Минималната синдикална кошничка за јануари чинела 35.811 денари. Синдикалната кошничка ги утврдува минималните трошоци за живот на едно четиричлено семејство на месечно ниво. 

Таа е зголемена за 770 денари во споредба со декември 2021 година, соопшти Сојузот на синдикати на Македонија (ССМ). Од оваа сума пари 15.317,93 денари или 42,77 отсто се трошат за исхраната и пијалаците, со 11.447,24 денари, односно 31,97 отсто учествува домувањето. 

Понатаму,  за хигиената се трошат 6,74 отсто или 2.415,09 денари, за превозот одат 2.652,27 денари, односно 7,41 отсто, за облека и обувки со 2.165,27 денари или 6,05 отсто, за култура 1.067,86 или 2,98 отсто и одржување на здравје со 745,34 денари, односно 2,08 отсто.

Најголем пораст на индексите на трошоците на животот е забележан  кај централното греење за домаќинствата за 14 отсто, електричната енергија за домаќинствата за 9,4 отсто. Исто така, пораст на индексите на трошоците на животот во јануари 2022 година, во споредба со претходниот месец, е забележан кај кафето, чајот, какаото за 4.3 отсто, рибата за 3,5, свежото и разладеното овошје за 3,4, прехранбените производи, неспоменати на друго место за 2,5 отсто, велат од ССМ.

Минималната плата се зголеми на 18.000 денари. Од март месец, работниците не смеат да земаат помалку од 18.000 денари. Во земјава растат трошоците за живот. 

Јавното претпријатие „Градски паркинг" ги информира граѓаните за поволностите што ги нуди за регулирање на паркирањето, особено за зона А8, Ц45 и Ц46. 

 Сакаме да ги известиме граѓаните дека цените за месечна дозвола за паркирање изнесуваат 4000 денари за физички и правни лица на зона А и 2000 денари на зона Ц. Потенцираме дека за лица вработени во институции, месечната дозвола е на износ од 800 ден. Со тоа им нудиме можност на вработените да ја регулираат услугата паркирање по поволни услови, се вели во соопштението од ЈП Градски Паркинг.

Оттаму ги повикуваат сите заинтересирани корисници кои се вработени во институции кои со адресите или подружници се лоцирани на една од горенаведените зони: Ц45 која се наоѓа во кругот на МРТВ, Ц46 која се наоѓа покрај кеј Димитар Влахов (МКЦ) и А8 лоцирана кај Стоковна куќа Мост, да се обратат во ЈП Градски паркинг – Скопје и да го регулираат паркирањето.

За тоа се потребни документи за тековна состојба од Централен регистар, потврда за редовен работен однос и сообраќајна дозвола (на увид).

Доколку сообраќајната дозвола не е на име на барателот, потребно е да се достави полномошно за управување на пмв заверено на нотар. Полномошното може да биде од исклучиво од роднина од прв наследен ред и тоа: сопружници, родители и деца, и лизинг.

За дополнителни информации граѓаните може да се обратат на телефонскиот број 02 321 55 66, лок. 201 и 202 во период од 08:00-16:00 од понеделник- петок.

Горива повторно поскапуваат, најави денеска првиот човек на Регулаторната комисија за енергетика, Марко Бислимовски. Тој денес информира дека бензинот поскапува за еден денар, а дизелот за 0,5 денари.

За жал ова е осма недела како поскапува. Како РКЕ не можеме да влијаеме на цената на горивата, имајќи ја во предвид структурата. Цената на бензините отпаѓа на набавната цена која што е на берзите и немаме никакво влијание. Соодветно на тоа е и курсот на доларот, рече Бислимовски во емисијата „Студио 10“.

Тој додаде дека Македонија има најниска цена на дизелот во регионот, која изнесува 1,19 евра за литар.

Цените на нафтата на светските берзи пораснаа минатата недела, осми пат по ред, како резултат на тензиите меѓу САД и Русија околу Украина и рекордните проценки за раст на побарувачката оваа година.

Цената на барелот на лондонскиот пазар минатата недела порасна за 1,25 отсто, на 94,44 долари, додека на американскиот пазар барелот поскапе за 0,85 отсто, на 93,10 долари.

Новите највисоки нивоа на цените на нафтата од крајот на 2014 година во голема мера се должат на скокот на цените од 3 отсто во петокот, откако Белата куќа соопшти дека Русија сега има доволно војници да спроведе голема воена операција во Украина, така што нападот би можел да следи во секое време. Сите Американци треба да ја напуштат Украина во рок од 24 до 48 часа.

Тоа предизвика страв кај трговците од прекини во снабдувањето со енергија на Европа од Русија, пишува Хина.

Сите сакаат да обезбедат доволно нафта... Доколку дојде до инвазија и знаете дека ќе следат санкции против Русија, што може да резултира со прекин на снабдувањето со гас и нафта, изјави Ендрју Липу, претседател на Lipou Oil Associates.

„Поддршка“ на цената даде и Меѓународната агенција за енергетика (ИЕА), која ја зголеми проценката за побарувачката на нафта оваа година за 800.000 барели дневно, а сега очекува да се зголеми за 3,2 милиони барели дневно и да достигне рекордни 100,6 милиони барели на ден.

Проценката на ИЕА уследи по предупредувањето на ОПЕК дека глобалната побарувачка за нафта може да се зголеми уште повеќе оваа година, со оглед на силното закрепнување на економиите од кризата со коронавирусот.

Но, ИЕА исто така соопшти дека Саудиска Арабија и Обединетите Арапски Емирати би можеле да ги смират нестабилните пазари со поголемо производство.

Организацијата на земјите извознички на нафта (ОПЕК) и нејзините сојузници произвеле 900.000 барели дневно помалку од планираното во јануари, соопшти ИЕА, а Саудиска Арабија и ОАЕ имаат најрезервен капацитет за производство и би можеле да го намалат притисокот врз резервите.

Глобалните резерви на нафта штотуку се намалени - еден од факторите што ги зголемува цените кон 100 долари, поттикнувајќи ја инфлацијата ширум светот, нагласи ИЕА.

Иако растат веќе осум недели по ред, растот на цената на нафтата забавува во последните недели, бидејќи во иднина би можел да забави растот на економиите.

Имено, со оглед на тоа што инфлацијата во САД достигна 7,5 отсто, што е највисоко ниво во последните 40 години, ФЕД наскоро ќе ги зголеми клучните каматни стапки поагресивно од очекуваното.

А тоа би можело да го забави растот на најголемата светска економија, а со тоа и побарувачката на нафта.

- Податоците за инфлацијата во САД веројатно ќе го зголемат притисокот врз ФЕД да ги зголеми каматните стапки поагресивно. Ваквите проценки донекаде ги ограничија нафтените пазари, рече Ворен Патерсон од ИНГ.

По поскапувањето за повеќе од 50 отсто минатата година, цената на нафтата скокна за повеќе од 20 отсто од почетокот на оваа година.

Некои аналитичари сметаат дека поради зајакнувањето на побарувачката, и недоволната понуда, цената на барелот наскоро ќе достигне ниво од 100 долари.

Други сметаат дека трендот на поскапување наскоро би можел да се запре.

Цените на светските пазари ги поскапуваат цените и кај нас

Причина за скок на цените на нафтените деривати и кај последователно неколку недели по ред се должи на зголемените референтни цени на нафтените деривати на светскиот пазар.

На пладне РКЕ треба да го соопшти новиот ценовник за горивата кој ќе биде на сила една недела.