматни кредити, субвецнионирање на придонеси и одлагање на плаќање аконтации на данок на добивка грубо чини околу 40 милиони евра: 

Зборуваме за околу, грубо кажано, 40 милиони евра и дополнително 50 милиони евра кои што со Македонската банка за обнова и развој ги најавивме дека ќе ги стави во функција на стопанството преку кредити. Сега се утврдуваат условите и се дискутира и со комерцијалните банки за да истите бидат пласирани преку комерцијалните банки, бидејќи се работи за заем од Европската инвестициона банка кој што е склучен. Сега разговараме за промена на условите, за да истиот биде ставен во функција на справување со кризата и помош на ликвидноста на стопанството. Овој втор сет на мерки кој што се изработува, допрвaо ќе излеземе нели со бројките, меѓутоа оваа мерка за поддршка или исплата на минимална плата на погодените сектори и индустрии, во груба проценка, би чинела околу 100 до 120 милиони евра - рече Ангеловска.

Министерството за здравство ги задолжи здравствените домови во целата држава да отворат стоматолошки пунктови, но само за болка што не се трпи. Посебно во Скопје ќе работат само дежурни ординации во Јане Сандански, Ѓорче Петров и Бит Пазар за пациенти со неколкудневна забоболка, акутна инфекција или пак крварења.

Приватните стоматолошки ординации нема да работат, односно периодов ги ставаат во мирување а ќе се активираат како ресурси во системот доколку има потреба. Здружението на приватни стоматолози ја поздрави Одлуката на министерот за здравство за времено прекинување на редовната работа на стоматолошките ординации поради пандемијата со COVID -19 .

„Сосема е извесно дека во доста здравствени домови постојниот број на тимови кои пружаат итна стоматолошка заштита во нормални услови нема да можат да ја извршуваат работата во ново настанатата состојба и потребата од ангажирање и на тимови од ПЗУ ќе биде неминовна. Согласно Законот, во услови на вонредна состојба министерството може да ги ангажира сите постојни кадровски потенцијали таму каде што е најпотребно. Затоа , почитувани колеги да бидеме спремни да помогнеме на Здравствените домови со својот кадар , па и со своите ординации ако за тоа добиеме налог од Министерот . Впрочем за вакви мерки и вакво приспособување на работата на стоматолошката служба, ЗПЗСУ ПДДМ се залагаше и јавно предлагаше уште пред десетина дена“, се огласија од таму.

Во стоматолошката комора веќе ги добиле протоколите како ќе се примаат и третираат пациентите. Пунктовите се опремуваат со заштитна опрема за стоматолозите, дезинфекциски средства и се што е потребно за заштита на кадарот и пациентите од корона вирусот. Се планира сите градови да се оспособат за прием на итни пациенти. 

Интернет супермаркетите во Македонија се оптоварени со онлајн-нарачки со вонредната состојба што ја погоди и нашата земја и превентивните здравствени мерки кои имаат влијание како на начинот на купување, така и на самата хипер-побарувачка за одредени производи. Доколку нарачата сега достава до вашиот дом, производите најверојатно ќе ви пристигнат дури пред или на почетокот на април.

Paket.mk е интернет супермаркет кој  овозможува избор на повеќе од 4.000 намирници достапни за достава. Сервисот е едноставен за користење, но во овој момент велат од таму дека побарувачката е зголемена за седум до осум пати повеќе и дека последните што нарачале ќе ги чекаат своите производи до следниот понеделник.

- Во овој момент потребен ни е десет пати поголем капацитет за да можеме веднаш да ги услужиме купувачите без да чекаат толку време. Инаку, до сега стандардно клиентите беа ценовно сензитивни со брз начин на живеење. Но во последно време имаме многу нови купувачи, а и самиот обем на она што се купува во една нарачка е зголемен и се купува речиси се што нудиме, вели Драган Јосифовски, управителот на Paket.mk.

E-commerce проектот на Paket.mk трае две години, а Јосифовски вели дека добро нешто што може да се извлече од актуелната ситуација со кризата е тоа што ги натерала потенцијалните купувачи да научат дека може да се купува и преку интернет.

- Во овој период нарачките се смирија до извесен степен, за разлика од изминатите недели кога наголемо се трупаа залихи. И покрај тоа, ние го шириме нашиот капацитет. Имаме 20 работници, а во моментов бараме дополнителна работна сила. Работиме 24 часа во три смени, а доставата барем до сега беше од 10 до 22 часот. Сега работите се сменија со новите мерки и ние чекаме да видиме што ќе ни се дозволи, а што не, дополнува Јосифовски.

Повеќе прочитајте на Фактор.мк