Во месецот на одбележувањето на првиот роденден од воведувањето на брендот А1 на македонскиот пазар, компанијата А1 Македонија продолжува со изненадувања за јавноста и со задоволство го најавува уникатниот настан за сите љубители на филмот – А1 Drive-in кино, со богата филмска понуда што на сите посетители ќе им овозможи оригинално доживување. Посетителите, од своите автомобили ќе ги следат филмовите што ќе се прикажуваат на специјално проектно платно со DCP проектор, додека звукот што ќе се емитува преку FM фреквенција ќе го следат преку радио уредот во својот автомобил.

На седумдневниот репертоар на А1 Drive-in киното ќе бидат прикажани филмови од различни жанрови, а официјалното отворање на 29 септември во 21 часот ќе започне со проекција на годинашниот оскаровец „Паразит“ (Parasite, 2019). Паркингот на А1 Арената (СЦ Борис Трајковски) е подготвен да пречека по 100 возила за една проекција. Влезниците се бесплатни, со претходна резервација преку веб-страницата www.karti.com.mk.

„Инспирирани токму од нашите корисници и од желбата за безбедна социјализација во време на пандемија, креиравме настан што ќе овозможи уште поголема содржина и повеќе забава за сите, но истовремено ќе понуди и ново, уникатно искуство за сите љубители на седмата уметност. A1 Drive-in киното е организирано согласно сите протоколи за одржување настани на отворено и на сите посетители им посакуваме да уживаат во седумдневните проекции“, изјави Методија Мирчев, извршен директор на А1 Македонија.

Во деновите што ќе следуваат, A1 Drive-in киното ќе понуди уште 6 кинопроекции на врвни филмски наслови, односно по еден на вечер, и тоа „Вистина“ (The Truth, 2019), „Уште една тура“ (Another Round, 2020), „Пинокио“ (Pinocchio, 2019), „Офицер и шпион“ (An Officer and a Spy, 2019), „Проксима“ (Proxima, 2019) и популарниот документарец за фронтменот на поранешната група „Оејзис“ (Oasis), „Лиам Галагер: Како што беше“ (Liam Gallagher: As It Was, 2019), кој е предвиден за затворањето на настанот на 5 октомври.

Резервација на влезниците треба да се направи најдоцна до 12 часот на денот на проекцијата и потребно е при влегувањето таа да се покаже на мобилниот телефон или во отпечатена форма. Влезот за сите денови е од 19:30 до 20:30 часот, а, пак, проекциите започнуваат во 21 часот.

Со цел поголема достапност на проекциите за колку што е можно поголем број посетители, бројот на резервации по проекција е ограничен. Притоа, едно лице може да изврши една резервација што важи за едно возило. А, пак, согласно мерките и препораките за заштита и превенција од КОВИД-19, посетителите во возилото треба да носат заштитни маски доколку не се членови на исто семејство.

Со оглед на условите што ги нуди просторот, влезот за A1 Drive-in киното ќе биде овозможен само за автомобили, а не за комбиња, мотори и велосипеди, и тие ќе се распоредуваат на паркингот според времето на пристигнување.

A1 Македонија апелира за задолжително почитување на мерките за заштита и превенција од КОВИД-19.

Ширум Европа се враќаат рестрикциите поради коронавирусот. 

Забрани за движење од вчера се воведени и во одредени делови на Шпанија. Квартови во Мадрид се под карантин, а на граѓаните им е дозволено да излезат од нив само ако имаат неодложни обврски. 

Во повеќе градови во Франција каде што има висока стапка на нови заразени собирањето на сите јавни места е ограничено до 10 лица.

Повеќе од 9 лица не смеат да бидат заедно ниту во затворен ниту на отворен простор во Грција, освен во рестораните. Затворени се сите кино сали,м а откажани се и концертите и музичките настапи во живо поради што вчера музичарите излегоа и на протести.

Данска и Исланд деновиве вратија дел од старите мерки со цел да се спречи ширењето на Ковид-19. 

Тоа значи затворање на баровите, кафулињата и ноќните клубови. 

Можно е и во Македонија да се вратат рестрикциите, затоа што бројките на заразени се високи. 

Вкупно 2,35 милиони евра ќе вложи државата за поддршка на 84 микро и мали стартап компании, соопштија вицепремиерот за економски прашања, Фатмир Битиќи, министерот за економија Крешник Бектеши и директорот на Фондот за иновации и технолошки развој (ФИТР), Јован Деспотовски.

Тие синоќа ги презентираа 84-те стартап компании што ќе добијат финансиска поддршка од ФИТР на јавниот повик „Стартапувај 2“.

Во рамките на овој повик, во првиот бран беа поддржани 53 компании, но поради квалитетниот број апликации по препорака на Комитетот за одобрување на инвестиции, беа обезбедени дополнителни милион евра, за поддршка на уште 31 микро и мали стартап компании. Вкупниот обем на инвестиции изнесува над 3 милиони евра, од коишто 77 отсто, односно 2,35 милиони евра се средства што ги обезбедува Владата во соработка со Светска Банка, а 23 проценти или речиси 702.000 евра ќе ги обезбедат самите компании.

Своите искуства и успешни приказни на настанот во Музејот на современа уметност ги споделија Симона Николова од „Уретани“ и Игор Томовски од „Пајл Контрол“, чии компании беа избрани на првиот повик „Стартапувај“. Тие веќе успешно работат и на меѓународните пазари, а за нив поддршката од државата и Фондот, како што рекоа, била клучна за развој и напредок. Со своите говори ги мотивираа сите да се охрабрат и да аплицираат бидејќи како што велат процесот е транспарентен и беспрекорен, а техничката поддршка од Фондот особено значителна.

-Верувам дека изминатите три години, покажавме и докажавме како треба и како се поддржуваат луѓето кои имаат добри идеи. Го етаблиравме Фондот за иновации како дом за секој храбар, млад човек со конкретна идеја. Во портфолиото на Фондот, само во овие 3 години, заедно со овие кои денес ги објавуваме, поддржани се или ќе се поддржат повеќе од 500 домашни компании, во најголемиот дел станува збор за микро и мали фирми, што е навистина неспоредливо со периодот пред 2017 година, кога беа поддржани само 30-ина компании. Притоа, ова се компании кои ќе реализираат проекти во вредност од 73 милиони евра, вкупен обем на инвестиции, и влог на компаниите и поддршка од ФИТР, рече Битиќи.

Министерот Бектеши најави зголемена поддршка и нови владини мерки за стартап компаниите во иднина.

-Убеден сум дека имаме многу млади луѓе кои имаат идеи, само треба да ги охрабриме, да им дадеме можност, да не ги спречиме во исполнувањето. На таков начин ќе креираме и подобра економија за нашата држава, но истовремено и подобар животен стандард, подобро платени работни места и  поуспешна држава за сите нас, а утре и за нашите деца, истакна Бектеши.

Тој додаде дека ако пред три години државата не одвојуваше ни 1,5 милиони евра за стартап бизниси, сега, само за една година, буџетот за оваа намена е зголемен 10 пати. Според министерот, ваквите успешни приказни се поттик во иднина да се зголеми буџетот за поддршка на младите за стартап бизниси.

– Токму вие млади луѓе и вашите компании сте она здраво јадро во економијата што ќе не извлече напред. Со вас, од оваа економска криза ќе излеземе посилни. Во овие три години заедно покренавме инвестиции од над 73 милиони евра, од кои над 40 отсто се ваш влог, на домашните компании. Сега, веќе можеме гордо да зборуваме за многу успешни приказни и резултати од работата во изминатите три години. Само во 2019 година фирмите што користат средства од Фондот уплатиле на име придонеси и данок на добивка за 3,5 милиони евра повеќе средства во Буџетот отколку што Фондот исплатил кон проектите. Тоа се 3,5 милиони евра повеќе за болници, училишта, наставен кадар и медицински персонал, за пензии, социјала, рече директорот на Фондот, Деспотовски.

Од денеска се враќаат на работа родителите на децата до шест години, лицата кои користат продолжено породилно отсуство и дел од хронично болните лица. Владата ја донесе оваа одлука пред две недели, откако се отворија градинките и дневните центри за ран детски развој и се утврдија речиси сите протоколи за функционирање во сите сфери, со цел граѓаните да се заштитат од пандемијата од ковид-19.

Одлуката на Владата за враќање на родителите на нивните работни места наиде на реакции кај дел од засегнатите, па по тој повод во неколку наврати родителите организираа и протести. Велат, дел од децата не се запишани во градинка, каде и нема слободни места, нема кој да ги чува и немаат доволно средства да платат негувателки.

Од Владата, пак, нагласуваат дека е обезбедена целосна грижа за децата во градинките, и нелогично и беспредметно е родителите да не одат на работа.

Министерката за труд и социјална политика Јагода Шахпаска синоќа повтори дека дека Владата останува на ставот дека родителите треба да се вратат на работа.

„Со создавањето на услови за сместување на децата во претшколски установи – градинки и дневни центри за ран детски развој, создадовме простор од две недели, до 23 септември, за враќање на сите родители на своите работни места, односно со отворањето на градинките се изгуби смислата зошто родителите би останале дома кога градинките ги отворивме“, изјави Шахпаска.

Таа  потсети дека стартот на градинките почна на 9-ти септември и оти родителите имаа две седмици за да се подготват или своите деца да ги подготват за да тргнат во редовен процес на работа.

„Владината одлука во вонредната состојба за затворање на градинките доведе до ситуација мајките, родителите да останат на продолжено породилно боледување да се грижат за децата. И оттука стоиме на ставот дека со отворање на градинките ова одлука престанува да важи“, потенцираше министерката.

Шахпаска наведе дека согласно Протоколот што беше донесен уште на 29 мај, многу јасно се прецизирани критериумите, условите за згрижување на деца во услови на пандемија со ковид-19.

„На дневно ниво ги контактираме сите градинки, 311 објекти во државата. Нашите информации како министерство не произлегуваат од ФБ групи, ова се базирани на докази, на дневни извештаи, секој ден ја анализираме состојбата како е. Јас одговорно тврдам, ова е состојбата, значи запишани се децата, а не посетуваат градинка, и оттука нашиот апел до сите родители кои го чуваат местото, а не го праќаат детето во градинка значи имаат алтернатива кој да се грижи за тоа дете, да го отстапат на родителите на кои што им е неопходно“, апелираше Шахпаска.

Таа истакна дека протоколите јасно ги дефинираат како условите во градинката, однесување на вработените во градинката, бројот на деца коишто се згрижени почнувајќи од 0-2 години, како и поголемите групи на деца.

Во однос на враќањето на работа на хронично болните лица, министерот за здравство Венко Филипче изјави дека мерките се добро проценети и анализирани пред да се имплементираат.

„Не се враќаат сите на работа, туку лекар специјалист проценува кој ќе оди на работа, а кој не. Не само на кого му е влошена болеста, туку и пациент кој е во фаза на болеста и има тип на хронична дијагноза, со таква шифра, а треба да биде заштитен во следните шест месеци. Затоа ние го сменивме правилникот за боледување во Фондот за здравствено осигурување. Тоа значи дека ги одделуваме хроничните болни кои се во рамките на една категорија и имаат иста шифра на болеста. На пример дијагноза миокарден инфаркт на срце. Пациент имал инфаркт на срце пред пет години, човекот е рехабилитиран и сосема нормално ги извршува животните активности. Тој ја носи истата шифра како пациент кој имал инфаркт пред еден месец и треба да биде на боледување и дополнително заштитен. Таа проценка ја прават специјалистите“, истакна Филипче.

Тој потенцираше дека се враќаат тие кои можат да работат согласно проценката на лекарот специјалист.

Хронично болните пациенти имаа рок до денеска да посетат специјалист за што беа пуштени дополнителни термини во „Мој Термин“ и е-амбуланта, а, како што информираше Филипче, по потреба рокот ќе биде пролонгиран.