Владата на вчерашната седница ја разгледа и усвои Информацијата за исплата на пензии за месец септември 2021 година и го задолжи Фондот на пензиското и инвалидското осигурување на Северна Македонија да ги достави податоците за пензиите до деловните банки најдоцна до 27.09.2021 година, со препорака деловните банки да обезбедат пензионерите да може да располагаат со септемвриските пензии преку мрежата на банкомати и во трговската мрежа од 28.09.2021 година.

Се препорачува на деловните банки преку филијалите и експозитурите на банките да обезбедат готовинска исплата на пензии за клиентите кои не користат картички, во четири групи според следниот распоред составен според висината на пензијата:

• За пензии со висина до 11.000 денари, исплатата да се изврши на 28.09.2021 година (вторник);
• За пензии со висина 11.001-14.000 денари, исплатата да се изврши на 29.09.2021 година (среда);
• За пензии со висина 14.001-18.000 денари, исплатата да се изврши на 30.09.2021 година (четврток); и
• За пензии со висина над 18.001 денари, исплата да се изврши на 01.10.2021 година (петок). 

На Словенците ќе им требаат ковид потврди и за работа од дома, инаку ќе се соочат со казни. 

Министерството за труд сега појасни дека дури и оние кои работат од дома не се ослободени од обврската да поднесат потврда за вакцинација, прележан коронавирус или негативен тест, јави телевизијата Н1, пренесе Индекс.

Ако вработените што работат од дома немаат ковид потврда, тие ќе мора да се самотестираат со брз антигенски тест најмалку еднаш неделно, по што мора сертификатот да го испратат до работодавачот, а во него да бидат наведени датумот на тестирање, резултатот од тестот и потпис. Трошоците за тестирање се на товар на работодавачот.

Словенија воведе ковид сертификат за работа, за одење во трговски центри, здравствени установи, јавен превоз, освен за студентите, како и за различните услужни дејности и јавни институции. Во земјата имаше протетси против овие мерки. 

Третата доза вакцина против ковид 19 во Македонија се очекува да се примени наскоро, пишува Алсат.

Првично, властите планираат со третата доза да ги имунизираат лицата со загрозен имунитет и здравствените работници, додека за останатите жители во земјава сѐ уште нема дефинитивен став дали треба или не да се имунизираат со третата доза.

Директорот на Институтот за имунологија во Скопје вели дека кај нас третата доза ќе биде Фајзер, без разлика со која вакцина претходно биле имунизирани граѓаните.

Просечната плата во јули била 28.540 денари. 

Таа е за 4,8 отсто поголема од истиот месец лани, објави Државниот завод за статистика. Просечната месечна исплатена бруто-плата, пак, во јули изнесувала 42.627, што е за 4,9 отсто повисока од јули 2020 година.

Зголемувањето се должи, пред сѐ, на растот на просечната месечна исплатена нето-плата во секторите: Објекти за сместување и сервисни дејности со храна (15.1  отсто), Уметност, забава и рекреација (14.2 отсто) и Други услужни дејности (13.5 отсто).

Но, во земјава растат и трошоците за живот. Веќе има зголемување на дел од цените на прехранбените продукти, а дел допрва ќе поскапуваат. 

Синдикалната кошница за август годинава изнесува 34.342 денари, а зголемена е за 214 денари во однос на претходниот месец јули.