Пензионерите со јулската пензија ќе добиваат поголема пензија по основ на усогласување на пензијата со порастот на трошоците за живот, кој во првото полугодие од 2021 година (период: јануари-јуни 2021 година), во однос на второто полугодие од 2020 година (период: јули-декември) изнесува 1,2 отсто.

Како што информираат од Министерството за труд и социјална политика, зголемувањето на пензијата во номинална вредност изнесува 188 денари на ниво на просечна пензија и 125 денари на ниво на најниска пензија.

– Редовното законско усогласување на пензијата се врши два пати во годината од 1 јануари и 1 јули секоја година според процентот на порастот на индексот на трошоците на живот, што обезбедува одржување на економската вредност и куповната моќ на пензијата. Почнувајќи од 2019 година покрај редовното усогласување се предвидува и дополнително усогласување во случај доколку бруто домашниот производ во претходната година има реален пораст повеќе од 4 отсто – се вели во соопштението од Министерството.

Покрај овие два начини на усогласување од 2020 година врз основа на одлука од страна на Владата на Република Северна Македонија, како што посочуваат од МТСП, може да се изврши уште едно дополнително усогласување во случај кога има пораст на минималната плата во тековната година за повеќе од 15 отсто и пораст на просечна плата во претходната година за повеќе од 5 отсто.

За да ја зајакнат својата економија и за да отворат голем број работни места во технолошкиот сектор, Обединетите Арапски Емирати најавја план кој во рамки на „Националната програма за програмери“ нудат 100.000 златни визи на луѓето со ваква професија, објави сајтот Startita.

Златните визи, обезбедуваат долготраен престој, а ќе ги добијат програмери, претприемачи, сопственици на претпријатија и стартапи кои се занимаваат со програмирање. Покрај ова, Емиратите планираат да основаат 1.000 компании кои ќе учествуваат во процесите на дигитална трансформација на државните и на економските системи.

Планот е започнат во соработка со одделни технолошки гиганти меѓу кои се Микрософт, Гугл, ИБМ, Циско, Амазон, Фејсбук, Нвидиа, Линкедин, ХПЕ и други, кои би требало да ги обучуваат луѓето. Целта е што повеќе да се финансираат стартапи и да се зголемат вложувањата.

За виза може да се пријават луѓе од сите националности и старосни групи.

Меѓудругото се бараат софтверски инженери, инженери од електротехника, како и стручњаци од областа на вештачката интелигенција.

Оваа година ќе започне изградбата на коридорот 8, а до крајот на 2025 ќе имаме автопат до граничниот премин Ќафасан, најави директорот на ЈП Државни патишта Ејуп Рустеми. Тој очекува градежните работи да се реализираат во предвидените рокови.

Сега се отвора патот Владата да формира комитет кој треба да започне преговори со компанијата Бехтел и Енка, за да имаме договор за почеток на работата на овие делници што е предвидено и со законот кој вчера помина во Собранието на Северна Македонија. Врз основа на овој закон се предвидува да се комплетира коридорот 8 почнувајќи од Тетово до Гостивар, бидејќи сегашниот автопат Тетово –Гостивар не ги исполнува условите според европските стандарди – истакна Рустеми на ТВ 21.

Тој одби да дава проценки за вредноста на проектот, но, како што нагласи, во секој момент граѓаните ќе бидат информирани транспарентно.

Ние зборуваме за изградба на автопат на највисоко ниво, по европски стандарди а кога ги имаме предвид европските автопати кои дозволуваат брзина и до 130 км/ч и возејќи со таква брзина, а имајќи ја предвид и безбедноста на учесниците во сообраќајот, јас верувам дека многу брзо граѓаните ќе стигнуваат од Скопје до Охрид – посочи Рустеми.

Температурата на воздухот деновиве го надминува и 40тиот степен па доколку вашиот автомобил морате да го паркирате на сонце барем некое време, воздухот во него ќе биде уште потопол и нема да можете да влезете веднаш во него и да возите.

Секој возач кој некогаш влегол во автомобил што стоел на сонце, знае колку е тоа непријатно, но тоа исто така може да биде и опасно за здравјето. Без разлика дали имате клима уред во вашиот автомобил или не, овој трик ќе ви овозможи да го изладите автомобил што стоел на сонце за само десет секунди. Еве што точно треба да направите:

Спуштете го прозорецот на совозачот и затворете ја вратата и отворете ја и затворете ја вратата на возачот.

Воланот е најдобро да биде свртен настрана при паркирање, па кога ќе се вратите и го ставите во почетна позиција, делот каде што ќе ви бидат дланките ќе биде ладен. Покрај тоа, пред да излезете од автомобилот, ставете некаква обвивка на менувачот на брзини, така што нема да биде толку жежок кога повторно ќе застанете зад воланот. Она што може да помогне за да не се загрева многу автомобилот е да ставите алуминиумска заштита на внатрешноста на ветробранското стакло. Тоа ги одбива сончевите зраци, па контролната табла и воланот нема да бидат толку жешки. Ако имате кожни седишта, добар трик е да ставите нешто од памук – било која стара маица или чаршав за да не се испечете кога ќе седнете.

извор: faktor.mk