Инфлацијата во еврозоната нагло забрза во март, достигнувајќи ново рекордно ниво од 7,5 отсто, поттикната од зголемените цени на горивата и природниот гас, но и од значителниот пораст на цените на храната, покажуваат првите проценки на Евростат. Проценката покажува дека растот на потрошувачките цени во 19-те земји кои ја делат единствената валута, изразен со хармонизираниот индекс на потрошувачките цени, бил значително посилен во март отколку во февруари, кога цените пораснале за 5,9 отсто на годишно ниво.

Главната причина за силното забрзување се рекордно високите цени на горивото и природниот гас, кои дополнително се поттикнати од војната во Украина и санкциите против Русија за инвазија на соседна земја. Цените на енергијата во еврозоната во март беа за 44,7 отсто повисоки во однос на истиот месец минатата година, по растот од 32 отсто во февруари.

Свежата храна исто така значително поскапе

Значително поскапеа и свежата храна, за 7,8 отсто во однос на март минатата година, по растот од 6,2 отсто во февруари, според првичните проценки.

Со исклучок на високо нестабилните цени на енергијата и храната, стапката на инфлација во март беше 3,2 отсто, пресметаа европските статистичари, што е уште подалеку од целта на Европската централна банка (ЕЦБ) од два отсто. Во февруари беше 2,9 отсто.

Властите на Обединетото Кралство на 25 март донесоа одлука за нулта толеранција за употреба на мобилен телефон при возење автомобил.

Досега законот забранувал употреба на мобилен телефон во ситуации кога се користи за „интерактивна комуникација“, како што е телефонски разговор.

Меѓутоа, не и за т.н. активности надвор од мрежата. Причината е едноставна – законот е донесен пред 17 години, пред појавата на паметните телефони, па со оглед на тогашните функции кои биле помалку комплицирани од денес законот бил така креиран.

Новото ажурирање на законот е обид на надлежните да ја надоместат таа „дупка“ во законот и да опфатат поширок спектар на функции на модерните телефони и ефективна забрана за било каква употреба при возење.

Тоа значи дека отсега возачите ќе го прекршат законот доколку користат мобилен телефон додека возат, па дури и доколку станува збор за фотографирање или видеозапис, играње игри итн.

Во случај возачот да биде „уловен“ на дело, тој ќе мора да плати парична казна од 2.500 фунти (околу 3.000 евра), како и целосна забрана за возење.

На возачите и натаму им е дозволено да вршат бесконтактни плаќања, но кога возилото се наоѓа во мирување, како и бесконтактно да користат навигација на нивниот мобилен телефон, доколку тој е статичен.

Дали некогаш сте имале чувство дека поминувате повеќе време на работа отколку дома? Тогаш размислете за работниците на „General Motors“ во Кина кои воопшто не одат дома - тие буквално спијат на подот од својата фабрика.

Вработените во погонот на „General Motors“ (GM) во Шангај биле замолени да спијат во фабриката за да се овозможи постројката да остане отворена со почитување на моменталните противепидемиолошки мерки поради пандемијата на коронавирусот. Како што известува „Reuters“, работниците спијат, живеат и работат во фабриката и во целост се изолирани од остатокот од населението за да се спречи пренесување на вирусот, слично како што тоа го правеше персоналот на неодамна одржаните Зимски олимписки игри во Пекинг.

Локдаунот во Шангај им предизвика проблеми на неколку автомобилски произведувачи и индустриски доставувачи, вклучувајќи ја „Tesla“ која има историја на кршење на американските правила за пандемијата, но оваа недела го стопираше производството во Кина на 4 дена бидејќи не успеа да го реализира истиот план како „GM“.

Фабриката во Шангај е дел од заедничката компанија на „GM“ и кинескиот „SAIC“ и моментално произведува автомобили од марката „Buick“, „Chevrolet“ и „Cadillac“.

Кога „AutoNews“ побарал од „General Motors“ да го искоментира извештајот кој потекнува од информации од две лица запознаени со ситуацијата во фабриката, компанијата одбила да коментира, велејќи само дека производството на возила продолжува со вообичаеното темпо.

Се чини дека порастот на бројот на случаи на Ковид-19 ширум Кина исто така ќе ги присили организаторите на Саемот за автомобили во Пекинг да го откажат настанот следниот месец. Оваа манифестација треба да започне на 21-ви април и иако досега нема официјална потврда дека терминот е променет, „AutoNews China“ известува дека саемот би можело да биде поместен за јуни.

Од денеска се укинува вонредната пандемиска состојба во Бугарија, а некои антиепидемиски мерки се уште остануваат.

Како што јави дописникот на МИА од Софија, од денеска се укинува барањето за задолжително носење заштитни маски во затворени јавни места, одржување физичка дистанца, за ограничување на бројот на лица кои можат истовремено да бидат во затворен простор, како и за забрана за посета во болниците.

Носењето заштитни маски останува пожелно за места каде што се собираат многу луѓе.

Од денеска до 15 мај 2022 година, сите лица, без разлика од која земја доаѓаат во Бугарија, ќе треба да приложат валиден дигитален сертификат на ЕУ за вакцинација, за прележаност на болеста, тест или сличен документ што ги содржи истите податоци. Лицата кои нема да достават барем еден од овие документи ќе бидат примени на територијата на Бугарија, но ќе бидат ставени во 10-дневен карантин.